މެންބަރު ރިޔާޒް މާލެ ވަޑައިގެންނެވި މައްސަލަ ސުލޫކީ ކޮމިޓީން ދަނީ ބަލަމުން: މެންބަރު ޔާސިރު
12 މެއި 2020 | އަންގާރަ 11:35މި މައްސަލައާޢި ގުޅިގެން ކަމާއި ބެހޭ އިދާރާތަކުން ހޯދަންޖެހޭ މައުލޫމާތު ހޯދާފައިވާ ކަމަށް ވިދާޅުވި
ތިމަރަފުށީ ދާއިރާގެ މްނެބަރު އަބްދުﷲ ރިޔާޒް
ކޮވިޑް-19 އާއި ގުޅިގެން މުޅި ރާއްޖެ ލޮކްޑައުން ކޮށް އެއް ރަށުން އަނެއް ރަށަށް މީހުން ދަތުރުކުރުން މަނާކޮށްފައި ވަނިކޮށް، ތިމަރަފުށީ ދާއިރާގެ މެންބަރު އަބްދުﷲ ރިޔާޒު މާލެ ވަޑައިގެންނެވި މައްސަލަ ރައްޔިތުންގެ މަޖިލީހުގެ އިމްތިޔާޒު އަދި ސުލޫކީ ކޮމިޓީން ބަލަމުންދާ ކަމަށް އެ ކޮމިޓީގެ މުޤައްރިރު ކުޅުދުއްފުށީ އުތުރު ދާއިރާގެ މެންބަރު ޔާސިރު އަބްދުލް ލަތީފް ވިދާޅުވެއްޖެ އެވެ.
ރާއްޖެ އެމްވީއަށް މައުލޫމާތު ދެއްވަމުން ޔާސިރު ވިދާޅުވީ މަޖިލީހުގެ މެންބަރެއްގެ މައްސަލަ ހުށަހެޅިއްޖެ ނަމަ ކޮމިޓީގެ މެންޑޭޓްގެ ތެރެއިން އެކަން ބަލަން ޖެހޭ ކަމަށާއި އެގޮތުން އަބްދުﷲ ރިޔާޒްގެ ސުލޫކީ މައްސަލައެއް ހުށަހެޅިފައި އޮތުމުން އެ މައްސަލަ ކޮމިޓީން ބަލަމުންގެންދާ ކަމަށެވެ.
އެގޮތުން މި މައްސަލައާއި ގުޅިގެން ކަމާބޭހޭ އިދާރާތަކުން މިހާތަނަށް ހޯދަން ޖެހޭ މައުލޫމާތު ހޯދާފައިވާ ކަމަށާއި، މި މައްސަލައިގައި ކޮމިޓީގެ އިތުރު ބައްދަލުވުމެއް ބުދަ ދުވަހު ބޭއްވުމަށް ތާވަލު ކޮށްފައިވާ ކަަމަށެވެ.
މެންބަރު ރިޔާޒު އޭނާގެ ދާއިރާގެ ރަށް ތ. ތިމަރަފުށީގައި ހުންނެވުމަށް ފަހު މާލެ ވަޑައިގެންނެވި މައްސަލަ މަޖިލީހުގެ ކޮމިޓީން ބަލައި ދިނުމަށް ހުށަހަޅުއްވާފައި ވަނީ ފޮނަދޫ ދާއިރާގެ މެންބަރު މޫސާ ސިރާޖެވެ.
ސިރާޖު ހުށަހެޅުއްވި ސިޓީގައި މެންބަރު ރިޔާޒު މާލެ ލޮކްޑައުން ކުރެވިފައިވާ ދަނޑިވަޅެއްގައި މާލެ އަންނަން ހުއްދަ ދީފައިވޭތޯ އާއި ހުއްދަ ދީފައިވާ ނަމަ، ހުއްދަދީފައި ވަނީ "ކޮންމެހެން މާލެ އަންނަންޖެހޭ" ޖެހޭ ސަބަބެއް ދިމާވެގެން ތޯ ރައްޔިތުންގެ މަޖިލީހުގެ ކަމާބެހޭ ކޮމެޓީން ބަލާ މިކަން ސާފުކޮށް ދެއްވުމަށް އެދިފައި ވެއެވެ. އަދި މިކަމަކީ މެންބަރުގެ ސުލޫކާ ގުޅޭ އަމަލެއް ކަމުގައި ދެކެވަޑައިގަންނަވާ ކަމަށް ސިރާޖު ފޮނުއްވި ސިޓީގައި ވެއެވެ.
ރިޔާޒު މާލެ އައުމަށް ހުއްދަ ދިނުމާއި ގުޅިގެން ޢާންމު ރައްޔިތުން ވަނީ އެކަމާއި ނުރުހުން ފާޅުކޮށްފައެވެ. އަދި ރިޔާޒަށް މާލެ އަންނަން ހުއްދަ ދިނީ ކޮން އުސޫލަކުން ކަމާމެދު ޢާންމުން ސުވާލު އުފައްދާފައި ވެއެވެ.
