ބާސެލޯނާ އަށް ބަދަލުވާން ނުވިސްނާ ކަމަށް ރެއާލް މެޑްރިޑަށް ކުޅެމުން އަންނަ ސްޕެއިންގެ މިޑްފިލްޑަރު އިސްކޯ ބުނެފި އެވެ.

އިސްކޯ ހޯދުމަށް ބާސާ އިން މަސައްކަތްކުރަމުން އަންނަ ދަނޑިވަޅެއްގައި އިސްކޯ އޭނާގެ ރަސްމީ ޓްވީޓާ އެކައުންޓުން ކުރި ޓުވީޓެއްގައި ބުނީ ބާސާ އަށް ބަދަލުވާން ނުވިސްނާ ކަމަށާއި، އެ ކްލަބަށް ބަދަލުވާން މަސައްކަތްކޮށްފައި ވެސް ނުވާނެ ކަމަށެވެ.

ބާސާ އަށް އިސްކޯ ބަދަލުވާން އުޅޭ ކަމަށް ރިޕޯޓްތައް ބުނަމުން އަންނައިރު، އޭނާ ހޯދުމަށް ބާސާ އިން 70 މިލިއަން ޕައުންޑު ހުށަހަޅާފައިވާ ކަމަށް ރިޕޯޓްތައް ވަނީ ބުނެފައެވެ.

ބާސާގެ ބައެއް ކުޅުންތެރިން ވެސް ވަނީ އިސްކޯ އެ ކްލަބަށް ބަދަލުވުމަށް އެދިފައެވެ. އެގޮތުން މީޑިއާއަށް މައުލޫމާތު ދެމުން ލުއިސް ސުއަރޭޒް އަދި އަންދްރޭސް އިނިއެސްޓާ ވަނީ އިސްކޯ އެ ކްލަބަށް ބަދަލުވުމަށް އެދޭ ކަމަށާއި، އޭނާއަކީ ވަރަށް ހުނަރުވެރި ކުޅުންތެރިޔެއް ކަމަށް ބުނެފައެވެ.

ބާސާގެ އިތުރުން މެންޗެސްޓާ ސިޓީ، ޓޮޓެންހަމް ހޮސްޓްސްޕާސް އަދި ތުރުކީގެ ފެނަބާޗޭއިން ވެސް އަންނަނީ އިސްކޯ ހޯދުމަށް މަސައްކަތްކުރަމުންނެވެ.

ވެލެންސިއާ އިން ކެރިޔަރު ފެށި އިސްކޯ ވަނީ މަލާގާ އަށް ވެސް ކުޅެފަ އެވެ. އެގޮތުން އޭނާ ވަނީ މަލާގާއާ އެކު ހޭދަކުރި ދެ ސީޒަނުގައި އެޓީމަށް ކުޅުނު 82 މެޗުގައި 17 ލަނޑު ކާމިޔާބުކޮށްފަ އެވެ. މަލާގާ ދޫކޮށްލުމަށް ފަހު އިސްކޯ ރެއާލްއާ ގުޅުނީ 2013 ވަނަ އަހަރެވެ.
އެގޮތުން އޭނާ ވަނީ އެ ކްލަބުގައި މިހާތަނަށް ހޭދަކުރި ހަތަރު ސީޒަނުގައި ކުޅުނު 181  މެޗުގައި 28 ލަނޑު ކާމިޔާބުކޮށް، ޔުއެފާ ޗެމްޕިއަންސް ލީގު ދެފަހަރު، ފީފާ ކްލަބް ވާރލްޑްކަޕް، ޔުއެފާ ސުޕާ ލީގު ދެފަހަރު އަދި ކޮޕާޑެލްރޭ ކާމިޔާބުކޮށްފަ އެވެ.
ކްލަބް ލެވެލްގައި ގިނަ ކާމިޔާބީތައް ހޯދާފައިވާ އިސްކޯ ވަނީ ސްޕެއިންގެ 21 އަހަރުން ދަށުގެ ޓީމާއެކު ޔޫރޯ ކާމިޔާބުކޮށްފަ އެވެ. މީގެ އިތުރުން އޭނާ ވަނީ 17 އަހަރުން ދަށުގެ ފީފާ ވާރލްޑްކަޕްގެ ތިންވަނަ ސްޕެއިންއާ އެކު ކާމިޔާބުކޮށްފަ އެވެ.