ބްރޯޑްކޮމް އިން ބަލައިގަންނަ ފީތަކުގެ ސުންގަޑިއަށް ބަދަލު ގެނެސްފި
ފީތައް ބަލައިގަންނަ އެންމެފަހުގެ ތާރީޚަކީ އެ އަހަރެއްގެ މާރިޗު މަހުގެ 31 ވަނަ ދުވަސް
މޯލްޑިވްސް ބްރޯޑްކާސްޓިން ކޮމިޝަން ހުންނަ ބިއްލޫރުޖެހިގެ - ފީތައް ދައްކާ ދުވަހަށް ބަދަލު ގެނައީ ލޮކްޑައުންއާއި ގުޅިގެން
މޯލްޑިވްސް ބްރޯޑްކާސްޓިންގ ކޮމިޝަނުން ބަލައިގަންނަ ފީތައް ދެއްކުމުގެ ސުންގަޑިއަށް ބަދަލު ގެނެސްފިއެވެ.
ބްރޯޑްކޮމް އިން ބުނީ އެ ކޮމިޝަނުން ދޫކޮށްފައިވާ ބްރޯޑްކާސްޓިންގ އާއި ރީބްރޯޑްކާސްޓިންގ އަދި ފްރީކުއެންސީ ލައިސަންސްގެ އަހަރީ ފީގެ ގޮތުގައި ކޮމިޝަނަށް ދައްކަންޖެހޭ ފީތައް ބަލައިގަތުމަށް ކޮންމެ އަހަރަކު ވެސް ހަމަޖައްސާފައިވާ އެންމެފަހުގެ ތާރީޚަކީ އެ އަހަރެއްގެ މާރިޗު މަހުގެ 31 ވަނަ ދުވަހުގެ ނިޔަލަށް ކަމަށެވެ. އަދި ކޮވިޑް-19 އާ ގުޅިގެން އިޢުލާނު ކޮށްފައިވާ ސިއްޙީ ކުއްލި ނުރައްކަލުގެ ޙާލަތުގައި، މި ދުވަސްވަރު އަޅާފައިވާ އެކި ފިޔަވަޅުތަކުގެ ސަބަބުން، ކޮމިޝަނަށް ދައްކަންޖެހޭ ފައިސާ ދެއްކުމުގައި ދިމާވެދާނެ ދަތިތަކެއް ހުރެދާނެކަމަށް ޤަބޫލުކުރެވޭތީ، ލައިސަންސް ލިބިފައިވާ ފަރާތްތަކުން ކޮމިޝަނަށް ދައްކަންޖެހޭ 2020 ވަނަ އަހަރުގެ އަހަރީ ފީ ޖޫރިމަނާއަކާނުލައި ބަލައިގަންނާނީ މި މަހުގެ ނިޔަލަށް ކަމަށް ކުރިން ވަނީ ބުނެފައެވެ.
ނަމަވެސް، ރާއްޖޭގެ ކޮވިޑް-19 ގެ ޙާލަތާ ގުޅިގެން، މާލެ ސިޓީ ލޮކްޑައުން ކޮށްފައިވާ މުއްދަތު މެއި މަހުގެ 28 ގެ ނިޔަލަށް އިތުރުކޮށްފައިވުމުގެ ސަބަބުން ދައުލަތުގެ އިދާރާތައް އިތުރަށް ބަންދުކުރަން ޖެހިފައިވުމާއެކު، ލައިސަންސް ލިބިފައިވާ ފަރާތްތަކުން ކޮމިޝަނަށް ދައްކަންޖެހޭ 2020 ވަނަ އަހަރުގެ އަހަރީ ފީ ދެއްކުމުގެ މުއްދަތު އިތުރުކޮށް، ފީތައް ޖޫރިމަނާއަކާނުލާ ބަލައިގަތުމަށް މިހާރު ހަމަޖައްސާފައިވާ އެންމެ ފަހުގެ ތާރީޚަކީ 30 ޖޫން ކަމަށެވެ.
ބްރޯޑްކޮމްއިން ބުނީ މިހާރު ކުރިމަތި ވެފައިވާ ޙާލަތާ ގުޅިގެން ސުންގަޑިއަށް އެއްވެސް ބަދަލެއް ގެންނަން ޖެހިއްޖެނަމަ އެކަން އަލުން އިޢުލާނުކުރާނެ ކަމަށެވެ.
