ސްޕެނިޝް ލީގު އެނބުރި އައި މެޗުން ސެވިއްޔާއަށް މޮޅެއް

ކޮރޯނާވައިރަސް (ކޮވިޑް-19) އާ ގުޅިގެން މެދުކަނޑާލި ސްޕެނިޝް ލީގުގެ ކުޅުން ބުރާސްފަތި ދުވަހުގެރޭ އަލުން ފަށައި ކުޅުނު ފުރަތަމަ މެޗުން ސެވިއްޔާ މޮޅުވެއްޖެއެވެ.

ކޮވިޑް-19 އާ ގުޅިގެން ސްޕެނިޝް ލީގު މެދުކަނޑާލީ މާޗު މަހުގެ 10 ވަނަ ދުވަހެވެ. ބުރާސްފަތި ދުވަހުގެރޭ ސްޕެނިޝް ލީގުގެ ކުޅުން އަލުން ފެށިއިރު، މި ލީގަކީ ކޮވިޑް-19 އާ ގުޅިގެން މެދުކަނޑާލި ޔޫރަޕްގެ ގަދަ ފަސް ލީގުގެ ތެރެއިން ކުޅުން އަލުން ފެށި ދެވަނަ ލީގެވެ. މީގެ ކުރިން މެއި މަހުގެ 16 ވަނަ ދުވަހު ޖަރުމަން ލީގުގެ ކުޅުން ވަނީ ފަށާފައެވެ.

ސަޕޯޓަރުން ނުވައްދައި މެޗުތައް ކުޅޭ ގޮތަށް ސްޕެނިޝް ލީގުގެ ކުޅުން އަލުން ފެށިއިރު، ކުޅުނު ފުރަތަމަ މެޗުން ސެވިއްޔާ މޮޅުވީ ޑާބީ މެޗުގައި ރެއާލް ބެޓިސް އަތުން 2-0 ންނެވެ.

ސެވިއްޔާގެ ދަނޑުގައި ކުޅުނު މި މެޗުގެ ފުރަތަމަ ހާފުގައި ލަނޑެއް ނުފެނުނު ނަމަވެސް، ދެވަނަ ހާފު ފަށައިގެން 11 ވަނަ މިނެޓުގައި ސެވިއްޔާއިން ވަނީ ލީޑު ނަގާފައެވެ. ލިބުނު ޕެނަލްޓީއަކުން މި ލަނޑު ސެވިއްޔާއަށް ކާމިޔާބުކޮށްދިނީ ލޫކަސް އޮކަމްޕޮސްއެވެ. އަދި ސެވިއްޔާގެ ދެވަނަ ލަނޑު އޮކަމްޕޮސް ތަނަވަސްކޮށްދިން ފުރުސަތަކުން މެޗުގެ 62 ވަނަ މިނެޓުގައި ކާމިޔާބުކޮށްދިނީ ފެނާންޑޯއެވެ.

މި މޮޅާއެކު ސެވިއްޔާ އޮތީ 50 ޕޮއިންޓާއެކު ތާވަލުގެ ތިންވަނައިގައެވެ. އެ ޓީމަށްވުރެ އެއް މެޗު މަދުން ކުޅެގެން އެއްވަނައިގައި އޮތީ 58 ޕޮއިންޓާއެކު ބާސެލޯނާއެވެ. އަދި ދެވަނައިގައި 56 ޕޮއިންޓާއެކު އޮތީ ރެއާލް މެޑްރިޑެވެ. ސެވިއްޔާ އަތުން ބަލިވި ބެޓިސް އޮތީ 33 ޕޮއިންޓާއެކު ތާވަލުގެ 12 ވަނައިގައެވެ.