މަރުވި މީހާގެ މައްސަލައިގައި އިހުމާލު އޮތްތޯ ބަލަނީ
ގެ މޮނިޓަރިންއަށް ލާފައިވަނީ މި މަހުގެ 24 ވަނަ ދުވަހު އަދި އޭނާ އަކީ ޑައިރެކްޓް ކޮންޓެކްޓެއް
ހެލްތް މިނިސްޓަރު އަބްދުﷲ އަމީން
ކޮވިޑް-19 ޖެހިގެން މާލެއިން މަރުވި 83 އަހަރުގެ އުމުރުން ދުވަސްވީ މީހެއް މައްސަލައިގައި އިހުމާލު އޮތްތޯ ބަލަމުންދާ ކަމަށް ހެލްތް މިނިސްޓަރު އަބްދުﷲ އަމީން ވިދާޅުވެއްޖެއެވެ.
ކޮވިޑް-19 އަށް ސާމްޕަލް ނެގިފަހުން، އޭގެ ނަތީޖާ ނުލިބެނީސް ހާލު ދެރަވެގެން ނިޔާވެފައިވަނީ އާމިނަތު އާދަމް 83 އެވެ. އެ މީހާ އަކީ ކޮވިޑަށް ޕޮޒިޓިވް ވެފައިވާ މީހެއްގެ ޑައިރެކްޓް ކޮންޓެކްޓެކެވެ.
ކޮވިޑް-19 އަށް މީހަކު ޕޮޒިޓިވްވެގެން އާމިނަތު އާދަމް ދިރިއުޅެމުންދިޔަ ގެ މޮނިޓަރިންއަށް ލާފައިވަނީ މި މަހުގެ 24 ވަނަ ދުވަހުއެވެ. އަދި އޭނާ އަކީ ދާއިމީ ބައްޔަށް ފަރުވާ ހޯދަމުން ގެންދިޔަ މީހެކެވެ. ނަމަވެސް މޮނިޓަރިންގެ ހާލަތަށް އެ ގެނެސް އަދި އޭނާ އަކީ ޑައިރެކްޓް ކޮންޓެކްޓެއް ނަމަވެސް، އާމިނަތު އާދަމްގެ ސާމްޕަލް ނަގާފައިވަނީ 27 ވަނަ ދުވަހުގެ ރޭ ދަންވަރުގެ ވަގުތެއްގައެވެ.
ނަތީޖާ ލިބުނީ 29 ވީ ބުދަ ދުވަހުގެރޭގެ ވަގުތެއްގައި އާމިނަތު އާދަމް ނިޔާވި ފަހުންނެވެ. އެހެންކަމުން އާމިނަތު އާދަމް، ޕޮޒިޓިވްވި މީހަކާއި ޑައިރެކްޓް ކޮންޓެކްޓްވެ ހައި ރިސްކް ކެޓަގަރީގައި ހިމެނުނު އިރު ވެސް، އޭނާގެ ޓެސްޓް ކުރެވުނީ އެ ގެ މޮނިޓަރިންގެ ހާލަތަށް ގެނެވުނުތާ 3 ވަރަކަށް ދުވަސްވީ ފަހުންނެވެ. އޭނާ ނިޔާވީ ނޭވާލާން އުނދަގޫވެގެންނެވެ. އަދި ހޮސްޕިޓަލަށް ގެންދިޔަ އިރުވެސް ވަނީ ނިޔާވެފައެވެ.
އާއިލާގެ ފަރާތުން އަންނަނީ މި މައްސަލަގައި ހެލްތް ޕްރޮޓެކްޝަން އެޖެންސީ (އެޗްޕީއޭ) ގެ އިހުމާލު އޮތްކަމަށް ބުނަމުންނެވެ. ނަމަވެސް އެޗްޕީއޭއިން އަދި ސަރުކާރުން ވެސް މިކަމުގައި އިހުމާލުވެފައިވާ ކަމަށް އެއްބަސް ނުވެއެވެ. އަދި މިކަން ބައްލަވަމުން ގެންދަވާނެކަމަށް ހެލްތް މިނިސްޓަރު އަމީން ވަނީ ވިދާޅުވެފައެވެ.
އަމީން ވިދާޅުވީ މި ކޭސްއާ ގުޅިގެން ކަންކަން ހިނގާދިއަގޮތް ބައްލަވާނެ ކަމަށާއި، މިކަމުގައި އިހުމާލެއްއޮތްތޯ ނުވަތަ ނޫންތޯ ބައްލަވާނެ ކަމަށެވެ. އަދި މިކަމާ ގުޅިގެން މީހުން ކަރަންޓީނު ކުރުމާއި، ސާމްޕަލް ނެގުމާއި އަދި ޓެސްޓު ކުރުމުގެ އެސްއޯޕީތަކަށް ބަދަލު ގެންނަންޖެހޭނަމަ އެކަންވެސް ކުރައްވާނެ ކަމަށެވެ.
