ގަވާއިދާ ހިލާފަށް އުޅޭ ބިދޭސީންގެ މައްސަލަ: ގަވާއިދާ ހިލާފަށް މަސައްކަތް ކޮށްގެން ލިބޭ އާމްދަނީ މާބޮޑުތަނުން އިތުރު!
6 މެއި 2020 | ބުދަ 09:33ޤވާއިދާ އެއްގޮތަށް 150،000 ބިދޭސީން، ޤވާއިދާ ޚިލާފަށް 63،000، ޖުމުލަ: 213،000 ބިދޭސީން ރާއްޖޭގައި
ގަވާއިދާ ހިލާފަށް އުޅޭ ބިދޭސީންތަކެއް
ރާއްޖޭގައި ރަސްމީ ލިޔެކިޔުމެއްނެތް (ޤަވާއިދާ ހިލާފަށް) ގިނަ ޢަދަދެއްގެ ބިދޭސީން އުޅެމުންދާއިރު، އެކަން އެގޮތަށް މެދުވެރިވާ އެއް ސަބަބަކީ، ރާއްޖޭގައި ޤަވާއިދާ ޚިލާފަށް އުޅެ، ޤަވާއިދާ ޚިލާފަށް މަސައްކަތްކުރުމުން ލިބޭ ޢާމްދަނީ އިތުރުވުން ކަމަށް ރައްޔިތުންގެ މަޖިލީހުގެ ޤައުމީ ސަލާމަތާއި ޚާރިޖީ ގުޅުންތަކުގެ ކޮމިޓީން ދިރާސާކޮށް ނިންމިގޮތުގެ ރިޕޯޓުގައި ހާމަ ކޮށްފިއެވެ.
އަންގާރަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާއަށް ހުށަހެޅި، ޤަވާއިދާ ޚިލާފަށް ދިވެހިރާއްޖޭގައި މަސައްކަތް ކުރަމުންދާ ބިދޭސީންގެ ސަބަބުން އިޖްތިމާޢީ، އިޤްތިޞާދީ އަދި ޤައުމީ ސަލާމަތަށް ނުރައްކާވާފަދަ ކަންކަން ފާހަގަކުރެވިގެން އެ މައްސަލަ ޤައުމީ ސަލާމަތާއި ޚާރިޖީ ގުޅުންތަކުގެ ކޮމިޓީން ދިރާސާކޮށް ނިންމިގޮތުގެ ރިޕޯޓުގައި، ވަޒީފާ ދިން ފަރާތައް ފިލައިގެން ރިޕޯޓުކުރެވޭ ޢަދަދު އިންތިހާއަށް އިތުރުވެގެން ގޮސްފައިވާކަމަށާއި، އެކަން އެގޮތަށް ހިނގަނީ ޤަވާއިދާ ޚިލާފަށް މަސައްކަތްކޮށްގެން ލިބޭ ޢާމްދަނީ އިތުރުވުމާ ގުޅިގެންކަން ފާހަގަކޮށްފައިވެއެވެ.
ކޮމެޓީ ރިޕޯޓުގައި، ރާއްޖޭގެ އާާބާދީގެ ނިޞްބަތަކަށްބަލާއިރު، ބިދޭސީން ރާއްޖޭގައި ގިނަ ޢަދަދަކަށް އުޅެމުންދާތީއާއި ޚާއްޞަކޮށް، ޤަވާއިދާ ޚިލާފަށް ގިނަ ޢަދަދެއްގެ ބިދޭސީން އުޅެމުންދާތީ އެކަމުގެ ވަރަށް ގިނަ ކަންބޮޑުވުންތަކެއް ފާހަގަކޮށްފައި ވެއެވެ.
އެގޮތުން، ރަސްމީ ލިޔެކިޔުމެއްނެތް ބިދޭސީ މަސައްކަތްތެރިން ކުދިކުދި ކުށްތަކުން ފެށިގެން ސީރިއަސް އަދި ރޭވިގެން ހިންގާ ކުށްތަކުގައި ޝާމިލުވާކަން ހާމަކޮށްފައި ވެއެވެ. އެގޮތުން، މާރާމާރީ އާއި ވައްކަމާއި، ފޭރުމާއި މަސްތުވާތަކެތީގެ މައްސަލަތަކާއި، ސައިބަރ ކްރައިމް އާއި މިނޫންވެސް މިފަދަ ނުރައްކާތެރި ކުށްތައް ކުރުމުގައި މުޖުތަމަޢު ޖެހިލުންވާފަދަ ދަރަޖައަކަށް ގޮސްފައިވާކަން ވެސް ކޮމެޓީގެ ރިޕޯޓުގައި ފާހަގަކޮށްފައި ވެއެވެ.
