ޖަރުމަންގެ ބޮރޫޝިއާ ޑޯޓްމުންޑަށް ކުޅެމުން އަންނަ ނޯވޭގެ ޒުވާން ފޯވާޑް އާލިން ހާލަންޑުގެ ކަކުލަށް އަނިޔާވެއްޖެ އެވެ.

ހާލަންޑަށް އަނިޔާވީ ޖަރުމަން ލީގުގައި އަންގާރަ ދުވަހުގެރޭ ބަޔާން މިއުނިކް އަތުން 1-0 ން ޑޯޓްމުންޑް ބަލިވި މެޗުގައެވެ. އެ މެޗު ނިމެން 20 މިނެޓަށް ވެފައި ވަނިކޮށް ހާލަންޑް އަނިޔާގެ ސަބަބުން ވަނީ ބަދަލުކޮށްފައެވެ.

ޑޯޓްމުންޑުގެ ކޯޗު ލޫޝިއެން ފާވްރޭ ބުނީ މެޗަށްފަހު ހެދި ޓެސްޓުތަކުން ހާލަންޑުގެ ކަކުލަށް އަނިޔާވެފައިވާ ކަން އެނގުނު ކަމަށެވެ. އެ އަނިޔާގެ ތަފްސީލު އަދި ނޭނގުނު ނަމަވެސް، ހާލަންޑުގެ އަނިޔާ ސީރިއަސް ނޫން ކަމަށް އޭނާ ވަނީ ބުނެފައެވެ.

ޖަރުމަން ލީގުގައި އަންގާރަ ދުވަހުގެރޭ ކުޅުނު މެޗުން އެއްވަނައިގައި އޮތް ބަޔާން އަތުން ބަލިވެ، ޑޯޓްމުންޑާއި ބަޔާންގެ ފަރަގު ވަނީ ހަތް ޕޮއިންޓަށް ފުޅާވެފައެވެ. ލީގުގައި ދެ ޓީމަށްވެސް ބާކީ އޮތީ 10 މެޗެވެ.

މިދިޔަ ޖެނުއަރީ މަހު ސާލްޒްބާގުން ޑޯޓްމުންޑަށް ބަދަލުވި ހާލަންޑު އަންނަނީ އެޓީމުގައި މޮޅު ކުޅުމެއް ދައްކަމުންނެވެ. އެގޮތުން ޑޯޓްމުންޑް ޖާޒީގައި ހާލަންޑު މިހާތަނަށް ކުޅުނު 14 މެޗުގައި ވަނީ 13 ލަނޑު ޖަހާފައެވެ.

އުމުރުން 19 އަހަރުގެ ހާލަންޑު 2024 ގެ ނިޔަލަށް ޑޯޓްމުންޑާ އެކު އެއްބަސްވުން ހެދިއިރު، އޭނާ ވަނީ ޖަރުމަން ލީގުގައި ވެސް ރެކޯޑެއް ހަދާފައެވެ. އެގޮތުން އޭނާ ވެފައިވަނީ ޖަރުމަން ފުޓްބޯޅަ ތާރީޚުގައި ފުރަތަމަ ދެ މެޗުގައި ފަސް ލަނޑު ޖެހި ފުރަތަމަ ކުޅުންތެރިޔާ އަށެވެ.