އެޗްޕީއޭ ވެބްސައިޓް ހެކް ކުރި މައްސަލަ ތަހުގީގުކޮށް ފުލުހުންނަށް ވާނީ ހުށަހަޅާފައި: މަލީހު

ހެލްތު ޕްރޮޓެކްޝަން އެޖެންސީ(އެޗްޕީއޭ) ގެ ވެބްސައިޓް ހެކްކުރި މައްސަލަ ތަޙުޤީޤު ކުރުމަށްފަހު އެމައްސަލަ މިހާރު ފުލުހުންނަށް ހުށަހަޅާފައިވާ ކަމަށް ކޮމިއުނިކޭޝަންސް، ސައިންސް އެންޑް ޓެކްނޮލޮޖީ މިނިސްޓަރު މުޙައްމަދު މަލީހު ޖަމާލު ވިދާޅުވެއްޖެއެވެ.

"އެނޯނިމަސް" ކޮށް ނުވަތަ ގޮތް ނޭނގޭ ބަޔަކު އެޗްޕީއޭ ގެ ވެބްސައިޓު ހެކްކޮށްފައިވަނީ މިމަހުގެ 3 ވަނަ ދުވަހު އެވެ. ވެބްސައިޓު ހެކްކުރުމަށްފަހު ވީޑިއޯއެއް ވަނީ އަޕްލޯޑްކޮށްފަ އެވެ. އޭގައި ވަނީ ކޮވިޑް-19 އާއި ގުޅިގެން ސަރުކާރުން އަޅަމުންގެންދާ ފިޔަވަޅުތަކަށް ވަރަށް ބޮޑަށް ފާޑުކިޔާފައެވެ. އަދި މި ސަރުކާރަކީ އަމިއްލަ ނިންމުންތަކެއް ނިންމުމުގެ ބާރު އަތުން ދޫވެފައިވާ ސަރުކާރެއް ކަމަށް ތުހުމަތުކުރެ އެވެ.

Advertisement

އާދިއްތަ ދުވަހު ކުރިޔަށްދިޔަ ރައްޔިތުންގެ މަޖިލީހުގެ ޤައުމީ ތަރައްޤީ އާއި ތަރިކައިގެ ކޮމިޓީގައި ފޮނަދޫ ދާއިރާގެ މެންބަރ މޫސާ ސިރާޖު ދާދިފަހުން އެޗްޕީއޭގެ ވެބްސައިޓް ހެކްކޮށްފައިވާތީ އެކަމާއި ގުޅިގެން ކުރެއްވި ސުވާލަށް ޖަވާބު ދެއްވަމުން މިނިސްޓަރ ވިދާޅުވީ އެޗްޕީއޭގެ ވެބްސައިޓް ހެކްކޮށްފައިވަނީ ރާއްޖޭގެ 'އައިޕީ އެޑްރެސް' އަކުން ކަމަށެވެ.

މިނިސްޓަރ ވިދާޅުވީ އެކަމަށް ބޭނުންވާ ތަފުޞީލީ ތަހުޤީޤެއް ކުރުމަށްފަހު އެމައްސަލަ މިހާރު ފުލުހަށް ހުށަހަޅާފައިވާކަމަށެވެ.

މިނިސްޓަރ ވިދާޅުވީ މިނިސްޓްރީގެ ތެރޭގައި އޮތީ ކުޑަ ސެކިޔުރިޓީ ޓީމެއް ކަމަށެވެ. ސެކިޔުރިޓީ ކަންކަން އިތުރަށް ވަރުގަދަ ކުރުމަށްޓަކައި މޮނިޓަރިންގ ސްޓެކެއް ހޯދުމުގެ ހުއްދަ ފިނޭންސް މިނިސްޓްރީން މިހާރު ދީފައިވާކަމަށް މިނިސްޓަރ ވިދާޅުވި އެވެ. އަދި މިހާރު ކުރިޔަށްދަނީ އެ ޕްރޮކިޔުރ ކުރުމުގެ މަސައްކަތް ކަމަށްވެސް މިނިސްޓަރ ވިދާޅުވި އެވެ.

މިނިސްޓަރ ވިދާޅުވީ ސަރުކާރުގެ އިދާރާތަކުގައި ހުރި އިންޓަރނެޓާއި ގުޅުންހުރި ނާޒުކުކަންކަން ފާހަގަކޮށްފައިވާ ކަމަށާއި، އެކަން އެފަރާތްތަކަށް އަންގާފައިވާކަމަށެވެ. އަދި މިފަދަ ކަންކަން ރަނގަޅަށް ކޮންޓްރޯލްކޮށް މޮނިޓަރ ކުރުމުގެ ކަންކަންވެސް އެންސީއައިޓީއާ ގުޅިގެން ކުރިޔަށްދާ ކަމަށް މިނިސްޓަރ ވިދާޅުވި އެވެ.

އެޗްޕީއޭގެ ވެބްސައިޓް ހެކް ކުރިކަމުގެ މަޢުލޫމާތު ލިބުނުތާ ކުޑައިރުކޮޅެއްގެ ތެރޭގައި އެޗްޕީއޭގެ ވެބްސައިޓް ވަނީ އެދުވަހު ޑައުންވެފަ އެވެ.