ޕްރިމިއާ ލީގުން އިތުރު ދެ މީހަކު ކޮރޯނާވައިރަހަށް ޕޮޒިޓިވް ވެއްޖެ

އަށްވަނަ ބުރުގައި ކުރިއަށް ގެންދިޔަ ޓެސްޓުތަކުން އިނގިރޭސި ޕްރިމިއާ ލީގުން އިތުރު ދެ މީހަކު ކޮރޯނާވައިރަސް (ކޮވިޑް-19) ށް ޕޮޒިޓިވް ވެއްޖެ އެވެ.

މިހާތަނަށް ޕްރިމިއާ ލީގުގެ ކުޅުންތެރިންނާއި އޮފިޝަލުން ކޮވިޑް-19ށް ޓެސްޓު ކުރުމަށް އަށް ބުރެއް ކުރިއަށް ގެންގޮސްފައިވާއިރު، ޖުމްލަ 8،687 ޓެސްޓު ވަނީ ކޮށްފައެވެ. ފަހުން ކުރިއަށް ގެންދިޔަ އަށްވަނަ ބުރުގެ ޓެސްޓުގައި 1،200 މީހަކު ޓެސްޓުކުރިއިރު، ދެ މީހަކު ޕޮޒިޓިވް ވެފައިވާކަން ޕްރިމިއާ ލީގުން ވަނީ ހާމަކޮށްފައެވެ.

އެއާއެކު ނޯވިޗް ސިޓީން ވަނީ އެ ކްލަބުގެ ކުޅުންތެރިއަކު ކޮވިޑް-19ށް ޕޮޒިޓިވް ވިކަން ހާމަކޮށްފައެވެ. އެކަމަކު އެ ޓީމުން ވަނީ ސަލާމަތީ ސަބަބުތަކަށްޓަކައި އެ ކުޅުންތެރިއާގެ ނަން އާންމުނުކުރަން ނިންމާފައެވެ. ނޯވިޗުން ނެރުނު ބަޔާނެއްގައި ބުނީ އެ ޓީމުގެ ކުޅުންތެރިޔަކު ޕޮޒިޓިވްވެފައިވާތީ އެ ކުޅުންތެރިޔާގެ ކޮންޓެކްޓުތައް ވަރަށް ގާތުން ބަލަން ފަށާފައިވާ ކަމަށެވެ. އަދި ކްލަބުން އިސް ނަގައިގެން ޓެސްޓު ކުރަން ޖެހިއްޖެނަމަ އެކަން ވެސް ކުރާނެ ކަމަށް އެ ކްލަބުން ވަނީ ބުނެފައެވެ.

ނޯވިޗްގެ ކުޅުންތެރިއަކު ކޮވިޑް-19ށް ޕޮޒިޓިވް ވިއިރު، މީގެ ކުރިން ކުރިއަށް ގެންދިޔަ ޓެސްޓުތަކުން ވަޓްފޯޑުގެ ޑިފެންޑަރު އޭޑްރިއަން ޕަރިއަޕާ އާއި، އެ ކްލަބުގެ ދެ އޮފިޝަލަކާއި، ބާންލީގެ އެސިސްޓަންޓް ކޯޗު އިއަން ވޯން އާއި، ބޯންމަތުގެ ގޯލްކީޕަރު އާރޮން ރާމްސްޑޭލް ވަނީ ވައިރަހަށް ޕޮޒިޓިވް ވެފައެވެ. އެކަމަކު ރާމްސްޑޭލް މިހާރު ވަނީ ވައިރަހުން ސަލާމަތް ވެފައެވެ. އަދި މީގެ ކުރިން ޓޮޓެންހަމުން ވެސް ވަނީ އެ ކްލަބުގެ މީހަކު ކޮވިޑް-19ށް ޕޮޒިޓިވް ވެފައިވާކަން ހާމަކޮށްފައެވެ.

ޖުމްލަ 16 މީހަކު މިހާތަނަށް ޕްރިމިއާ ލީގުން ކޮވިޑް-19ށް ޕޮޒިޓިވްވި ނަމަވެސް، މި މަހުގެ 17 ވަނަ ދުވަހު ޕްރިމިއާ ލީގު އަލުން ފަށަން ވަނީ ތާވަލުކޮށްފައެވެ.