ކޮރޯނާވައިރަސް (ކޮވިޑް-19) އާ ގުޅިގެން މެދުކަނޑާލި ޕޯޗުގީސް ޕްރިމިއާ ލީގުގެ ކުޅުން އަލުން ފަށައިފި އެވެ.

ކޮވިޑް-19 އާ ގުޅިގެން ޕޯޗުގަލް ލީގު މެދުކަނޑާލީ މާޗު މަހުގެ 12 ވަނަ ދުވަހު އެވެ. ލީގު އަލުން ފެށި މި މަހުން ފެށިގެން ކުޅިވަރު ހަރަކާތްތައް ފެށުމުގެ ހުއްދަ ޕޯޗުގަލްގެ ބޮޑު ވަޒީރު އެންޓޯނިއޯ ކޮސްޓާ ދެއްވުމާ ގުޅިގެންނެވެ.

ބުދަ ދުވަހުގެރޭ ލީގުގެ ކުޅުން އަލުން ފެށިއިރު، ލީގު ކުރިއަށްދަނީ ދަނޑަށް ސަޕޯޓަރުން ނުވައްދައި މެޗުތައް ކުޅޭ ގޮތަށެވެ.

ބުދަ ދުވަހުގެރޭ ކުޅުނު މެޗުގައި އެއްވަނައިގައި އޮތް ޕޯޓޯ ވަނީ ފަމަލިކޯ އަތުން 2-1 އިން ބަލިވެފައެވެ. ފަމަލިކޯގެ ދަނޑުގައި ކުޅުނު މި މެޗުގައި އެންމެ ފުރަތަމަ ލަނޑު ޖަހާ ލީޑު ނެގީ އެޓީމުންނެވެ. އެގޮތުން ދެވަނަ ހާފު ފަށައިގެން ތިންވަނަ މިނެޓުގައި ފަމަލިކޯ އަށް ލީޑު ނަގައިދިނީ ފަބިއޯ މާޓިންސް އެވެ.

އެކަމަކު މެޗުގެ 74 ވަނަ މިނެޓުގައި ޕޯޓޯ އިން ވަނީ ނަތީޖާ އެއްވަރުކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ ހެސުސް މެނުއެލް ކޮރޯނާ އެވެ. މެޗުގައި ފަމަލިކޯ އިން ދެވަނަ ފަހަރަށް ލީޑު ނެގީ މެޗުގެ 78 ވަނަ މިނެޓުގައެވެ. މި ލަނޑު އެޓީމަށް ކާމިޔާބުކޮށްދިނީ ޕެޑްރޯ ގޮންޒާލްވޭސް އެވެ.

މި މެޗުން ބަލިވި ނަމަވެސް، ޕޯޓޯ އެއްވަނައިގައި އޮތީ އެއް ޕޮއިންޓުގެ ފަރަގަކާއެކު އެވެ. ކުޅުނު 25 މެޗުން ޕޯޓޯ އަށް 60 ޕޮއިންޓު ލިބިފައިވާއިރު، ދެވަނައިގައި އޮތް ބެންފީކާ އަށް 24 މެޗުން ވަނީ 59 ޕޮއިންޓު ލިބިފައެވެ.

ޕޯޗުގަލް ލީގު އަލުން ފެށިއިރު، މީގެ ކުރިން ޖަރުމަން ލީގުގެ ކުޅުން ވަނީ މިދިޔަ މަހު އަލުން ފަށާފައެވެ. އަދި މި މަހުގެ ތެރޭގައި ޔޫރަޕްގެ ގިނަ ލީގުތަކެއްގެ ކުޅުން އަލުން ފެށުމަށް ވަނީ ތާވަލު ކޮށްފައެވެ.