ސައުދީ އަރަބިއްޔާގެ ބައެއް މިސްކިތްތައް އާދީއްތަ ދުވަހު އާންމުންނަށް ހުޅުވާލަނީ

ދެމަސް ދުވަހުގެ މެދު ކެނޑުމަކަށް ފަހު ސައުދީ އަރަބިއްޔާގެ 90،000ށްވުރެ ގިނަ މިސްކިތްތައް ހުޅުވާލަން އެޤައުމުގެ ސަރުކާރުން ނިންމައިފި އެވެ.

މިކަން ހާމަކޮށް އެޤައުމުގެ މިނިސްޓްރީ އޮފް އިސްލާމިކް އެފެއަރޒް ކޯލް އެންޑް ގައިޑެންސް އިން ޢާންމު ކުރި ބަޔާނެއްގައި ބުނެފައި ވަނީ، މައި އަދި ކުދި މިސްކިތްތައް ހިމެނޭ ގޮތައް، މި މިސްކިތްތައް ހުޅުވާނީ އާދިއްތަ ދުވަހުގެ ފަތިސް ނަމާދަށް ކަމަށެވެ. އަދި ހުޅުވުމުގެ ކުރިން މިސްކިތްތައް ސާފުކޮށް ޑިސްއިންފެކްޓް ކުރާނެ ކަމަށެވެ. ހުޅުވަން ނިންމި މިސްކިތްތަކުގެ ތެރޭގައި މައްކާގެ އެއްވެސް މިސްކިތެއް ނުހިމެނެއެވެ. އެއީ މައްކާއަކީ އަދިވެސް އެންމެ ނުރައްކާ މިންވަރަށް ވައިރަސް ފެތުރެމުންދާ މައި ސިޓީއަކަށް ވާތީއެވެ.

މިސްކިތްތައް ހުޅުވާލަން ތައްޔާޜުވަމުން ދާއިރު، މީޑިއާ މެދުވެރިކޮށް ޢާންމުން ޢަމަލުކުރަން ޖެހޭ ބައިނަލްއަޤުވާމީ މިންގަޑުތަކާއި، އަދި މިސްކިތައް ޖަމާޢަތަށް ދިއުމުގައި ޢަމަލު ކުރަންޖެހޭ ޢާންމު އުޞޫލުތަކަށް ޢާންމުން ހޭލުންތެރި ކުރުވުމުގެ ކެމްޕޭނެއް މިހާރުވަނީ ފަށާފައެވެ.

މިސްކިތްތައް ހުޅުވާލި ނަމަވެސް، ޢާންމުން ޢަމަލު ކުރަން ޖެހޭ އުޞޫލުތަކެއް ވަނީ ކަނޑައަޅާފަ އެވެ. އޭގައި ވާގޮތުން މިސްކިތައް ދިއުމުގެ ކުރިން ގޭގައި ވުޟޫކޮށް، މިސްކިތައް ދިމުގެ ކުރިންނާއި ގެއަށް އަނބުރާ އައުމަށް ފަހު، އަތްދޮވެ ސެނިޓައިޒްކުރުން ހިމެނެއެވެ. މީގެ އިތުރުން، އުމުރުން ދުވަސްވީ މީހުންނާއި، ދިގު މުއްދަތަކައް ބަލިތަކަށް ފަރުވާ ހޯދަމުން އަންނަ މީހުން ގޭގައި ނަމާދު ކުރުމަށް ވަނީ އަންގާފައެެވެ. އަދި މިސްކިތައް ޖަމާޢަތުގައި ނާމަދަށް ދާ މީހުން މިސްކިތުގައި ޤުރުއާން ކިޔަވަން ބޭނުންވާނަމަ އަމިއްލައަށް ގެއިން ޤުރުއާނެއް ހިފައިގެން ދިއުމަށާއި، ނޫނީ އިލެކްޓްރޯނިކް ވަޞީލަތެއް ނުވަތަ އަމިއްލަ ފޯނުން ޤުރުއާން ކިޔެވުމަށް ވަނީ އަންގާފަ އެވެ. އަދި ދެ ނަމާދު ދޭތެރޭގައި މިސްކިތުގައި މަޑުކުރާނަމަ، އެ ހޭދަކުރާ ވަގުތުގައި ދެމީހުން ދޭތެރޭގައި ދެ ފޫޓުގެ ދުރުމިނެއް ބަހައްޓަންވެސް އުޞޫލުގައި ވެއެވެ.

އުމުރުން ދުވަސްވީ މީހުން މިސްކިތައް ދިއުން މަނާކުރި ނަމަވެސް އުމުރުން 15 އަހަރުން ދަށުގެ ކުދިންނަށް މިސްކިތައް ދިއުން ހުއްދަ އެވެ. އެހެންނަމަވެސް މިސްކިތައް ދާއިރު މާސްކް އެޅުމާއި، ސަލާމް ނުކުރުމަށާއި، މިސްކިތުގެ ފާރާއި، ގޭޓުފަދަ ތަންތާގައި އަތްނުލުމަށާއި، މިސްކިތުގައި ބަހައްޓާފައި ހުންނަ މުޞްހަފާއި، ދީނީ ފޮތްތައް ބޭނުން ނުކުރުމަށްވެސް އުޞޫލުގައި ވެއެވެ.

ސައުދީ ސަރުކާރުން މިސްކިތްތައް ހުޅުވާލަން ތައްޔާރު ވަމުން ދާއިރު، 10 މިލިއަން މިސްކިތް ސާފުކޮށް ޑިސްއިންފެކްޓް ކުރުމުގެ މަސައްކަތް ދަނީ ކުރަމުންނެވެ. އަދި އެކި ސައިޒުގެ ޤުރުއާނުގެ 43 މިލިއަން މުޞްޙަފާއި، އަދި ޤުރުއާން ރައްކާތެރިކަމާއެކު ބަހައްޓާ 600،000ށް ވުރެ ގިނަ އަލަމާރި ސާފުކުރުމުގެ މަސައްކަތްވެސް ދަނީ ކުރަމުންނެވެ.