ހަލް ސިޓީ އެފްސީން ދެ މީހަކު ކޮރޯނާވައިރަހަށް ޕޮޒިޓިވް ވެއްޖެ

އިނގިރޭސި ދެވަނަ ޑިވިޝަން (އީއެފްއެލް ޗެމްޕިއަންޝިޕް) ގައި ވާދަކުރަމުން އަންނަ ހަލް ސިޓީގެ ދެ މީހަކު ކޮރޯނާވައިރަސް (ކޮވިޑް-19) ށް ޕޮޒިޓިވް ވެއްޖެ އެވެ.

އީއެފްއެލް ޗެމްޕިއަންޝިޕުން ވަނީ ލީގުގައި ވާދަކުރާ 24 ކްލަބުގެ ހުރިހާ ކުޅުންތެރިންނާއި އޮފިޝަލުން ކޮވިޑް-19ށް ޓެސްޓު ކޮށްފައެވެ. އެގޮތުން 1،014 މީހަކު ޓެސްޓު ކުރިއިރު، ދެ މީހަކު ވަނީ ޕޮޒިޓިވް ވެފައެވެ.

އެއާއެކު ހަލް ސިޓީން ނެރުނު ބަޔާނެއްގައި ވަނީ އީއެފްއެލް ޗެމްޕިއަންޝިޕުން ޕޮޒިޓިވްވީ އެ ކްލަބުގެ ދެ މީހުން ކަން ހާމަކޮށްފައެވެ. އެ ކަމަކު އެ ކްލަބުން އެއީ ކޮން ބައެއްކަން ހާމަކޮށްފައެއް ނުވެއެވެ.

ހަލް ސިޓީގެ ބަޔާނުގައި ބުނެފައިވަނީ ކޮވިޑް-19ށް ޕޮޒިޓިވްވި އެ ކްލަބުގެ ދެ މީހުން ހާލު ރަނގަޅު ކަމަށާއި، އެ މީހުންވެސް ވައިރަހަށް ޕޮޒިޓިވްވި ނަމަވެސް، އެ ދެ މީހުންގެ ހަށިގަނޑުންވެސް އެއްވެސް އަލާމާތެއް ފެނިފައި ނުވާ ކަމަށެވެ. އަދި މިހާރު އެ ދެ މީހުން އައިސޮލޭޝަނަށް ބަދަލުކޮށްފައިވާ ކަމަށް ވަނީ ބުނެފައެވެ.

އީއެފްއެލް ޗެމްޕިއަންޝިޕުން ދެ މީހަކު ކޮވިޑް-19ށް ޕޮޒިޓިވް ވިއިރު، އިނގިރޭސި ޕްރިމިއާ ލީގުން މިހާތަނަށް 8 މީހަކު ވަނީ ވައިރަހަށް ޕޮޒިޓިވް ވެފައެވެ. އެ ގޮތުން ދެ ފަހަރެއްގެ މަތިން ޓެސްޓުތައް ކުރިއަށް ގެންދިޔައިރު، ފުރަތަމަ ބުރުގައި 748 މީހަކު ވަނީ ޓެސްޓު ކޮށްފައެވެ. އަދި ދެވަނަ ބުރުގައި 996 މީހަކު ޓެސްޓު ކުރިއެވެ.