އެޗްޕީއޭގެ ކޮންޓެކްޓް ޓްރޭސިންގ އެޕް "ޓްރޭސް އެކީ" ލޯންޗު ކޮށްފި
ޓްރޭސްއެކީ އިން ބްލޫޓޫތު މެދުވެރިކޮށް މިއެޕްލިކޭޝަން ބޭނުންކުރާ އެހެންމީހުންނާ ދިމާވެފައިވާނަމަ އެމަޢުލޫމާތު ފޯނުގައި ރައްކާކުރާނެ
ކޮވިޑް-19 ގެ ބަލި ދެނެގަތުމާއި ކޮންޓެކްޓްވާ މީހުން ދެނެގަތުމަށް ޑިވަލަޕް ކުރި އެޕް
ހެލްތް ޕްރޮޓެކްޝަން އެޖެންސީ (އެޗްޕީއޭ) ގެ ކޮންޓެކްޓް ޓްރޭސިންގ އެޕް "ޓްރޭސް އެކީ" ލޯންޗު ކޮށްފިއެވެ.
ޓްރޭސްއެކީ އަކީ ކޯވިޑް-19 ފެތުރުން ހުއްޓުވުމަށާއި މުޖުތަމަޢު މި ބަލިން ރައްކާތެރިކުރުމަށް ކުރެވޭ މަސައްކަތް އިތުރަށް ހަރުދަނާކުރުމުގެ ގޮތުން ކޯވިޑް-19 އަށް ޕޮޒިޓިވްވާ މީހުންނާއި އެމީހުންނާއި އެއްތަންވެފައިވާ މީހުން ދުރާލާ ދެނެގަތުމަށް ހަދާފައިވާ އެޕްލިކޭޝަނެކެވެ.
ޓްރޭސްއެކީ އިން ބްލޫޓޫތު މެދުވެރިކޮށް މިއެޕްލިކޭޝަން ބޭނުންކުރާ އެހެންމީހުންނާ ދިމާވެފައިވާނަމަ އެމަޢުލޫމާތު ފޯނުގައި ރައްކާ ކުރާނެއެވެ. އަދި އެމީހެއް ބައްޔަށް ޕޮޒިޓިވް ވެއްޖެ ހާލަތެއްގައި އެޗްޕީއޭއަށް މި މަޢުލޫމާތު ހުށަހެޅުމުން، އެމީހަކާއި ގާތުން އެއްތަންވެފައިވާ މީހުންގެ ފޯނު ނަންބަރުތައް ކޮންޓެކްޓް ޓެރޭސިންގައި ބޭނުންކުރުމަށް އެޗްޕީއޭއަށް ލިބޭނެއެވެ.
އެގޮތުން ބްލޫޓޫތު މެދުވެރިކޮށް ޓެރޭސްއެކީ ބޭނުންކުރާ އެހެންމީހުން ކައިރީގައި ވޭތޯ ބަލޭނެއެވެ. އަދި އެ އެޕްލިކޭޝަނުން ނެގޭ ޕްރޮކްސިމިޓީ ޑޭޓާ ރައްކާތެރިކަމާއިއެކު ފޯނުގައި ބެހެއްޓޭނެއެވެ. މީގެ އިތުރުން ކޮންޓެކްޓް ޓެރޭސިންއަށް މަޢުލޫމާތު ބޭނުންވެއްޖެ ހާލަތެއްގައި އެޗްޕީއޭ އިން މި މަޢުލޫމާތު ހުށަހެޅުމަށް އަޅާނެ ކަމަށް އެޗްޕީއޭއިން ބުނެއެވެ.
މި އެޕް މިވަގުތު ލިބޭނީ އެންޑްރޮއިޑް ފޯން ބޭނުންކުރާ ފަރާތްތަކަށެވެ. އަދި ކުރު މުއްދަތެއްގައި އައިއޯއެސް އެޕްވެސް ލިބިގެންދާނެކަމަށް އެޗްޕީއޭއިން ބުނެއެވެ.
