ފަޓީ ގަތުމަށް ޔުނައިޓެޑުން މަސައްކަތް ކުރި

ބާސެލޯނާގެ ޒުވާން ތަރި އަންސޫ ފަޓީ ގަތުމަށް މެންޗެސްޓާ ޔުނައިޓެޑުން މަސައްކަތް ކުރި ކަމަށް ރިޕޯޓުތައް ބުނެފިއެވެ.

މިދިޔަ އަހަރުގެ ސެޕްޓެމްބަރު މަހު ބާސާގެ ސީނިއާ ޓީމުން ޖާގަ ހޯދި ފަޓީ އަންނަނީ އެ ޓީމުގައި މޮޅު ކުޅުމެއް ދައްކަމުންނެވެ. އެގޮތުން އޭނާ ބާސާއަށް ކުޅެދިން ފުރަތަމަ މެޗުގައި ލަނޑު ޖެހިއިރު، އޭނާ އަކީ ބާސާއަށް ލަނޑު ޖަހައިދިން އެންމެ ހަގު ކުޅުންތެރިޔާއެވެ. އަދި އޭނާއަކީ ސްޕެނިޝް ލީގުގެ ތާރީޚުގައި ލަނޑު ޖެހި ތިންވަނައަށް އެންމެ ހަގު ކުޅުންތެރިޔާއެވެ. އަދި ފަޓީ ވަނީ ޔުއެފާ ޗެމްޕިއަންސް ލީގުގައި ލަނޑު ޖެހި އެންމެ ހަގު ކުޅުންތެރިޔާގެ ރެކޯޑު ވެސް ގާއިމު ކޮށްފައެވެ.

ރިޕޯޓުތައް ބުނާ ގޮތުން މީގެ ކުރިން ޔުނައިޓެޑުން ވަނީ އުމުރުން 17 އަހަރުގެ ފަޓީ ގަތުމަށް 103 މިލިއަން ޔޫރޯ ހުށަހަޅާފައެވެ. ބާސާގެ ރައީސް ޖޯސެފް މާރިއާ ބާޓޮމެއޫ ވަނީ ފަޓީއަށް 100 މިލިއަން ޔޫރޯގެ ބިޑެއް ކްލަބަކުން ހުށަހެޅި ކަމަށާއި، އެކަމަކު ބާސާއިން އެ ހުށަހަޅުމަށް ނޫނެކޭ ބުނެފައިވާ ކަމަށް، އެ ކްލަބުގެ ބޯޑާ ހިއްސާކޮށްފައެވެ.

ފަޓީގެ އޭޖެންޓަކީ ކްރިސްޓިއާނޯ ރޮނާލްޑޯގެ ވެސް އޭޖެންޓު ޖޯޖް މެންޑޭޒްއެވެ. ރިޕޯޓުތައް ބުނާ ގޮތުން ބާސާ އާއެކު ފަޓީ ހަދާފައިވާ އެއްބަސްވުން އުވާލަން 170 މިލިއަން ޔޫރޯ ދައްކަން ޖެހެއެވެ.

ފަޓީގެ އިތުރުން ޔުނައިޓެޑުން މީގެ ކުރިން ވަނީ ބޮރޫޝިއާ ޑޯޓްމުންޑުގެ ފޯވާޑް ޖޭޑަން ސަންޗޯ ގަތުމަށްވެސް މަސައްކަތް ކޮށްފައެވެ. އެކަމަކު ސަންޗޯ ވިއްކާލަން ޑޯޓްމަންޑުން ކިޔާ އަގު ބޮޑުވުމުން ޔުނައިޓެޑުން ވަނީ އޭނާ ހޯދުމުގެ މަސައްކަތް މަޑުޖައްސާލާފައެވެ. ރިޕޯޓުތައް ބުނާ ގޮތުން ޔުނައިޓެޑުން މިހާރު ފާރަލަމުން އަންނަނީ އެސްޓަން ވިލާގެ ކެޕްޓަން ޖެކް ގްރީލިޝްއަށެވެ.

ކޮރޯނާވައިރަސް (ކޮވިޑް-19) އާ ގުޅިގެން ޔުނައިޓެޑަށް ވެސް މާލީ ދަތިތަކާ ކުރިމަތިލާން ޖެހިފައިވާއިރު، ކުރިއަށް އޮތް ހޫނު މޫސުމުގެ ޓްރާންސްފާ ބާޒާރުގައި ބޮޑު ޚަރަދެއް ނުކުރެވޭނެ ކަމަށް ޔުނައިޓެޑުގެ އެގްޒެކްޓިވް ވައިސް ޗެއާމަން އެޑް ވުޑްވާޑް މީގެ ކުރިން ވަނީ ވިދާޅުވެފައެވެ.