އުމުރުން 18 އަހަރުނުވާ ކުދިންނަށް މަރުގެ ޙުކުމް އިއްވުން ސައުދީ ސަރުކާރުން ހުއްޓާލައިފިއެވެ.
ސައުދީޢަރަބިއްޔާގެ ރަސްކަމުގެ ދަރުބާރުން ނިންމާފައިވަނީ އުމުރުން 18 އަހަރު ނުވާ ކުދިން ކުށެއްކޮށްފިނަމަ މަރުގެ އަދަބު ތަންފީޒުނުކުރުމަށެވެ. ރަސްގެފާނު ސަލްމާން ބިން ޢަބްދުލް ޢަޒީޒު މިކަން ނިންމެވި ޤަރާރުގައި ވަނީ، ކުށްކުރާ ކުޑަކުދިންނަށް މަރުގެ އަދަބު ތަންފީޒުކުރުމުގެ ބަދަލުގައި، ޖުވެނައިލް ޑިޓެންޝަން ފެސިލިޓީއަކަށް 10 އަހަރަށްވުރެ ކުރު މުއްދަތަކަށް ޙުކުމް ކުރާ ގޮތަށެވެ. ރަސްގެފާނުގެ މިނިންމެވުމަށް ސައުދީގެ ހިއުމަން ރައިޓްސް ކޮމިޝަނުން ވަނީ މަރުޙަބާ ކިޔާފައެވެ.
ހިއުމަން ރައިޓްސް ކޮމިޝަނުގެ ރައީސް އައްވާދު އަލައްވާދު ވިދާޅުވީ ކުޑަކުއްޖެގެގޮތުގައި ހުރެ ކުރާ ކުއްތަކައް މަރުގެ ޙުކުމް ތަންފީޒުކުރުން ހުއްޓާލުމަށް ރަސްކަމުގެ ދަރުބާރުން ނިންމެވި ނިންމެވުމަކީ ޒަމާނީ ޤާނޫލްއުޤޫބާތަކައް ރުޖޫޢަވުމަށް ލިބިގެންދިޔަ ފަހި ފުރުޞަތެއްކަމަށެވެ.
މިއަދަކީ ސައުދީޢަރަބިއްޔާއަށް ވަރަށް މުހިންމު ދުވަހެއް. މިކަން މިގޮތައް ފަހިކޮށްދެއްވީ ރަސްގެފާނު ސަލްމާނު ބިން ޢަބްދުލް ޢަޒީޒާއި، ވަލީއަޙުދު މުޙައްމަދު ބިން ސަލްމާން. އެބޭފުޅުން ނިންމެވީ ވަރަށް މުހިންމު ނިންމެވުމެއް. މީގެ ސަބަބުން ޒަމާނީ ޤާނޫނުލްއުޤޫބާތެއް ގެންނަން ފަސޭހަވެގެންދާނެ. އަދި ސައުދީ ސަރުކާރުން 2030 އާއި ހަމަޔަށް ވާޞިލުވުމަށް އެކުލަވާލާފައިވާ ތަރައްޤީގެ ތަޞައްވުރުގައި ހިމެނޭ މައިދާއިރާތައް އިޞްލާޙު ކުރުމަށް ފަސޭހަވެގެންދާނެ.ސައުދީގެ ހިއުމަން ރައިޓްސް ކޮމިޝަނުގެ ރައީސް އައްވާދު އަލައްވާދު
ސައުދީގައި ކުޑަކުދިންނަށް މަރުގެ ޙުކުމް އިއްވުން ހުއްޓާލާފައި މިވަނީ ޖިނާޢީ ކުށްތަކައް ހައްދު ޖެހުމަށް ޙުކުމް ހުރުން ހުއްޓާލިތާ މާގިނަ ދުވަސްތަކެއް ނުވަނީސްއެވެ. އެޤައުމުގެ ހިއުމަން ރައިޓްސް ކޮމިޝަނުން ބުނެފައިވަނީ ކޮވިޑް-91 ގެ ދަތިއުދަނގޫ ޙާލަތާއެކުގައިވެސް، މި ދެ ޙުކުމް ތަންފީޒުކުރުން ދާދިއެކުއެކީގައި ހުއްޓާލުމަކީ، އިންސާނީ ޙައްޤުތަކުގެ ދާއިރާ އިޞްލާޙު ކުރުމަށް ސަރުކާރުން އަހައްމިޔައްތުކަންދޭ މިންވަރު ދައްކުވައިދޭކަމެއްކަމަށެވެ.
ސައުދީ ރަސްގެފާނު ސަލްމާން ބިން ޢަބްދުލް ޢަޒީޒާއި ވަލީ އަޙުދު މުޙައްމަދު ބިން ސަލްމާނުގެ ޒަޢާމަތުގެ ދަށުން ސައުދީގެ އެންމެހައި ރައްޔިތުންނަށާއި، އެޤައުމުގައި ދިރިއުޅޭ އެހެން ޤައުމުގެ ރައްޔިތުންނަށް ފެންވަރު ރަނގަޅު ދިރިއުޅުމެއް ހޯދައިދިނުމަށް އެކި ދާއިރާތަކުން ދަނީ މައްސަކަތްކުރަމުންނެވެ. އެގޮތުން 2030 އަށް ޢަމާޒުކޮށްފައިވާ ތަޞައްވުރަށް ވާޞިލުވުމަށް ގިނަ ކަންތައްތަކެއް ދަނީ އިޞްލާޙު ކުރަމުންނެވެ.
