ބްރެޒިލްގެ ޑިފެންޑަރު ޑޭވިޑް ލުއިޒްގެ އެއްބަސްވުން ކުރު މުއްދަތަކަށް އާސެނަލުން އާކުރާނެ ކަމަށް ލުއިޒްގެ އޭޖެންޓް ބުނެފި އެވެ.

ޗެލްސީ ދޫކޮށް ލުއިޒް އާސެނަލް އަށް ބަދަލުވީ 8 މިލިއަން ޕައުންޑުގެ އަގަކަށް މިދިޔަ އަހަރުގެ އޮގަސްޓް މަހުގެ ތެރޭގަ އެވެ. އޭރު މީޑިއާ ތަކުން ވަނީ ލުއިޒް އާސެނަލްއަށް ބަދަލުވީ ދެ އަހަރުގެ އެއްބަސްވުމެއްގެ ދަށުން ކަމަށް ރިޕޯޓު ކޮށްފަ އެވެ. އެކަމަކު ދާދި ފަހުން ސްކައި ސްޕޯޓްސް އިން ވަނީ ލުއިޒް އާސެނަލާއެކު ހެދީ އެއް އަހަރުގެ އެއްބަސްވުމެއް ކަމަށް ރިޕޯޓު ކޮށްފައެވެ.

އޮގަސްޓް މަހު ލުއިޒްގެ އެއްބަސްވުމުގެ މުއްދަތު ހަމަވާއިރު، ނޮވެލް ކޮރޯނާވައިރަސް (ކޮވިޑް-19) ގެ ސަބަބުން މި ސީޒަން ދިގުލައިގެންދާނެތީ، އާސެނަލުން ލުއިޒްގެ އެއްބަސްވުން މި ސީޒަން ނިމެންދެން އާކުރާނެ ކަމަށް އޭނާގެ އޭޖެންޓް ވަނީ ބުނެފަ އެވެ.

ލުއިޒްގެ އޭޖެންޓް އިތުރަށް ބުނީ މި ސީޒަން ނިމެންދެން އެއްބަސްވުން އާކުރާއިރު، އަންނަ ސީޒަނުގައި ލުއިޒް އާސެންލަގައި މަޑުކުރުމުގެ ފުރުސަތު ބޮޑު ކަމަށެވެ. މީގެ ކުރިން ލުއިޒް ވަނީ އާސެނަލްގައި މަޑުކުރަން ބޭނުންވާ ކަމަށް ބުނެފައެވެ. އެކަމަކު މީގެ ކުރިން މީޑިއާތަކުން ވަނީ އާސެނަލުން ލުއިޒް ދޫކޮށްލަން ނިންމާފައިވާ ކަމަށް ރިޕޯޓުކޮށްފަ އެވެ.

ބެންފީކާ އަށް ވެސް ކުޅުނު ލުއިޒް ވަނީ މީގެ ކުރިން ދެ ފަހަރެއްގެ މަތިން ޗެލްސީ އަށް ކުޅެފައެވެ. އަދި ވަނީ 2014 ން 2016 އަށް ޕީއެސްޖީ އަށް ވެސް ކުޅެފައެވެ. އާސެނަލަށް މިހާތަނަށް ލުއިޒް ވަނީ 32 މެޗު ކުޅެދީފަ އެވެ. އެކަމަކު އޭނާގެ ފަރާތުން މި ސީޒަނުގައި އެންމެ އެދެވޭ ކުޅުމެއް ފެނިފައެއް ނުވެެއެެވެ.

ލުއިޒްގެ ކާމިޔާބީތަކަށް ބަލާލާއިރު އޭނާ ވަނީ 2016/2017 ވަނަ އަހަރުގެ ސީޒަނުގައި ޗެލްސީ އާއެކު އިނގިރޭސި ޕްރިމިއަރ ލީގު ކާމިޔާބުކުރުމުގެ އިތުރުން 2011/2012 ވަނަ އަހަރުގެ ސީޒަންގެ ޔުއެފާ ޗެމްޕިއަންސް ލީގު ޗެލްސީ އާއެކު ކާމިޔާބުކޮށްފަ އެވެ. އަދި ޕީއެސްޖީ އާއެކު ފްރެންޗު ލީގު ދެ ފަހަރެއްގެ މަތިން ކާމިޔާބުކޮށްފަ އެވެ.

ބްރެޒިލް ގައުމީ ޓީމާއެކު 2013 ވަނަ އަހަރު ފީފާ ކޮންފެޑެރޭޝަންސް ކަޕް ކާމިޔާބު ކޮށްފައިވާ ލުއިޒް ވަނީ އެޓީމަށް މިހާތަނަށް 57 މެޗު ކުޅެދީފަ އެވެ.