ނާޕޮލީގެ އެއްބަސްވުން މާޓެންސް އާކުރަނީ

ނާޕޮލީގެ އެއްބަސްވުން އާކުރަން ބެލްޖިއަމްގެ ތަރި ޑްރީސް މާޓެންސް ނިންމާފައިވާ ކަމަށް ރިޕޯޓުތައް ބުނެފިއެވެ.

އުމުރުން 33 އަހަރުގެ މާޓެންސް ނާޕޮލީއާއެކު ހަދާފައިވާ އެއްބަސްވުން މި ސީޒަން ނިމުމުން ހަމަވާނެއެވެ. އެކަމަކު އިތުރު ތިން އަހަރަށް ނާޕޮލީގެ އެއްބަސްވުން އާކުރަން އޭނާ ނިންމާފައިވާ ކަމަށް މީޑިއާތަކުން ވަނީ ރިޕޯޓުކޮށްފައެވެ.

ނާޕޮލީގެ އެއްބަސްވުން އާކުރަން މާޓެންސް ނިންމި ކަމަށް ރިޕޯޓުތައް ބުނިއިރު، އޭނާ ހޯދަން އިންޓަ މިލާނާއި ޗެލްސީން އަންނަނީ މަސައްކަތް ކުރަމުންނެވެ.

ނާޕޮލީގެ އެއްބަސްވުން މާޓެންސް އާކުރާއިރު، ދާދި ފަހުން އޭނާ ވަނީ ނާޕޮލީގެ ތާރީޚުގައި އެ ކްލަބަށް އެންމެ ގިނަ ލަނޑު ޖެހި ކުޅުންތެރިޔާގެ ޝަރަފު ހޯދާފައެވެ. މިދިޔަ ހޮނިހިރު ދުވަހުގެރޭ މާޓެންސް ވަނީ އިޓާލިއަން ކަޕްގައި ނަޕޮލީއަށް 122 ލަނޑު ޖަހައިދީފައެވެ. ކުރިން މި ރެކޯޑް އޮތީ ނާޕޮލީގެ ކުރީގެ ކެޕްޓަން ސްލޮވާކިއާގެ މަރެކް ހަމްސިކް އަތުގައެވެ. 121 ލަނޑާއެކު ހަމްސިކް ލިސްޓުގެ ދެވަނައަށް ވެއްޓުނުއިރު، ތިންވަނައިގައި އޮތީ އާޖެންޓީނާގެ ލެޖެންޑް ޑިއޭގޯ މަރަޑޯނާއެވެ.

2013 ވަނަ އަހަރު ނަޕޮލީއާ ގުޅުނު ފޯވާޑް އެޓީމުގައި މޮޅު ކުޅުމެއް ދައްކަމުން އަންނައިރު، އޭނާ ވަނީ ނަޕޮލީއާއެކު އިޓާލިއަން ކަޕްގެ އިތުރުން އިޓާލިއަން ސުޕަ ކަޕްވެސް ކާމިޔާބުކޮށްފައެވެ. އަދި އޭނާ ވަނީ ބެލްޖިއަމްގެ ގައުމީ ޓީމަށް މިހާތަނަށް ކުޅެދިން 90 މެޗުގައި 18 ލަނޑު ޖެހުމުގެ އިތުރަށް، ބެލްޖިއަމް އާއެކު 2018 ވަނަ އަހަރުގެ ފީފާ ވޯލްޑް ކަޕްގެ ތިންވަނަ ހޯދާފައެވެ.