ފްރެންޗު ކަޕާއި ފްރެންޗު ލީގު ކަޕްގެ ފައިނަލް މެޗުތައް އަންނަ މަހުގެ ފަހުކޮޅު

ކޮރޯނާވައިރަސް (ކޮވިޑް-19) އާ ގުޅިގެން ފަސްކުރި މި ސީޒަނުގެ ފްރެންޗު ކަޕާއި ފްރެންޗު ލީގު ކަޕްގެ ފައިނަލް މެޗުތައް އަންނަ މަހުގެ ފަހުކޮޅު ކުޅެން ތާވަލުކޮށްފިއެވެ.

ފްރެންޗު ކަޕާއި ފްރެންޗު ލީގު ކަޕްގެ ފައިނަލް މެޗުތައް އަންނަ މަހުގެ ފަހުކޮޅު ކުޅެން ފްރެންޗު ފުޓްބޯލް ފެޑެރޭޝަނުން ތާވަލުކުރިއިރު، ސެޕްޓެމްބަރު މަހުގެ ކުރިން މީހުން އެއްވެ އުޅެ ކުރިއަށް ގެންދާ އެއްވެސް ހަރަކާތެއް ނުބޭއްވޭނެ ކަމަށް ފްރާންސް ސަރުކާރުން ނިންމުމާއެކު މި ސީޒަނުގެ ފްރެންޗު ލީގު ވަނީ އޭޕްރީލް މަހުގެ 30 ވަނަ ދުވަހު ކެންސަލް ކޮށްފައެވެ. ފްރެންޗު ލީގަކީ ޔޫރަޕްގެ ގަދަ ފަސް ލީގުގެ ތެރެއިން ކެންސަލް ކުރި ހަމައެކަނި ލީގެވެ.

ފްރެންޗު ކަޕްގެ ފައިނަލް މެޗު ކުޅެން މިހާރު ތާވަލުކޮށްފައިވަނީ އަންނަ ޖުލައި މަހުގެ 24 ވަނަ ދުވަހެވެ. ފްރެންޗު ކަޕްގެ ފައިނަލްގައި ބައްދަލުކުރާނީ މި ސީޒަނުގެ ފްރެންޗު ލީގުގެ ޗެމްޕިއަންކަން ހޯދި ޕީއެސްޖީ އާއި ސެއިންޓް-އެޓިއެންއެވެ.

އަދި މީގެ ކުރިން އޭޕްރީލް މަހުގެ ހަތަރުވަނަ ދުވަހަށް ތާވަލުކުރި ފްރެންޗު ލީގު ކަޕްގެ ފައިނަލް މެޗު މިހާރު ވަނީ ޖުލައި މަހުގެ 31 ވަނަ ދުވަހަށް ތާވަލުކޮށްފައެވެ. ފްރެންޗު ލީގު ކަޕްގެ ފައިނަލްގައި ވާދަކުރާނީ ޕީއެސްޖީ އާއި ލިޔޯންއެވެ.

ފްރާންސްގައި އަންނަ މަހު އަލުން ފުޓްބޯޅަ ހަރަކާތްތައް ފަށާއިރު، ދާދި ފަހުން ކްލަބުތަކުން ވަނީ ފަރިތަކުރުންތަކަށް ނުކުމެފައެވެ. އެގޮތުން ފަރިތަކުރުންތަކަށް ނުކުތުމުގެ ކުރިން ވަނީ ކްލަބުތަކުގެ ކުޅުންތެރިންނާއި އޮފިޝަލުން ކޮވިޑް-19ށް ޓެސްޓު ކޮށްފައެވެ.

އެގޮތުން ކުރިއަށް ގެންދިޔަ ޓެސްޓުތަކުން ޕީއެސްޖީގެ ތިން ކުޅުންތެރިއަކާއި އޮފިޝަލަކު ވަނީ ކޮވިޑް-19ށް ޕޮޒިޓިވް ވެފައެވެ. އަދި މި ސީޒަނުގެ ފްރެންޗު ލީގު ކެންސަލް ކުރުމާއެކު ދެވަނަ ޑިވިޝަނަށް ރެލިގޭޓްވި ޓުލޫސްގެ ހަތަރު ކުޅުންތެރިއަކު ވަނީ ކޮވިޑް-19ށް ޕޮޒިޓިވް ވެފައެވެ.

ޕީއެސްޖީ އާއި ޓުލޫސްއިންވެސް ކޮވިޑް-19ށް ޕޮޒިޓިވްވި ކުޅުންތެރިންގެ ނަންތައް ހާމަނުކުރި ނަމަވެސް، އެ ހުރިހާ ކުޅުންތެރިންވެސް މިހާރު އައިސޮލޭޝަނަށް ބަދަލުކޮށްފައިވާކަން ވަނީ ހާމަކޮށްފައެވެ.