ވަޒީފާއާ ގުޅޭ 2291 މައްސަލަ ޖޮބް ސެންޓަރަށް ހުށައަޅައިފި
7 މެއި 2020 | ބުރާސްފަތި 10:44ވަޒީފާއިން ވަކި ކުރުމާއި ގުޅިގެން ހުށައަޅާފައިވާ 571 މައްސަލައެއް ހިމެނޭ
ވަޒީފާގެ މައްސަލަތައް ހުށައެޅުމަށް އިކޮނޮމިކް މިނިސްޓްރީގައި ޖޮބް ސެންޓަރ ވަނީ ޤާއިމު ކުރެވިފައި
ވަޒީފާއާ ގުޅޭ 2291 މައްސަލަ މިހާތަނަށް ޖޮބް ސެންޓަރަށް ހުށަހަޅާފައިވާކަން ސަރުކާރުން ހާމަކޮށްފި އެވެ.
ބުރާސްފަތި ދުވަހު ނޭޝަނަލް އިމަރޖެންސީ އޮޕަރޭޝަންސް ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އިކޮނޮމިކް މިނިސްޓަރ ފައްޔާޒް އިސްމާއިލް ވިދާޅުވީ، މިހާތަަނަށް 2291 މައްސަލައެއް ޖޮބް ސެންޓަރަށް ހުށައެޅިފައިވާއިރު، އޭގެ ތެރޭގައި ނޯޕޭއާ ގުޅޭ 639 މައްސަލައެއް ހިމެނޭކަމަށެވެ. އޭގެ އިތުރުން، ވަޒީފާއިން ވަކިކުރުމާއި ގުޅިގެން ހުށަހަޅާފައިވާ 571 މައްސަލައެއް ހިމެނޭއިރު، މުސާރަ ކުޑަ ކުރިކަމަށް ބުނެ ހުށައަޅާފައިވާ 385 މައްސަލަ ހިމެނޭކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ، ވަޒީފާއިން ސަސްޕެންޑް ކޮށްފައިވާ ކަމަށް ބުނެ، ޖޮބް ސެންޓަރަށް 162 މައްސަލައެއް ހުށައެޅިފައިވާ ކަމަށާއި، އަމިއްލަ މަސައްކަތް ކޮށްގެން އާމްދަނީ ހޯދާ ފަރާތްތަކުގެ ވަޒީފާއަށް އަސަރުކޮށްގެން 280 ޝަކުވާއެއްވެސް ހުށައެޅިފައިވާ ކަމަށެވެ. މީގެ އިތުރުންވެސް އެހެނިހެން މައްސަލަތައް މަދުން ނަމަވެސް ހުށަހަޅާފައިވާކަން މިނިސްޓަރ ފާހަގަކުރެއްވިއެވެ.
މިނިސްޓަރ ވިދާޅުވީ، މި މައްސަލަތައް ބެލުމުގައި ދިމާވާ އެންމެ ބޮޑު އެއް ގޮންޖެހުމަކީ ވެރިފިކޭޝަން މަރުޙަލާގައި ކުރިމަތިވާ ދަތިތައް ކަމަށެވެ. އެގޮތުން މާލިއްޔަތު ޤާނޫނާއި ޤަވާއިދުތަކާ އެއްގޮތްވާ ގޮތުގެ މަތިން މި މައްސަލަތަކަށް ފިޔަވަޅުއަޅާއިރު، ބައެއްކަހަލަ ލިއެކިއުންތައް އޮންލައިންކޮށް ކަށަވަރު ކުރުމުގައި ދިމާވާ ދަތިތައް މިނިސްޓަރ ފާހަގަ ކުރެއްވިއެވެ. މިސާލެއްގެ ގޮތުން ވަޒީފާއިން ވަކި ކޮށްފައިވާ ކަމަށްބުނެ ހުށައަޅާ ބައެއް މައްސަލަތަކުގައި ވަޒީފާއިން ވަކި ކޮށްފައިވާ ކަމުގެ ލިއުން ބައެއް ފަރާތްތަކަށް ނުލިބޭތީ އިތުރު ގޮތްތަކެއް ހޯދަން ޖެހުމުގެ ސަބަބުން މަސައްކަތްތައް ލަސްވާކަމަށް މިނިސްޓަރ ވިދާޅުވިއެވެ.
ކޮވިޑް-19 އާ ގުޅިގެން ވަޒީފާގެ ޙާލަތްތަކަށް ބަދަލު އައިސްފައިވާ ފަރާތްތަކަށް އެ މައްސަލަތައް ރިޕޯޓު ކުރަން ފަސޭހަ ކުރުމުގެ ގޮތުން އެކަމުގެ މަޢުލޫމާތު ފޯރުކޮށްދޭ ޚާއްޞަ ކޯލް ސެންޓަރެއްވެސް މިހާރު ވަނީ ޤާއިމުކޮށްފައެވެ. އެގޮތުން ޖޮބް ސެންޓަރަށް ރިޕޯޓުކުރުމާއި ގުޅޭގޮތުން އެއްވެސް މަޢުލޫމާތެއް އޮޅުންފިލުވަން ބޭނުންވާނަމަ، ކޯލްސެންޓަރުގެ ނަންބަރު 1475 އަށް ގުޅުއްވުމަށް އިކޮނޮމިކް މިނިސްޓްރީން ވަނީ އިލްތިމާސްކޮށްފައެވެ.
