އޭނާގެ ހުވަފެނަކީ ބާސެލޯނާއަށް ކޯޗު ކޮށްދިނުންކަން އެންމެނަށް އިނގޭނެ ކަމަށް ނެދަލެންޑްސް ގައުމީ ޓީމުގެ ކޯޗު ރޮނާލްޑް ކޫމަން ބުނެފިއެވެ.
ޖެނުއަރީ މަހު ސްޕެނިޝް ސުޕަ ކަޕުން ބާސާ ކެޓުމާ އެކު އޭރު އެ ޓީމުގެ ކޯޗުކަމުގައި ހުރި އާނެސްޓޯ ވަލްވޭޑޭ ވަނީ ވަކިކޮށްފައެވެ. ވަލްވޭޑޭ ވަކިކުރުމަށް ފަހު ބާސާއިން ވަނީ ރެއާލް ބެޓިސްއަށް ކުރިން ކޯޗުކޮށްދިން ކީކޭ ސެޓިއެން ގެނެސްފައެވެ. އެކަމަކު ސެޓިއެންއާ އެ ޒިންމާ ހަވާލުކުރުމުގެ ކުރިން ބާސާއިން ވަނީ ކުރިން އެ ޓީމަށް ކުޅުނު ކޫމަންއަށް ވެސް އެ ޓީމުގެ ކޯޗުކަން ހުށަހަޅާފައެވެ. ނަމަވެސް އެ ފަހަރު އެ ހުށަހެޅުމަށް ކޫމަން ވަނީ ނޫނެކޭ ބުނެފައެވެ.
ދާދި ފަހުން ކޫމަން ބުނީ އޭނާގެ ހުވަފެނަކީ ބާސާއަށް ކޯޗު ކޮށްދިނުންކަން އެންމެނަށް އިނގޭނެ ކަމަށާއި ބާސާއިން ވަރަށް ފަހަކުން ވެސް އޭނާ އަށް ގުޅި ކަމަށެވެ. އެކަމަކު މިވަގުތު އޭނާގެ މަސްއޫލިއްޔަތަކީ ނެދަލެންޑްސް ފުޓްބޯޅަ ޓީމުގެ ކޯޗުކަން ކަމަށާއި، އެހެންވެ ބާސާއަށް މިވަގުތު ޖަވާބެއް ދޭން އުނދަގޫވި ކަމަށެވެ. އެކަމަކު އަންނަ އަހަރުގެ ޔޫރޯއަށްފަހު އެހެން ޓީމަކަށް ބަދަލުވުމުގެ ފުރުސަތު އޭނާގެ އެއްބަސްވުމުގައި އޮތް ނަމަވެސް، މި ދަނޑިވަޅުގައި އެކަމާ ދޭތެރޭ ނުވިސްނާ ކަމަށް ވެސް ކޫމަން ބުންޏެވެ.
އުމުރުން 56 އަހަރުގެ ކޫމަންއާ އެކު ނެދަލެންޑްސްއިން ހަދާފައިވާ އެއްބަސްވުން ހަމަވާނީ 2022 ވަނަ އަހަރުއެވެ. އެ އެއްބަސްވުމުގައިވާ މުއްދަތު ހަމަވުމުގެ ދެ އަހަރު ކުރިން ކޫމަން ބޭނުންވެއްޖެނަމަ މަގާމު ދޫކޮށްލުމުގެ އިހުތިޔާރު އޮވެއެވެ. އެކަމަކު އެކަން ކުރެވެނީ އޭނާ ދެން ހަވާލުވާ ޓީމަކުން އެއްބަސްވުން އުވާލަން ދައްކަންޖެހޭ ފީ ދެއްކުމުންނެވެ.
ނެދަލެންޑްސް ގައުމީ ޓީމާއެކު 1988 ވަނަ އަހަރުގެ ޔޫރޯ ކާމިޔާބުކުރި ކޫމަން ވަނީ ފުޓްބޯޅަ ކެރިއަރުގައި ބާސެލޯނާ އަށް ވެސް ކުޅެފައެވެ. އަދި އޭނާ ވަނީ ބާސެލޯނާގެ އެސިސްޓަންޓް ކޯޗެއްގެ ގޮތުގައި ވެސް މަސައްކަތްކޮށްފައެވެ. އޭގެ އިތުރުން، އިނގިރޭސި ޕްރިމިއަރ ލީގުގެ ސައުތްހޭމްޕްޓަންގައި ކޫމަން ކުރި މަސައްކަތަށް ގިނަ ބައެއްގެ ތައުރީފު ވަނީ ލިބިފައެވެ.
