ގައުމީ ބޮޑީބިލްޑިންގ ޗެމްޕިއަންޝިޕް މިއަހަރު ނުބޭއްވުމަށް ނިންމައިފި

މިއަހަރު ބޭއްވުމަށް ހަމަޖެހިފައި އޮތް 19 ވަނަ ގައުމީ ބޮޑީބިލްޑިންގ އެންޑް ފިޒީކް ސްޕޯޓްސް ޗެމްޕިއަންޝިޕް ނުބޭއްވުމަށް ނިންމައިފި އެވެ.

ބޮޑީބިލްޑިންގ އެސޯސިއޭޝަން އޮފް މޯލްޑިވްސް އިން ބުނީ ކޮރޯނާވައިރަސް (ކޮވިޑް-19) ގެ ސަބަބުން ދުނިޔޭގައި އާއި ރާއްޖޭގައި އެޅިފައިވާ އެކިއެކި ފިޔަވަޅުތަކާއި، ރާއްޖޭގައި ސިއްހީ ކުއްލި ނުރައްކަލުގެ ހާލަތު އިއުލާން ކުރެވިފައިވުމާއި ގުޅިގެން، އެ އެސޯސިއޭޝަންގެ ހިންގާ ކޮމިޓީގެ މަޝަވަރާ އާއި، ކުޅިވަރާ ބެހޭ ވަޒީރު އަހުމަދު މަހުލޫފްގެ ލަފާފުޅާއި އަދި އެ އެސޯސިއޭޝަންގެ އާންމު މެންބަރުންނާއި ކުރެވުނު މަޝްވަރާ އަށްފަހު، މި އަހަރު ބޭއްވުމަށް ހަމަޖެހިފައިވާ ގައުމީ ބޮޑީބިލްޑިންގ އެންޑް ފިޒީކް ސްޕޯޓްސް ޗެމްޕިއަންޝިޕް ނުބޭއްވުމަށް ނިންމާފައިވާ ކަމަށެވެ. އަދި މި މުބާރާތުގެ އިތުރަށް ގައުމީ ބޮޑީބިލްޑިންގ އެންޑް ފިޒީކް ސްޕޯޓްސް ޓީމަށް އެތުލީޓުން ހޮވުން އަންނަ އަހަރަށް ފަސްކުރުމަށް ވެސް ނިންމާފައިވާ ކަމަށް ބޮޑީބިލްޑިންގ އެސޯސިއޭޝަނުން ވަނީ ބުނެފައެވެ.

ކޮވިޑް-19 އާ ގުޅިގެން މިއަހަރު ނުބޭއްވުމަށް ނިންމި 19 ވަނަ ގައުމީ ބޮޑީބިލްޑިންގ އެންޑް ފިޒީކް ސްޕޯޓްސް ޗެމްޕިއަންޝިޕް ދެން ބާއްވާނީ އަންނަ އަހަރުގެ މާވު މަހުގެ 26 ވަނަ ދުވަހު އެވެ. އަދި ގައުމީ ބޮޑީބިލްޑިންގ އެންޑް ފިޒީކް ސްޕޯޓްސް ޓީމަށް އެތުލީޓުން ހޮވުމަށް ހަމަޖެހިފައިވަނީ އަންނަ އަހަރުގެ އޭޕްރީލް މަހުގެ ދެވަނަ ދުވަހު އެވެ.

ގައުމީ ބޮޑީބިލްޑިންގ މުބާރާތް މިއަހަރު ނުބޭއްވުމަށް ނިންމިއިރު، މީގެ ކުރިން ބޮޑީބިލްޑިންގ އެސޯސިއޭޝަނުން ވަނީ ރާއްޖޭގައި މިއަހަރު ބޭއްވުމަށް ހަމަޖެހިފައި އޮތް 54 ވަނަ އޭޝިއަން ބޮޑީބިލްޑިންގ އެންޑް ފިޒީކް ސްޕޯޓްސް ޗެމްޕިއަންޝިޕް އަންނަ އަހަރަށް ފަސްކޮށްފައެވެ. މީގެ ކުރިން މި މުބާރާތް ރާއްޖޭގައި ބޭއްވުމަށް ތާވަލުކޮށްފައި އޮތީ މިއަހަރުގެ ސެޕްޓެމްބަރު 5ން 11ށެވެ. އެކަމަކު މިހާރު މި މުބާރާތް ވަނީ އަންނަ އަހަރުގެ ސެޕްޓެމްބަރު 1ން 7ށް ތާވަލުކޮށްފައެވެ.