ވައިގެ ދަތުރުފަތުރު ޢާންމު ޙާލަތަކައް ގެންނަން ތިން އަހަރު ނަގާނެ: ޔޫއޭއީގެ އެއަރލައިންތައް
ގެއްލުމުން އަރައިގެނެވޭނީ 2023 ވަނަ އަހަރު
އެމިރޭޓްސް އެއަރލައިންގެ ފްލައިޓުތަކެއް ދުބާއީ އެއަރޕޯޓުގައި ބަނދަރުކޮށްފައި | އަލްއަރަބިއްޔާ
ކޮވިޑް-19 ބަލިމަޑުކަމާއި ގުޅިގެން އެއަރލައިންތަކައް ލިބުނު ގެއްލުންތަކުން އަރައިގަނެ، ޢާންމު ޙާލަތަކައް ރުޖޫޢަވުމަށް ތިން އަހަރު ނަގާނެކަމަށް މެދުއިރުމަތީގެ މައި ދެ އެއަރލައިނުން ބުނެފިއެވެ.
ޔޫއޭއީގެ ދެ އެއަރލައިންކަމަށްވާ އެމިރޭޓްސް އާއި، އިއްތިހާދު އެއަރވޭސްއިން ބުނެފައިވަނީ، ކޮވިޑް-19 އައުމުގެ ކުރިން ވައިގެ ދަތުރުފަތުރުތަކަށް އޮތް ޑިމާންޑު ހަމަ މަގަށް އެޅެން ތިން އަހަރުދުވަސް ނަގާނެކަމަށެެވެ.
ވީޑިއޯ ކޮންފަރެންސް މެދުވެރިކޮށް ބޭއްވި "ޔޫއެސް-ޔޫއޭއީ ބިޒްނަސް ކައުންސިލް" ބައްދަލުވުމުގައި، އެމިރޭޓްސްގެ ރައީސް ޓިމް ކްލަރކް އާއި އިއްތިހާދު އެއަރވޭސްގެ ޗީފް އެގްޒެކެޓިވް ޓޯނީ ޑަގްލަސްއާ ދެ ބޭފުޅުންގެ ވާހަކައިގައި މައިގަނޑު ގޮތެއްގައި އަލިއަޅުއްވާލެއްވީ، ކޮވިޑް-19 ގެ ސަބަބުން ވައިގެ ސިނާޢަތައް ލިބެމުންދާ ފޫނުބެއްދޭވަރުގެ ގެއްލުންތަކަށެވެ.
ދެ ބޭފުޅުންވެސް އިއްތިފާޤުވާގޮތުގައި ކޮވިޑް-19 އާއި ގުޅިގެން ޤައުމުތައް ފުރަބަންދުކޮށް، ވައިގެ ޞަރައްދީ އިން ނުވަތަ އެ ޤައުމުގެ ދޮރާށިތައް އެއަރލައިންތަކައް ބަންދުކުރުމުން އެއަރލައިންތަކަށް ދަނީ ބޮޑެތި ގެއްލުންތައް ވަމުންނެވެ.
ދުނިޔޭގެ އެއަރލައިންތަކުގެ ތެރެއިން %85 އެއަރލައިން ދަރަނިވެރިވުމުގެ ނުރައްކަލާއި ވަނީ ކުރިމަތިލާންޖެހިފަ އެވެ. އަދި އެއަރލައިންތަކަށް ދައުލަތުން މާލީ އެހީތެރިކަން ފޯރުކޮށްނުދީިނަމަ އަހަރު ނިމުމުގެ ކުރިން ބަގުރޫޓު ވެދާނެކަމަށް ބިޒްނެސް ކައުންސިލުން ބުނެފައި ވެއެވެ. އަދި އެމިރޭޓްސްއާއި، އިއްތިހާދު އެއަރވޭސްގެ ވެރިން ވިދާޅުވީ، ފަސިންޖަރުންގެ ޑިމާންޑް އެއްކޮށް ގެއްލިފައިވާ ކަމަށެވެ. އަދި 2023 ވަނަ އަހަރާއި ހަމަޔަށް އަންނަ އިރުވެސް ކޮވިޑް-19 ގެ ގެއްލުމުން އަރައިނުގަނެވޭނެކަމަށާއި، ކޮވިޑް-19 ގެ ކުރިން އޮތް ޙާލަތައް ވައިގެ ދަތުރުފަތުރުތައް ރުޖޫޢަ ނުވެވޭނެކަމުގެ އިންޒާރުދެއްވާފަ އެވެ.
