ބަންގުލަދޭޝްގެ އިތުރު 200 މީހުން ގައުމަށް އަނބުރާ ފުރުވާލަން ނިންމައިފި
ބަންގުލަދޭޝަށް މީހުން ފުރުވާލުމަށް ދެ ފުލައިޓެއް ދަތުރުކުރި؛ ދަތުރުކުރަން ހަމަޖެހުނު 15 މީހަކަށް ނުފުރުނު
މޯލްޑިވިއަންގެ ފުލައިޓުން ބަޔަކު ފައިބައިގެން އަންނަނީ؛ ބަންގުލަދޭޝަށް މީހުން އަނބުރާ ފޮނުވާލަން ނިންމަފައިވަނީ މޯލްޑިވިއަންގެ ފުލައިޓްގައި
ބަންގްލަދޭޝްގެ އިތުރު 200 މީހުން މޯލްޑިވިއަންގެ ފްލައިޓެއްގައި ހޯމަ ދުވަހު ފުރުވާލަން ނިންމައިފި އެވެ.
އާދީއްތަ ދުވަހު ނޭޝަނަލް އިމަޖެންސީ އޮޕަރޭޝަންސް ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި އެ ސެންޓަރުގެ ތަރުޖަމާނު މަބްރޫކް އަޒީޒު ވިދާޅުވީ ބަންގުލަދޭޝް މީހުން ފުރުވާލުމަށް މޯލްޑިވިއަންގެ ފުލައިޓެއް ހަމަޖައްސާފައިވާ ކަމަށެވެ.
މަބްރޫކު ވިދާޅުވީ ބަންގުލަދޭޝަށް މީހުން ފުރުވާލުމަށް ދެ ފުލައިޓެއް ދަތުރުކުރި ކަމަށާއި ދަތުރުކުރަން ހަމަޖެހުނު 15 މީހަކަށް ނުފުރުނު ކަމަށެވެ. އެއީ އެމީހުންގެ ޑޮކިއުމެންޓޭޝަނުގެ މައްސަލަތަކެއް ހުރީމަ ކަމަށް މަބްރޫކް ވިދާޅުވި އެވެ.
ގަވައިދާ ހިލާފަށް އުޅޭ ބަންގުލަދޭޝް މީހުން އަނބުރާ ގައުމަށް ފޮނުވާލުމުގެ މަސައްކަތުގެ ތެރެއިން އާދިއްތަ ދުވަހު ވެސް ވަނީ 67 މީހަކު ފުރުވާލާފަ އެވެ. އެމީހުން ފުރުވާލާފައިވަނީ ރާއްޖެއަށް ކާގޯ ހިފައިގެން އައި ބަންގްލަދޭޝްގެ އެއާފޯސް ފުލައިޓުގަ އެވެ.
މީގެ އިތުރުން ހޮނިހިރު ދުވަހު ވެސް ބަންގުލަދޭޝްގެ 353 އަނބުރާ ގައުމަށް ފޮނުވާލާފައި ވެއެވެ. އެމީހުން ފޮނުވާލާފައިވަނީ ރާއްޖެއަށް ކާނާއާއި މެޑިކަލް ސާމާނު ހިފައިގެން ދިވެހި ސަރުކާރުން ޗާޓަރުކޮށްގެން އައި ބަންގުލަދޭޝްގެ ގައުމީ އެއާލައިން، ބިމާންގެ ފްލައިޓުގަ އެވެ.
