30 އަހަރަށް ފަހު އިނގިރޭސި ޕްރިމިއާ ލީގު ހޯދުމާ ފިޔަވަޅަކާ ގާތަށް ލިވަޕޫލް ޖެހިލައިފިއެވެ.
ލީގު ހޯދުމާ ފިޔަވަޅަކާ ގާތަށް ލިވަޕޫލް ޖެހިލީ ލީގުގައި ބުދަ ދުވަހުގެރޭ ކްރިސްޓަލް ޕެލަސް އަތުން 4-0 ން މޮޅުވެގެންނެވެ.
މި ނަތީޖާއާއެކު ލިވަޕޫލް އެއްވަނައިގައި އޮތީ 23 ޕޮއިންޓުގެ ލީޑަކާއެކުއެވެ. އެ ޓީމަށް 31 މެޗުން 86 ޕޮއިންޓު ލިބިފައިވާއިރު، ދެވަނައިގައި އޮތް މެންޗެސްޓާ ސިޓީއަށް 30 މެޗުން ލިބިފައިވަނީ 63 ޕޮއިންޓެވެ. އެހެންކަމުން ލީގުގައި ބުރާސްފަތި ދުވަހުގެރޭ ޗެލްސީ އަތުން ސިޓީއަށް މޮޅުނުވެވިއްޖަނަމަ، ލިވަޕޫލަށް ލީގުގެ ޗެމްޕިއަންކަން ލިބޭނެއެވެ.
ލިވަޕޫލްގެ ދަނޑުގައި ބުދަ ދުވަހުގެރޭ ކުޅުނު މެޗުގައި އެޓީމުގެ ފަރާތުން ވަނީ މޮޅު ކުޅުމެއް ފެނިގެން ގޮސްފައެވެ. މި މެޗުގައި ލިވަޕޫލުން ލީޑު ނެގީ މެޗުގެ 23 ވަނަ މިނެޓުގައެވެ. ލިބުނު ހިލޭޖެހުމަކުން މި ލަނޑު ލިވަޕޫލަށް ކާމިޔާބުކޮށްދިނީ ޓްރެންޓް އަލެކްސަންޑަ-އާނޯލްޑެވެ. އަދި ފުރަތަމަ ހާފު ނިމެން މިނެޓަކަށް ވެފައި ވަނިކޮށް ފަބީނިއޯ ދިން ބޯޅައަކުން މުހައްމަދު ސަލާހު ވަނީ ލިވަޕޫލަށް ލީޑު ފުޅާކޮށްދީފައެވެ.
ލިވަޕޫލްގެ ތިންވަނަ ލަނޑު މެޗުގެ 55 ވަނަ މިނެޓުގައި އެންޑްރޫ ރޮބަޓްސަން ދިން ޕާހަކުން ކާމިޔާބުކުރީ ފަބީނިއޯއެވެ. އޭނާ މި ލަނޑު ކާމިޔާބުކުރީ ޕެނަލްޓީ އޭރިއާ ބޭރުން ފޮނުވާލި ބާރު ހަމަލާއަކުންނެވެ. މެޗުގައި ލިވަޕޫލުން ކާމިޔާބުކުރި ހަތަރުވަނަ ލަނޑު 69 ވަނަ މިނެޓުގައި ސަލާހު ދިން ބޯޅައަކުން ކާމިޔާބުކުރީ ސަޑިއޯ މާނޭއެވެ.
މީގެ އިތުރުން ލީގުގެ ބުދަ ދުވަހުގެރޭ މެންޗެސްޓާ ޔުނައިޓެޑުން ވަނީ މުހިންމު މޮޅެއް ހޯދާފައެވެ. ޔުނައިޓެޑް އަމިއްލަ ދަނޑުގައި އެޓީމުން ވަނީ ޝެފީލްޑް ޔުނައިޓެޑް ބަލިކުރީ 3-0 ގެ ނަތީޖާއަކުންނެވެ.
މި މެޗުގައި ޔުނައިޓެޑުން ކާމިޔާބުކުރި ތިން ލަނޑުވެސް އެޓީމަށް ކާމިޔާބުކޮށްދިނީ ފޯވާޑް އެންތަނީ މާޝިއަލްއެވެ. އެގޮތުން މެޗުގެ ވަރަށް ކުރީކޮޅު ޔުނައިޓެޑުން ވަނީ ލީޑު ނަގާފައެވެ. މެޗުގެ ހަތްވަނަ މިނެޓުގައި މާކަސް ރަޝްފޯޑްގެ އެހީއާއެކު މާޝިއަލް ޔުނައިޓެޑަށް ލީޑު ނަގައިދިންއިރު، ފުރަތަމަ ހާފު ނިމެން މިނެޓަކަށް ވެފައި ވަނިކޮށް މާޝިއަލް ލީޑު ފުޅާކޮށްދިނީ އާރޮން ވެން-ބިސާކާ ދިން ބޯޅައަކުންނެވެ. އަދި މި މެޗުގައި މާޝިއަލް ހެޓްރިކް ފުރިހަމަކުރީ 74 ވަނަ މިނެޓުގައި ރަޝްފޯޑްގެ އެހީއާއެކުއެވެ.
މި މޮޅާއެކު ގަދަ ހަތަރަކަށް ވާދަކުރަމުން އަންނަ ޔުނައިޓެޑް އޮތީ ތާވަލުގެ ފަސްވަނައިގައި 31 މެޗުން 49 ޕޮއިންޓާއެކުއެވެ.