ކޮވިޑް-19ގެ ބަލިމަޑުކަމާއި ގުޅިގެން، ދުނިޔޭގެ ގިނަ އެއަރލައިންތައް ވަނީ ހުއްޓުމަކަށް އައިސްފައެވެ. އަދި ގިނަ އެއަރލައިންތަކުން ވަނީ ކޮވިޑް-19އާ ގުޅިގެން ލިބުނު ގެއްލުންތަކުން ސަލާމަތްނުވާނެކަމަށް ބުނެފަ އެވެ.
އެމިރޭޓްސްއާއި، އިއްތިހާދު އެއަރވޭސްއިން ވެސް ވަނީ ފަސިންޖަރުން އުފުލާ ތާވަލު ފްލައިޓްތައް ހުއްޓާލާ ބޯޓުތައް ބަންދަރުކޮށްފަ އެވެ. މި ދަނޑިވަޅުގައި ދެ އެއަރލައިނުން ވެސް ކުރަނީ ހަމައެކަނި ކާގޯ ފްލައިޓް ދަތުރުތަކާއި، ކޮވިޑް-19އާ ގުޅިގެން ގައުމުތަކުގައި ތާށިވެފައިތިބި އެހެން ޤައުމުތަކުގެ މީހުން ޤައުމުތަކައް ގެންދަން ކުރާ ދަތުރުތަކެވެ. މި ދަތުރުތައް ކުރަނީ ޔޫއޭއީ ސަރުކާރުގެ ޚާއްޞަ ހުއްދަައަކާއި އެކުގައެވެ.
ކޮވިޑް-19 އާއި ގުޅިގެން ލިބުނު ވިޔަފާރި ގެއްލުންތަކާއި ގުޅިގެން އެމިރޭޓްސްއާއި އިއްތިހާދު އެއަރވޭސް އިން ވަނީ މުވައްޒަފުންގެ މުސާރަކުޑަކޮށް، ބައި މުސާރައަށާއި، މުސާރަ ނުހިނގާ ގޮތައް ޗުއްޓީ ނަގަން ބޭނުންވާ މުވައްޒަފުންނަށް ޗުއްޓީދީފަ އެވެ.
މިހާރު އޮޕަރޭޝަންތައް ހިންގަނީ ވިހާވެސް މަދު މުވައްޒަފުން ބޭނުންކޮށްގެންނެވެ. އަދި މުވައްޒަފުންގެ ސަލާމަތާއި ރައްކާތެރިކަމަށް ބަލާ، ގޭގައި ތިބެގެން ކުރެވޭނެ މަސައްކަތްތައް ގޭގައި ކުރެވޭނެ އިންތިޒާމުވަނީ ހަމަޖައްސައިދީފަ އެވެ.
އެމިރޭޓްސްއާއި އިއްތިހާދު އެއަރވޭސް ލިބެމުންދާ ގެއްލުންތަކުން އަރައިގަތުމަށް ޔޫއޭއީގެ މައި ސަރުކާރުން ވަނީ މާލީގޮތުން އެހީތެރިވާނެކަމަށް ބުނެފަ އެވެ. އެހެންނަމަވެސް އެހީދޭނެ ޢަދަދަކާއި، ދޭނެ ދުވަހެއް އަދި އިޢުލާނުކޮށްފައެއް ނުވެ އެވެ.
