ޗެލްސީ އަތުން މެންޗެސްޓާ ސިތީ ބަލިވުމުން، އިނގިރޭސި ޕްރިމިއާ ލީގުގެ ޗެމްޕިއަންކަން ލިވަޕޫލުން ކަށަވަރުކޮށްފިއެވެ.

މިއީ 30 އަހަރަށްފަހު ލިވަޕޫލުން ލީގު ޗެމްޕިއަންކަން ހޯދި ފުރަތަމަ ފަހަރެވެ. މިއާއެކު ލިވަޕޫލުން ވަނީ ލީގު ޗެމްޕިއަންކަން ޖުމްލަ 19 ފަހަރު ހޯދާފައެވެ. ލިވަޕޫލުން ލީގު ޗެމްޕިއަންކަން ކަށަވަރުކުރިއިރު، އެޓީމުގެ ކޯޗު ޔާގަން ކްލޮޕުގެ އިރުޝާދުގެ ދަށުން މިހާރު ވަނީ ޕްރިމިއާ ލީގާއި، ޔުއެފާ ޗެމްޕިއަންސް ލީގު އަދި ފީފާ ކްލަބު ވޯލްޑް ކަޕް ކާމިޔާބުކޮށްފައެވެ.

ލީގުގައި ބުރާސްފަތި ދުވަހުގެރޭ ކުޅުނު މެޗުން ސިޓީގެ މައްޗަށް ޗެލްސީން ކުރިހޯދީ 2-1 ގެ ނަތީޖާއަކުންނެވެ. މި ނަތީޖާއާއެކު ލިވަޕޫލް އެއްވަނައިގައި އޮތީ 23 ޕޮއިންޓުގެ ލީޑަކާއެކުއެވެ. އެ ޓީމަށް 31 މެޗުން 86 ޕޮއިންޓު ލިބިފައިވާއިރު، ދެވަނައިގައި އޮތް މެންޗެސްޓާ ސިޓީއަށް 31 މެޗުން ލިބިފައިވަނީ 63 ޕޮއިންޓެވެ. ސިޓީ އަތުން މޮޅުވި ޗެލްސީ އޮތީ ތާވަލުގެ ހަތަރުވަނައިގައި 31 މެޗުން 54 ޕޮއިންޓާއެކުއެވެ.

ޗެލްސީގެ ދަނޑުގައި ކުޅުނު މި މެޗުގެ ފުރަތަމަ ހާފު ޑޮމިނޭޓުކޮށްގެން ކުޅުނީ ސިޓީންނެވެ. އެކަމަކު މި ހާފުގައި ޗެލްސީން ގިނަ ހަމަލާތަކެއް އުފެއްދިއިރު، މެޗުގެ 36 ވަނަ މިނެޓުގައި ސިޓީގެ ޑިފެންޑަރު ބެންޖަމިން މެންޑީ ހެދި ގޯހެއްގެ ފައިދާ ނަގައި ކްރިސްޓިއަން ޕުލިސިޗް ވަނީ ޗެލްސީއަށް ލީޑު ނަގާދީފައެވެ.

ދެވަނަ ހާފުގައި ކެވިން ޑި ބްރޭނާ ކާމިޔާބުކުރި ހިލޭ ޖެހުމަކުން ސިޓީން ނަތީޖާ އެއްވަރުކުރިއިރު، އޭގެ އިރުކޮޅެއް ފަހުން ސިޓީގެ ފޯވާޑް ރަހީމް ސްޓާލިންއަށް ވަނީ ލީޑު ނަގަން ހުސް ފުރުސަތެއް ލިބި ބޭކާރުވެފައެވެ. އޭނާ ފޮނުވާލި ހަމަލާ އަމާޒުވީ ގޯލުގެ އަރިމަތީ ދަނޑިއަށެވެ.

މި މެޗުގައި ޗެލްސީން އަލުން ލީޑު ނެގީ 78 ވަނަ މިނެޓުގައި ވިލިއަން ކާމިޔާބުކުރި ޕެނަލްޓީންނެވެ. މި ޕެނަލްޓީއަކީ ސިޓީގެ ޑިފެންޑަރު ފެނާންޑީނިއޯ ގަސްތުގައި ބޯޅައިގައި އަތްލުމާއި ގުޅިގެން ރެފްރީ ދިން ޕެނަލްޓީއެކެވެ. ގޯލު ރޮނގުމަތިންހެން ބޯޅައިގައި އަތްލުމުން ރެފްރީ ވަނީ ފެނާންޑީނިއޯއަށް ސީދާ ރަތް ކާޑެއް ދައްކާފައެވެ.

އެންމެ ފަހުގެ ޗެމްޕިއަން ސިޓީ ބަލިވުމުން، ލިވަޕޫލަށް ލީގު ޗެމްޕިއަންކަން ކަށަވަރުވިއިރު، އެޓީމަށް އަދި ލީގުގައި ބާކީ ހަތް މެޗު އެބައޮތެވެ. ލީގުގައި ލިވަޕޫލުން ދެން މެޗެއް ކުޅޭނީ އަންނަ މަހުގެ ތިންވަނަ ދުވަހެވެ. އެ ދުވަހު ލިވަޕޫލް ނުކުންނާނީ ރަށުން ބޭރުގައި ސިޓީއާ ދެކޮޅަށެވެ.