ޗެލްސީގެ ޒުވާން ފޯވާޑް ކަލުމް ހަޑްސަން-އޮޑޯއިގެ މައްޗަށް ތުހުމަތުކުރި ރޭޕްގެ މައްސަލަ ނުބަލަން ފުލުހުން ނިންމައިފިއެވެ.
އުމުރުން 19 އަހަރުގެ އިންގްލެންޑުގެ ފޯވާޑް ވަނީ މެއި މަހުގެ 18 ވަނަ ދުވަހު އަންހެނަކު ރޭޕް ކުރިކަމުގެ ތުހުމަތުގައި ހައްޔަރު ކޮށްފައެވެ. ރިޕޯޓުތައް ބުނާ ގޮތުން ހަޑްސަން-އޮޑޯއި ހައްޔަރު ކުރި ގެއިން އަންހެނަކު ވަނީ އެމްބިއުލާންސްގައި ހޮސްޕިޓަލަށް ގެންގޮސްފައެވެ.
އެކަމަކު ހަމަ އެ ދުވަހު ކަފާލާތުގެ ދަށުން ހަޑްސަން-އޮޑޯއި ވަނީ މިނިވަން ވެފައެވެ. ކަފާލާތުގެ ދަށުން މި މަހުގެ މެދާއި ހަމައަށް ހަޑްސަން-އޮޑޯއި މިނިވަންވިއިރު، ފުލުހުން މީގެ ކުރިން ވަނީ މި މައްސަލައިގެ ތަހުގީގު ފަށާފައެވެ.
ދާދި ފަހުން ހަޑްސަން-އޮޑޯއި ކުރި ޓްވީޓެއްގައި ބުނީ ފުލުހުން ކުރި ތަހުގީގު މިހާރު ހުއްޓާލާފައިވާ ކަމަށާއި، އެ މައްސަލަ އިތުރަށް ނުބަލަން ނިންމާފައިވާ ކަމަށެވެ. އެހެންކަމުން އޭނާ ވަނީ ފުލުހުންގެ ނިންމުމަށް މަރުހަބާ ކިޔާފައެވެ.
ހަޑްސަން-އޮޑޯއި އިތުރަށް ބުނީ މި މައްސަލައިގައި މީގެ ކުރިން ވާހަކަދައްކާފައި ނުވި ނަމަވެސް، ފުލުހުންނަށް ފުރިހަމައަށް އެއްބާރުލުން ދީފައިވާނެ ކަމަށާއި، މިކަމުގައި އޭނާއަށް އެހީވި އެންމެނަށް ޝުކުރު އަދާކުރާ ކަމަށެވެ.
ހަޑްސަން-އޮޑޯއިގެ މައްސަލަ ނުބަލަން ނިންމިއިރު، އޭނާ އަންނަނީ ގަވައިދުން ޗެލްސީގެ ފަރިތަކުރުންތަކުގައި ބައިވެރިވަމުންނެވެ. މީގެ ކުރިން މާޗު މަހުގެ 13 ވަނަ ދުވަހު ހަޑްސަން-އޮޑޯއި ވަނީ ކޮރޯނާވައިރަސް (ކޮވިޑް-19) ށްވެސް ޕޮޒިޓިވް ވެފައެވެ. އެކަމަކު މާޗު މަހުގެ ފަހުކޮޅު އޭނާ ވަނީ ވައިރަހުން ރަނގަޅުވެފައެވެ.
