އިނގިރޭސި ދެވަނަ ޑިވިޝަން (އީއެފްއެލް ޗެމްޕިއަންޝިޕް) ގައި ވާދަކުރަމުން އަންނަ ސްޓޯކް ސިޓީގެ ކޯޗު މައިކަލް އޮނީލް ކޮރޯނާވައިރަހަށް ޕޮޒިޓިވް ވެއްޖެ އެވެ.

އީއެފްއެލްއިން އަންނަނީ ދެވަނަ ޑިވިޝަނާއި ތިންވަނަ ޑިވިޝަނުގެ އިތުރުން ހަތަރުވަނަ ޑިވިޝަނުގައި ވާދަކުރާ ކްލަބުތަކުގެ ހުރިހާ ކުޅުންތެރިންނާއި، އޮފިޝަލުން ކޮވިޑް-19ށް ޓެސްޓު ކުރަމުންނެވެ.

އެގޮތުން އެންމެ ފަހުން ކުރިއަށް ގެންދިޔަ ޓެސްޓުތަކުގައި އީއެފްއެލް ޗެމްޕިއަންޝިޕްގައި ވާދަކުރަމުން އަންނަ 24 ކްލަބުގެ ކުޅުންތެރިންނާއި އޮފިޝަލުން ޓެސްޓުކުރިއިރު، ސްޓޯކް ސިޓީން ވަނީ އެ ކްލަބުގެ ކޯޗު މައިކަލް އޮނީލް ކޮވިޑް-19ށް ޕޮޒިޓިވް ވިކަން ހާމަކޮށްފައެވެ.

އޮނީލް ކޮވިޑް-19ށް ޕޮޒިޓިވް ވިކަން ހާމަކުރީ، އިނގިރޭސި ޕްރިމިއަރ ލީގުގެ ކްލަބެއް ކަމަށްވާ މެންޗެސްޓަރ ޔުނައިޓެޑާ ދެކޮޅަށް އެކުވެރިކަމުގެ މެޗެއް ކުޅެން ހަމަޖެހިފައި ވަނިކޮށެވެ. އެއާއެކު ޔުނައިޓެޑުން ވަނީ އެ މެޗު ކެންސަލް ކޮށްފައެވެ.

ސްޓޯކް ސިޓީން ނެރުނު ބަޔާނެއްގައި ބުނީ އެ ކްލަބުގެ ކޯޗު އޮނީލް ކޮވިޑް-19ށް ޕޮޒިޓިވް ވުމުން، މިހާރު އޭނާ އައިސޮލޭޝަނަށް ބަދަލުކޮށްފައިވާ ކަމަށެވެ. އަދި ކޯޗު ވައިރަހުން ރަނގަޅުވަންދެން، ޓީމަށް އިރުޝާދު ދޭނީ އެސިސްޓަންޓް ކޯޗު ބިލީ މެކިންލީ ކަމަށް ވެސް ވަނީ ބުނެފައެވެ.

އީއެފްއެލް ޗެމްޕިއަންޝިޕުން މިހާތަނަށް 26 މީހަކު ކޮވިޑް-19ށް ޕޮޒިޓިވްވި އިރު، އިނގިރޭސި ޕްރިމިއަރ ލީގުން މިހާތަނަށް 13 މީހަކު ވަނީ ކޮވިޑް-19ށް ޕޮޒިޓިވް ވެފައެވެ.