އޮންލައިންކޮށް އުފަންދުވަހުގެ ސެޓްފިކެޓް ހެދޭގޮތަށް ހަމަޖައްސައިފި
22 މެއި 2020 | ހުކުރު 21:08ސެޓްފިކެޓް ބޭނުން ކުރެވޭނީ ލޮކްޑައުންގެ ހާލަތު އުވާލަންދެން
މާލެ ސިޓީ ކައުންސިލްގެ މޭޔަރު ޝިފާ މުހައްމަދު، އާއި ޑެޕިއުޓި މޭޔަރު ޝަމާއު ޝަރީފް
ލޮކްޑައުންގައި އުފަންދުވަހުގެ ސެޓްފިކެޓް ހެއްދުމަށް އޮންލައިންކޮށް ހުށަހެޅުމުގެ ފުރުސަތު ހުޅުވާލައިފި އެވެ.
މާލޭ ސިޓީ ކައުންސިލުން ބުނީ ކޮވިޑް-19 އާ ގުޅިގެން މާލެ ސިޓީ ލޮކްޑަައުން ކުރެވި ސަރުކާރުގެ އެންމެހާ އޮފީސްތައް ބަންދުކުރެވިފައިވާތީ މާލޭ ސިޓީގެ ލޮކްޑައުން އުވާލަންދެން މާލޭ ސިޓީގައި އުފަންވާ ކުދިންގެ އުފަންދުވަހުގެ ސެޓްފިކެޓް ހެއްދުމަށް ބޭނުންވާ ފަރާތްތަކުން އުފަންދުވަހުގެ ސެޓްފިކެޓް ހެއްދުމަށް ކައުންސިލްގެ ވެބްސައިޓް www.malecity.gov.mv މެދުވެރިކޮށް ހުޅުވާލެވިފައިވާ ކަމަށެވެ.
ވެބްސައިޓް މެދުވެރިކޮށް ހުށަހަޅާ ފަރާތްތަކަށް ދޫކުރާ ވަގުތީ ސެޓްފިކެޓް ބޭނުން ކުރެވޭނީ މާލޭ ސިޓީ ލޮކްޑައުންގެ ހާލަތު އުވާލަންދެނެވެ. އަދި ދާއިމީ (އަސްލު) ސެޓްފިކެޓް ލިބޭނީ އުފަންދުވަހުގެ ސެޓްފިކެޓް ހެއްދުމަށް ހުށަހަޅާ ފޯމާއި އެކު ހުށަހަޅަންޖެހޭ ލިޔެކިޔުންތަކުގެ އަސްލާއި ވަގުތީ ގޮތުން ދޫކޮށްފައިވާ ސެޓްފިކެޓް ކައުންސިލަށް ހުށަހެޅުމުން ކަމަށް މާލޭ ސިޓީ ކައުންސިލުން ބުންޏެވެ.
މާލެ ލޮކްޑައުން ކުރުމާއި ގުޅިގެން، ބައެއް ކަންކަމަށް އޮންލައިންކޮށް އެދިގެން ހިދުމަތް ފޯރުކޮށްދިނުމުގެ މަސައްކަތް ސަރުކާރުގެ އިދާރާތަކުން އަންނަނީ ކުރަމުންނެވެ.
