ކަވާނީ އާއި ސިލްވާ ދޫކޮށްލަން ޕީއެސްޖީން ނިންމައިފި

ފްރާންސްގެ ޕީއެސްޖީއަށް ކުޅެމުން އަންނަ އުރުގުއޭގެ ފޯވާޑް އެޑިންސެން ކަވާނީ އާއި ބްރެޒިލްގެ ޑިފެންޑަރު ތިއާގޯ ސިލްވާ، މި ސީޒަން ނިމުމުން ދޫކޮށްލާނެ ކަމަށް އެ ކްލަބުން ބުނެފިއެވެ.

އުމުރުން 33 އަހަރުގެ ކަވާނީ އާއި 35 އަހަރުގެ ސިލްވާ، ޕީއެސްޖީއާއެކު ހަދާފައިވާ އެއްބަސްވުން މި ޖޫން މަހު ހަމަވާނެއެވެ. އެކަމަކު މި ދެކުޅުންތެރިން މި ސީޒަން ނިމެންދެން ޕީއެސްޖީގައި މަޑުކުރި ނަމަވެސް، މިސީޒަނަށްފަހު ޕީއެސްޖީއާއެކު އިތުރު އެއްބަސްވުމެއްގައި ސޮއިނުކުރަން ވަނީ ނިންމާފައެވެ.

ކޮރޯނާވައިރަސް (ކޮވިޑް-19) ސަބަބުން ފްރެންޗް ލީގު ކެންސަލް ކުރުމަށްފަހު ޕީއެސްޖީއަށް ވަނީ ޗެމްޕިއަންކަން ދީފައެވެ. ޕީއެސްޖީއަށް މި ސީޒަނުގައި ދެން ކުޅެން ޖެހޭނީ ޔުއެފާ ޗެމްޕިއަންސް ލީގެވެ.

ޕީއެސްޖީގެ ސްޕޯޓިންގ ޑިރެކްޓަރު ލިއެނާޑޯ ބުނީ ސިލްވާ އާއި ކަވާނީއަކީ ޓީމަށް މުހިންމު ދެކުޅުންތެރިން ކަމުގައި ވީ ނަމަވެސް، މި ސީޒަނަށްފަހު މި އެ ކުޅުންތެރިންގެ އެއްބަސްވުން އައު ނުކުރަށް ކްލަބުން ނިންމާފައިވާ ކަމަށެވެ.

ޕީއެސްޖީން ކަވާނީ އާއި ސިލްވާ ދޫކޮށްލަން އުޅޭއިރު، ކަވާނީ ހޯދުމަށް ނިއުކާސަލް ޔުނައިޓެޑާއި، އެތުލެޓިކޯ މެޑްރިޑާއި މެންޗެސްޓާ ޔުނައިޓެޑާއި، ޓޮޓެންހަމް ހޮޓްސްޕާ އަދި ޗެލްސީން ވެސް އަންނަނީ މަސައްކަތް ކުރަމުންނެވެ.

އިޓަލީގެ ނާޕޮލީން 2013 ވަނަ އަހަރު 64 މިލިއަން ޔޫރޯ އަށް ޕީއެސްޖީއާ ގުޅުނު ފޯވާޑް ވަނީ ޕީއެސްޖީ އަށް މިހާތަނަށް ކުޅެދިން 300 މެޗުން 200 ލަނޑު ޖަހައިދީފަ އެވެ. އަދި 2012 ވަނަ އަހަރު އޭސީ މިލާން ދޫކޮށް ޕީއެސްޖީއަށް ބަދަލުވި އެޓީމުގެ ކެޕްޓަން ސިލްވާ ވަނީ މިހާތަނަށް އެޓީމަށް 310 މެޗު ކުޅެދީފައެވެ.