ކޮމެޓީއަށް ހާޒިރުނުކުރެވޭ އިދާރާތަކުގެ ބޭފުޅުން ސައްހަ ނޫން މައުލޫމާތު ހިއްސާކުރާ މައްސަލަ ރައްޔިތުންގެ މަޖިލީހުގެ ގައުމީ ތަރައްގީއާއި ތަރިކައިގެ ކޮމިޓީން ބަލަން ނިންމައިފިއެވެ.

ދޮގު މައުލޫމާތުދޭ މައްސަލަ ބެލުމަށް އެޖެންޑާ ކުރެވިފައިވަނީ އާދީއްތަ ދުވަހުގެ މެންދުރު 13:30 ގައެވެ.

މި މައްސަލަ ކޮމެޓީން އެޖެންޑާ ކޮށްފައިވާއިރު ދާދި ފަހުން ހައުސިންގް މިނިސްޓަރ އައިމިނަތު އާތިފާ ކޮމެޓީއަށް ދެއްވި ބައެއް މައުލޫމާތު ސައްހަ ނޫންކަން ވަނީ ހާމަވެފައެވެ. ބުރާސްފަތި ދުވަހު އޮތް ބައްދަލުވުމުގައި މިނިސްޓަރ ވިދާޅުވެފައިވަނީ ޖުލައި މަހުގެ ތެރޭގައި ހިޔާ މަޝްރޫއުގެ ފްލެޓުތައް، ހައްގުވެރިންނާއި ހަވާލުކުރެވޭނެ ކަމަށެވެ. އެހެންނަމަވެސް ފަހުން އެ މިނިސްޓްރީން ނެރުނު ބަޔާނެއްގައި ވަނީ މިނިސްޓަރ އަށް އެހެން ވިދާޅުވެވުނީ އޮޅުމަކުން ކަމަށް ވިދާޅުވެފައެވެ.

އެ ކޮމެޓީގެ މުގައްރިރު އަދި ބާރަށު ދާއިރާގެ މެމްބަރު އަހުމަދު އަބްދުﷲ ވިދާޅުވީ މި މައްސަލަ ކޮމެޓީއަށް އެޖެންޑާ ކުރެވުނީ ބައެއް އިދާރާތަކުން ކޮމެޓީއަށް މައުލޫމާތު ދިނުމަށްފަހު އެހެންތަންތަނުގައި އެހެން ގޮތްގޮތަށް މައުލޫމާތު ދެމުންދާތީ ކޮމެޓީގެ މެމްބަރުންގެ ކަންބޮޑުވުން ހުރުމުން ކަމަށެވެ. އަދި މި ބައްދަލުވުމުގައި މިކަންކަން ހައްލު ކުރުމާއި ގުޅޭގޮތުން މަޝްވަރާ ކުރެވޭނެ ކަމަށެވެ.

ވަޒީރުންނާ ސުވާލުކުރުމުގެ ގާނޫނުގެ ނުވަ ވަނަ މާއްދާގައިވާގޮތުން ވަޒީރަކާ ނޯޓިސް ދީގެން ކުރެވޭ ސުވާލަކަށް، ސުވާލުވެވޭ ވަޒީރު ޖަވާބު ނުދީފިނަމަ، ނުވަތަ ޖަވާބު ދިނުމުގައި ދޮގު މައުލޫމާތެއް ދީފިކަމަށް، ނުވަތަ ކަމެއް އޮޅުވާލައިފިކަމަށް މަޖިލީހުގެ މެންބަރަކަށް ފެނިއްޖެނަމަ، އެ ވަޒީރެއްގެ މައްޗަށް އިތުބާރު ނެތްކަމުގެ މައްސަލަ، މަޖިލީހަށް ހުށަހެޅިދާނެ ކަމަށް ވެއެވެ.

މަޖިލީހުގެ ކޮމިޓީތަކުން އަންގައިގެން ވަޑައިގަންނަވާ ބައެއް މުއައްސަސާތަކުގެ ބޭފުޅުން ސާފު ބަހުން ވާހަކަ ނުދައްކަވާ އިތުރުފުޅު ހައްދަވާ ކަމުގެ ޝަކުވާތަކެއް ލިބިވަޑައިގަންނަވާ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވަނީ މީގެކުރިން ވިދާޅުވެފައެވެ. އެމަނިކުފާނު ވިދާޅުވެފައިވަނީ މަޖިލީހުގައި ދޮގު ހެދުމަކީ ޖިނާއީ ކުށެއް ކަމަށާއި އެފަދަ ކަމެއް ކުރައްވާކަމަށް ޝައްކު ކުރެވިއްޖެ ނަމަ އެކަން ތަހުގީގުކޮށް ދައުވާ ކުރަން ޕްރޮސެކިއުޓާ ޖެނެރަލް (ޕީޖީ) އޮފީހަށް ފޮނުވާނެ ކަމަށެވެ.