ކޭޝްފްލޯ މައްސަލަ: އެމްއެމްއޭގެ ގަވަރުނަރު އަދި ފިނޭންސް މިނިސްޓަރާ މަޖިލީހުން ބައްދަލު ކުރާނެ: މަޖިލީހުގެ ރައީސް
23 އެޕްރީލު 2020 | ބުރާސްފަތި 13:00އެމްއެމްއޭ ގަވަރުނަރު ހާޝިމް އާއި ފިނޭންސް މިނިސްޓަރު އަމީރު އާއެކު ބޭއްވޭ ބައްދަލުވުމުން ކުރިއަށް ދާނީ ވީޑިއޯ ކޮންފަރެންސް މެދުވެރިކޮށް
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު
ކޮވިޑް-19 ރޯގާއާ ގުޅިގެން އަންނަ އިގްތިޞާދީ އަދި މާލީ ލޮޅުމާއެކު ދައުލަތުގެ ޚަރަދުތަކަށް ބޭނުންވާ ކޭޝް ފްލޯ ހޯދުމާ ގުޅޭ މައްސަލައަށް ހައްލެ ހޯދުމުގައި، ރައްޔިތުންގެ މަޖިލީހުން ރާއްޖޭގެ މަރުކަޒީ ބޭންކް ކަމަށްވާ މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ގަވަރުނަރު އަލީ ހާޝިމް އާއި ފިނޭންސް މިނިސްޓަރު އިބްރާހީމް އަމީރުއާ ބައްދަލު ކުރައްވާނެ ކަމަށް މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެ އެވެ.
ރައްޔިތުންގެ މަޖިލީހުގެ ބުރާސްފަތި ދުވަހުގެ ޖަލްސާގައި ވާހަކަ ދައްކަވަމުން ރައީސް ނަޝީދު ވިދާޅުވީ ސަރުކާރުގެ ޚަރަދުތަށް ކުރުމަށް މިވަގުތަށް ބޭނުންވާ ފައިސާ ހޯދުމަށް، މިހާރު މަޖިލީހުގެ ޖަލްސާތައް ކުރިއަށް ގެންދަވާ ގޮތަށް، ވީޑިއޯ ކޮންފަރެންސް މެދުވެރިކޮށް އެމްއެމްއޭގެ ގަވަރުނަރު ހާޝިމް އާއި ފިނޭންސް މިނިސްޓަރު އަމީރުއާ ބައްދަލު ކުރައްވައި، މަޖިލީހުގެ މެމްބަރުން ބޭނުންވާ މައުލޫމަތު ހޯދުމުގެ ފުރުސަތު ލިބިލައްވާނެ ކަމަށެވެ.
ރައީސް ނަޝީދު ވިދާޅުވީ، ސަރުކާރުން އަންދާޒާ ކޮށްފައިވާ އަދަދަށް މިއަހަރު ފަތުރުވެރިން ރާއްޖެ ޒިޔާރަތް ކުރުމަކީ މިހާލަތުގައި ވާނެކަމެއް ކަމަށް ގަބޫލު ކުރެއްވޭ ކަމަށެވެ.
ރައީސް ނަޝީދު ވިދާޅުވީ، މަޖިލީހުގެ މެމްބަރުން ކަންކަމާއި މެދު ވިސްނަން ޖެހޭކަމަށާއި، މިއީ ވިސްނާނުލާ ކުރިއަށް ގެންދެވޭނެ މަސައްކަތެއްނޫންކަމަށެވެ.
މިހާރު ހިނގަމުދާ 19 ވަނަ ރައްޔިތުންގެ މަޖިލީހުގައި އޮތީ އެމްޑީޕީގެ މެޖޯރިޓީކަން ފާހަގަކުރައްވާ ރައީސް ނަޝީދު ވިދާޅުވީ ސަރުކާރަކީ ވެސް އެމްޑީޕީގެ ވަރަށް ބޮޑު މަސްލަހަތެއް އޮތް، ސަރުކާރެއްކަމަށްވާތީ، ސަރުކާރުގެ ކާމިޔާބީއާ ގުޅިފައިވަނީ ވެސް ހަމަ މިމަޖިލީހާ ކަމަށެވެ.
މަޖިލީހުގެ ރައީސް، ރައީސް ނަޝީދު ވަނީ ސަރުކާރުގެ ކޭޝްފްލޯ އިތުރު ކުރުމަށް ހުށަހަޅާފައިވާ މައްސަލަ އަވަހަށް ނިންމާދެއްވުމަށްޓަކައި އަންނަ ހޮނިހިރު ދުވަހާއި އާދިއްތަ ދުވަހު ވެސް މަޖިލީހުގެ ޖަލްސާތައް ކުރިއަށް ގެންގޮސް އެމައްސަލައާމެދު ގޮތެއް ނިންމަވާނެ ކަމަށް ވިދާޅުވެފަ އެވެ.
ފިނޭންސް މިނިސްޓަރު އަމީރު ސަރުކާރުގެ ކޭޝްފްލޯ އިތުރު ކުރުމަށް ހުށަހަޅުއްވާފައިވަނީ 4.2 ބިލިއަން ރުފިޔާ އެވެ.
