ކޮވިޑް-19 އިން ރައްކާތެރިވުމަށް ސައުދީޢަރަބިއްޔާގައި ރައްކާތެރިކަމުގެ ފިޔަވަޅެއްގެ ގޮތުން އިޢުލާނުކުރު ކާފިއުގެ ޢަމުރު އެޤައުމުގެ ރަސްކަމުގެ ދަރުބާރުން ލުއިކޮށްފިއެވެ.

ސައުދީރަސްގެފާނު ސަލްމާން ބިން ޢަބްދުލް ޢަޒީޒު ކާއިފުގެ ޢަމުރު ލުއިކުރައްވާ ޢާންމުކުރެއްވި ޤަރާރުގައިވަނީ 26 އެޕްރީލް އިން ފެށިގެން މެއިމަހުގެ ތިންވަނަ ދުވަހުގެ ނިޔަލަށް ކާފިއުގެ ޢަމުރު ލުއިކޮށްދެއްވާފައިވާކަމަށެވެ. އެގޮތުން މައްކާ ފިޔަވައި އެހެން ސިޓީތަކުގައި ހެދުނު 9 އިން ފެށީގެން ހަވީރު 5 ޖަހަންދެން ޢާންމުންނަށް ބޭރަށް ނިކުމެ އުޅެވޭނެކަމަށެވެ. މައްކާއާއި ކޮވިޑް-19 އާއި ގުޅިގެން އެއްކޮށް ފުރަބަންދުކުރި ބައެއް ޞަރަޙައްދުތައް ހުޅުވާނުލާގޮތައް ރަސްގެފާނުވަނީ ނިންމަވާފައެވެ.

ރަސްކަމުގެ ދަރުބާރުން މިނިންމެވި ނިންމެވުމުގެ ދަށުން އިޤްތިޞާދީ އަދި ބައެއް ސިނާޢި ޙަރަކާތްތައް އެޕްރީލްމަހުގެ 29 ވަނަ ދުވަހުން ފެށިގެން މޭއިމަހުގެ 13 ވަނަ ދުވަހާއި ހަމަޔަށް ކުރިޔަށްގެންދެވޭނެއެވެ. އެގޮތުން ހޯލްސޭލް އަދި ރީޓެއިލްކޮށް އެކި ބާވަތްތައް ވިއްކާ ފިހާރަތަކާއި މޯލްތައް މިއަދުން ފެށިގެން ހުޅުވޭނެއެވެ. އެހެންނަމަވެސް ޝޮޕިންގް މޯލްތަކުގައި ހުންނަ ބިއުޓީޕާރލަރތަކާއި، ސެލޫންތަކާއި، ޖިމްތަކާއި ރެސްޓޯރެންޓް ހޮޓާތަކުން ޚިދްމަތް ނުދެވޭނެކަމަށް ޤަރާރުގައިވެއެވެ. ރަސްގެފާނުގެ މި ނިންމެވުމުގެ ދަށުން ބައެއް ކޮންޓްރެންޓިންގް ކޮމްޕެނީތަކާއި ކާރުޚާނާތަކައް ވެސް އެއްވެސް ހުރަހެއް ނެތި އެތަންތަނުގެ ޙަރަކާތްތައް ކުރިޔަށްގެންދެވޭނެއެވެ.

ސައުދީ ރަސްގެފާނު ކާފިއުގެ ޢަމުރު ލުއިކުރައްވާ ބައެއް އިޤުތިޞާދީ ޙަރަކާތްތައް ހިންގުމަށް ހުއްދަ ދެއްވީ ކަމާއި ގުޅުން ހުރި އިދާރާތަކުގެ ރަޢުޔު ހޯއްދެވުމަށްފަހު އޭގެ މައްޗަށް ބިނާކުރައްވާކަމަށް ސައުދީ ޕްރެސް އޭޖެންސީން ބުނެއެވެ. ރަސްގެފާނުވަނީ ކާފިއުގެ އަމުރު ލުއިކުރައްވާ އިޤުތިޞާދީ އަދި ސިނާޢީ ޙަރަކާތްތައް ކުރިޔަށް ގެންދަން ހުއްދަ ދެއްވި ނަމަވެސް، އެތަންތަނުގައި ސަލާމަތާއި ރައްކާތެރިކަމުގެ ފިޔަވަޅު އަޅާފައިވޭތޯ ކަށަވަރުކުރުމަށް ކަމާއި ގުޅުންހުރި އިދާރާތަކައް އަމުކުރައްވާފައެވެ. ވަކިން ޚާއްބަކޮށް ތަންފީޒުކުރަމުންދާ ޞިއްޙީ މިންގަނޑުތަކާއި އެއްގޮތައް ކަންކަން ކުރިޔަށްގެންދޭތޯ ބަލާ ފާސްކުރުމަށް ރަސްގެފާނު ވަނީ އަންގަވާފައެވެ. ވަކިން ޚާއްޞަކޮށް އިޖުތިމާޢީ ގައިދުރުކަން ދަމަހައްޓާތޯ ބެލުމަށް ސަލާމަތީ ބާރުތަކައް ވަނީ އަންގަވާފައެވެ. ސައުދީއަރަބިއްޔާގައި 5 މީހުންނަށްވުރެ ގިނަ މީހުން އެއްވެ ކުރިޔަށްގެންދާ އެއްވެސް ޙަރަކާތެއް ނުބެއްވުމަށް ވަނީ އިލްތިމާސްކޮށްފައެވެ. އޭގެތެރޭގައި ކައިވެނި ޙަފުލާތަކާއި، ތަޢުޒިޔާކިޔުމުގެ އެއްވުންތަކާއި، ޕާޓީތައް ބޭއްވުންވަނީ މަނާކޮށްފައެވެ.

ކާފިއުގެ އަމުރު ލުއިކޮށް ހުއްދަދެއްވާފައިވާއިރު، މިހާރު އެޤައުމުގައި ކޮވިޑް-19 އާއި ގުޅިގެން ތަންފީޒުކުރަމުންދާ އުޞޫލުތަކާއި ޚިލާފުވާ ވަކި ވަކި ފަރުދުންނާއި ކުންފުނިތަކާއި ކާރުޚާނާތައް ޖޫރިމަނާކޮށް ހަރުކަށި ފިޔަވަޅު އެޅުމަށް ރަސްގެފާނުވަނީ މަދަނީ ފުލުހުންނަށާއި ސަލާމަތީ ބާރުތަކައް އަންގަވާފައެވެ.