މިރިޕޯޓުގައި، އިމިގްރޭޝަނަށް، ރާއްޖޭގައި އުޅޭ ބިދޭސީންގެ ޢަދަދު ކަނޑައެޅިގެން ބުނެދެވިފައިނުވާކަން ހާމަވެފައި ވެއެވެ. އެގޮތުން އިމިގްރޭޝަނުން މިދިއަ އަހަރުގެ ސެޕްޓެންބަރުގެ މަހުގެ ނިޔަލަށް ކޮމެޓީއަށް ދީފައިވާ މަޢުލޫމާތުތަކަށް ރިޢާޔަތްކޮށް މިރިޕޯޓުގައި ބުނެފައިވަނީ، ދިވެހިރާއްޖޭގައި އުޅެމުންދާކަމަށް އަންދާޒާކުރެވޭ ބިދޭސީންގެ ޢަދަދަކީ 179،122 ކަމަށެވެ.
ނަމަވެސް 2019 އޯގަސްޓް 31 ވަނަ ދުވަހުގެ ނިޔަލަށް ދިވެހިރާއްޖެއަށް ވަރކް ވިޒާގައި، ޤަވާއިދާ އެއްގޮތަށް ގާތްގަނޑަކަށް 150،000 ބިދޭސީން މަސައްކަތް ކުރަމުންދާ ކަމަށެވެ.
ދުވާލެއްގެ މައްޗަށް މަސައްކަތް ކުރުމަށްޓަކައި އެވްރެޖްކޮށް، 115 ބިދޭސީން މުޅިން އަލަށް ރާއްޖެ އަންނަކަމަށްވެސް އިމިގްރޭޝަނުން ބުނެފައި ވެއެވެ. އަދި އަންދާޒާ ކުރެވޭގޮތުގައި ރަސްމީ ލިޔެކިޔުންނެތި ރާއްޖޭގައި އެޅެމުންދަނީ ގާތްގަނޑަކަށް 63،000 ބިދޭސީން ކަމަށްވެސް އިމިގްރޭޝަނުން ބުނެފައި ވެއެވެ.
އިމިގްރޭޝަނުން ދީފައިވާ މަޢުލޫމާތު ތަކަށްބަލާއިރު، ޤަވާއިދާ އެއްގޮތަށް 150،000 ބިދޭސީން ރާއްޖޭގައި އުޅޭއިރު، ރަސްމީ ލިޔެކިޔުމެއްނެތި 63،000 ބިދޭސީން އުޅޭކަމަށް ލަފާކުރާއިރު، ރާއްޖޭގައި 213،000 އަށްވުރެ ގިނަ ބިދޭސީން އުޅޭނެ ކަމަށް ބެލެވެއެވެ.
ރާއްޖޭގައި އާބާދީގެ ތެރެއިން މިދިއަ އޭޕްރީލް މަހު ބާއްވަން އުޅުނު ލޯކަލް ކައުންސިލްތަކުގެ އިންތިޚާބުގައި ވޯޓުލުމުގެ ޙައްޤު ލިބޭކަމަށް ބުނެފައިވަނީ 269،562 މީހުންނަށެވެ. އެއީ ރާއްޖޭގެ އާބާދީގެ 18 އަހަރުން މަތީގެ އާބާދީއެވެ. އަދި އަންހެނުންނާއި ފިރިހެނުންނާއި އުމުރުން ދުވަސްވީ މީހުންނާއެކުގައެވެ.
ރާއްޖޭގައި އުޅޭ 213،000 ބިދޭސީންނަކީ މަސައްކަތްތެރިންނެވެ. އޭގެތެރޭގައިވެސް ގިނަވާނީ ޒުވާން ފިރިހެނުންނެވެ.
