ނެޝަނަލް ބާސްކެޓްބޯލް އެސޯސިއޭޝަން (އެންބީއޭ) ގެ ލެޖެންޑް ޖެމެއިކާގެ ޕެޓްރިކް އެވިންގް ކޮރޯނާވައިރަސް (ކޮވިޑް-19) ށް ޕޮޒިޓިވް ވެއްޖެ އެވެ.
ދަ ނިއު ޔޯކް ނިކްސް އަށް 17 ސީޒަން ކުޅެދީފައިވާ އެވިންގް މިހާރު އަންނަނީ ޖޯޖްޓައުން ޔުނިވާސިޓީގެ ފިރިހެން ޓީމަށް ކޯޗުކަން ކޮށްދެމުންނެވެ. 11 އޯލް-ސްޓާ މެޗު ކުޅެފައިވާ އެވިންގް ވަނީ ދެ ފަހަރެއްގެ މަތިން އޮލިމްޕިކްސްގެ ރަން މެޑަލް ހޯދާފައެވެ.
އުމުރުން މިހާރު 57 އަހަރުގެ އެވިންގް ކުރި ޓްވީޓެއްގައި ވަނީ އޭނާ ކޮވިޑް-19ށް ޕޮޒިޓިވްވެފައިވާ ކަން ހާމަކޮށްފައެވެ. އެވިންގް ބުނީ މި ވައިރަހާ ދޭތެރޭ ވަރަށް ސީރިއަސް ކޮށް ކަންކަން ބަލަހައްޓަން ޖެހޭ ކަމަށާއި، އެންމެންވެސް އަމިއްލަ ސަލާމަތަށް އަޅަންޖެހޭ ފިޔަވަޅުތައް އެޅުމަށް އެދޭ ކަމަށެވެ.
އެވިންގް ވަނީ އޭނާ މިހާރު ހޮސްޕިޓަލެއްގައި ސްލެފް-އައިސޮލޭޓް ވަމުން އަންނަ ކަމަށް ބުނެފައެވެ. އަދި ވަނީ ޖޯޖްޓައުން ޔުނިވާސިޓީގެ ފިރިހެން ޓީމުން ކޮވިޑް-19ށް ޕޮޒިޓިވްވީ އޭނާ އެކަނިކަން ހާމަކޮށްފައެވެ.
1985 ވަނަ އަހަރު އެންބީއޭ އަށް ޑްރާފްޓްވި އެވިންގް ކުޅުން ހުއްޓާލާފައިވަނީ 2003 ވަނަ އަހަރު އެވެ. އޭނާ ވަނީ ދަ ނިއު ޔޯކް ނިކްސް އަށް 1،039 މެޗު ކުޅެދީފައެވެ.
