ޕްރިމިއާ ލީގުން އިތުރު މީހަކު ކޮރޯނާވައިރަހަށް ޕޮޒިޓިވް ވެއްޖެ

ހަތްވަނަ ބުރުގައި ކުރިއަށް ގެންދިޔަ ޓެސްޓުތަކުން އިނގިރޭސި ޕްރިމިއާ ލީގުން އިތުރު މީހަކު ކޮރޯނާވައިރަސް (ކޮވިޑް-19) ށް ޕޮޒިޓިވް ވެއްޖެ އެވެ.

މިހާތަނަށް ޕްރިމިއާ ލީގުގެ ކުޅުންތެރިންނާއި އޮފިޝަލުން ކޮވިޑް-19ށް ޓެސްޓު ކުރުމަށް ހަތް ބުރެއް ކުރިއަށް ގެންގޮސްފައިވާއިރު، ޖުމްލަ 7،487 ޓެސްޓު ވަނީ ކޮށްފައެވެ. އެއީ ފުރަތަމަ ބުރުގައި 748 މީހުންނާއި، ދެވަނަ ބުރުގައި 996 މީހުންނާއި، ތިންވަނަ ބުރުގައި 1،008 މީހުންނާއި، ހަތަރުވަނަ ބުރުގައި 1،130 މީހުންނާއި، ފަސްވަނަ ބުރުގައި 1،197 މީހުންނާއި ހަވަނަ ބުރުގައި 1،195 މީހުންގެ އިތުރުން ފަހުން ކުރިއަށް ގެންދިޔަ ހަތްވަނަ ބުރުގައި 1،213 މީހުންނެވެ.

އެގޮތުން ހަތްވަނަ ބުރުގައި ކުރިއަށް ގެންދިޔަ ޓެސްޓުތަކުން އިތުރު އެކަކު ވަނީ ކޮވިޑް-19ށް ޕޮޒިޓިވް ވެފައެވެ. އެކަމަކު އެމީހެއް ނަން ނުވަތަ އެމީހަކު ނިސްބަތްވާ ކްލަބެއް ހާމަކޮށްފައެއް ނުވެއެވެ.

މީގެ ކުރިން ކުރިއަށް ގެންދިޔަ ޓެސްޓުތަކުން ވަޓްފޯޑުގެ ޑިފެންޑަރު އޭޑްރިއަން ޕަރިއަޕާ އާއި، އެ ކްލަބުގެ ދެ އޮފިޝަލަކާއި، ބާންލީގެ އެސިސްޓަންޓް ކޯޗު އިއަން ވޯން އާއި، ބޯންމަތުގެ ގޯލްކީޕަރު އާރޮން ރާމްސްޑޭލް ވަނީ ވައިރަހަށް ޕޮޒިޓިވް ވެފައެވެ. އެކަމަކު ރާމްސްޑޭލް މިހާރު ވަނީ ވައިރަހުން ސަލާމަތް ވެފައެވެ. އަދި ޓޮޓެންހަމުން ވެސް ވަނީ އެ ކްލަބުގެ މީހަކު ކޮވިޑް-19ށް ޕޮޒިޓިވް ވެފައިވާކަން ހާމަކޮށްފައެވެ.

ޖުމްލަ 14 މީހަކު މިހާތަނަށް ޕްރިމިއާ ލީގުން ކޮވިޑް-19ށް ޕޮޒިޓިވްވި ނަމަވެސް، މި މަހުގެ 17 ވަނަ ދުވަހު ޕްރިމިއާ ލީގު އަލުން ފަށަން ވަނީ ތާވަލުކޮށްފައެވެ.