ވަގަށް އެތެރެކުރި ވެހިކަލްތަކުގެ މައްސަލައިގައި ކަސްޓަމްސްގެ 2 މުވައްޒަފަކު ވަޒީފައިން ވަކިކޮށްފި
މައްސަލައިގެ ތަހުގީގު އަދިވެސް ދަނީ ކުރިއަށް
ކަސްޓަމްސްއިން ހިފެހެއްޓި ގަވައިދާ ހިލާފަށް އެތެރެކޮށްފައިވާ ކަމަށް ބެލެވޭ ސައިކަލުތަކެއް: 16 ސައިކަލު ހިފަހައްޓާފައިވޭ
މިދިޔަ އަހަރު އޮޅުވާލައިގެން ރާއްޖެއަށް ވަގަށް އެތެރެކުރި ވެހިކަލްތަކުގެ މައްސަލައިގައި ކަސްޓަމްސްގެ 2 މުވައްޒަފަކު ވަޒީފާއިން ވަކިކޮށްފައިވާ ކަމަށް ކަސްޓަމްސް އިން ހާމަކޮށްފިއެވެ.
ރާއްޖެޓީވީގެ ފަލަ ސުރުހީ ޕްރޮގްރާމުގައި ވާހަކަދައްކަވަމުން ކޮމިޝަނަރ ޖެނެރަލް އޮފް ކަސްޓަމްސް އަބްދުﷲ ޝަރީފް ވިދާޅުވީ ވަގަށް ވެހިކަލްތަކެއް އެތެރެ ކުރަން އުޅުނު މައްސަލަ އަކީ 2019 ވަނަ އަހަރު ހިންގި ބޮޑު ހާދިސާއެއް ކަމަށެވެ.
ޝަރީފް ވިދާޅުވީ އެ ހަދިސާ އެގޮތަށް ހިނގި އިރު ބަޔަކު އިހުމާލުވެފައިވާކަން ވަރަށް ބޮޑަށް ފާހަގަ ކުރެވިފައިވާ ކަމަށެވެ. އަދި އުސޫލެއްގެ ގޮތުން ކޮންޓެއިނަރ ކަނޑާއިރު އެތަނުގައި ކަސްޓަމްސްގެ މުވައްޒަފުންގެ އިތުރުން އެމްޕީއެލްގެ އޮފިސަރަކާއި މަޖޫރީން ވެސް ތިބޭނެ ކަމަށާއި، އެމީހުންނަށް އެއީ ކޯއްޗެއްކަން ފެންނަން ވެސް ޖެހޭނެ ކަމަށެވެ.
މި މައްސަލައިގައި މިހާތަނަށް ކަސްޓަމްސްގެ 2 މުވައްޒަފަކު ވަޒީފާއިން ވަކިކޮށްފައިވާ ކަމަށް ޝަރީފް ވިދާޅުވިއެވެ.
ޝަރީފް ވިދާޅުވީ ކަންކަން ރަނގަޅު ކުރުމަކީ މުޅި މާހައުލުގައި ހިމެނޭ އެންމެންގެ ޒިންމާއެއް ކަމަށެވެ. އަދި މި މައްސަލައިގެ ތަހުގީގު ކުރިއަށްދާއިރު މިހާތަނަށް އެނގިފައިވާ ގޮތުގައި މި މައްސަލައިގައި ކަމާއި ގުޅުންހުރި މުއައްސާތަކުގެ އިހުމާލު ވެސް އެބައޮތް ކަމަށް ޝަރީފް ވިދާޅުވިއެވެ.
މިދިޔަ އަހަރުގެ އޮގަސްޓް މަހުގެ ތެރޭގައި މި މައްސަލައިގައި ކަސްޓަމްސް އިން ބުނެފައިވާ ގޮތުގައި ރާއްޖެއަށް ލަކުޑި އެތެރެ ކުރުމުގެ ނަމުގައި ގެނައި ދެ ކޮންޓެއިނަރަކުން ތިން ކާރާއި ދެ ޕިކަޕާއި ދެ ވޭނާއި 14 ސައިކަލް ކަސްޓަމްސްގެ ބެލުމުގެ ދަށަށް ގެންގޮސްފައިވެއެވެ. އަދި މި ވެހިކަލްތަކުގެ ސީއެންޑްއެފް އަގު 586،000 ރުފިޔާއަށް އަރާނެ ކަމަށް ލަފާ ކުރެވޭ ކަމަށް ވެސް ކަސްޓަމްސް އިން އޭރު ނެރުނު ބަޔާނުގައި ބުނެފައިވެއެވެ.
