މަނަދޫ ކަރަންޓުގެ މައްސަލަ ހައްލު ކޮށްފި

ނ. މަނަދުއަށް ދިމާވި ކަރަންޓުގެ މައްސަލަ ހައްލު ކޮށްފި އެވެ.

އެރަށަށް ކަރަންޓުގެ މައްސަލަ ދިމާވިތާ ހަފުތާއަކަށްވުރެ ގިނަ ދުވަސް ވެއްޖެ އެވެ. ކަރަންޓަށް ދިމާވި މައްސަލަ ހައްލު ނުވެ އުޅެނިކޮށް އެރަށުން ކޮވިޑް-19ށް ބަޔަކު ޕޮޒިޓިވް ވިއެވެ. އަދި ވިއްސާރައިގެ ސަބަބުން އެ މައްސަލަ ހައްލު ނުވެ ދިގުލައިގެން ދިޔައެވެ.

މަނަދޫގެ ކަރަންޓުގެ މައްސަލަ ހައްލުކޮށް އެކަމާއި ގުޅިގެން ފެނަކަ ކޯޕަރޭޝަންގެ މެނޭޖިންގ ޑިރެކްޓަރ އަހުމަދު ސައީދު މުހައްމަދު ކުރެއްވި ޓްވީޓެއްގައި ވިދާޅުވީ މަނަދޫ ކަރަންޓް ނެޓްވަރކަށް ދިމާވި މައްސަލަ ދަތި އުނދަގޫތަކާ އެކުވެސް ﷲ ގެ ވާގިފުޅާއެކު ހައްލުކޮށް މުޅި ރަށަށް ކަރަންޓް ފޯރުދެވިއްޖެ ކަމަށެވެ. މިކަމާއި ގުޅިގެން ސައީދު ވަނީ މައްސަލަ ހައްލުކުރުމަށް ފެނަކަ މުވައްޒަފުން ކުރި މަސައްކަތް ފާހަގަ ކުރައްވާފަ އެވެ.

މަނަދޫ ކައުންސިލްގެ ރައީސް މީގެ ކުރިން ރާއްޖެއެމްވީ އަށް މައުލޫމާތު ދެއްވަމުން ވިދާޅުވެފައި ވަނީ ކަރަންޓް މައްސަލަ ދިމާވީ ކޭބަލަކަށް ކަމަށެވެ. އަދި އެކަން ވަގުތީ ގޮތުން ހައްލު ކުރި ނަމަވެސް އެކަށީގެންވާ ވަރަކަށް ކަރަންޓް ފޯރުކޮށް ނުދެވޭ ކަމަށެވެ.

މަނަދޫ ކަރަންޓްގެ މައްސަލަ ހައްލުކޮށްފައި ވަނީ އަލުން ކޭބަލްއެއް އަޅައިގެންނެވެ. އަދި ވިއްސާރަވުމުގެ ސަބަބުން މަސައްކަތް ކުރުމުގައި ދަތިތަކެއް ދިމާވެފައި ވެއެވެ.