ސަރުކާރުގެ ކޭޝްފްލޯ ރަނގަޅުކުރުމަށް ރައްޔިތުންގެ މަޖިލީހަށް ހުށަހަޅާފައިވާ މައްސަލަ ވީހާވެސް އަވަހަކަށް ނިންމަވާލެއްވުމުގެ ގޮތުން އަންނަ ހޮނިހިރު ދުވަހާއި އާދިއްތަ ދުވަހުވެސް ރައްޔިތުންގެ މަޖިލީހުގެ ޖަލްސާތަކެއް ބޭއްވުމަށް ނިންމައިފި އެވެ.

ބުރާސްފަތި ދުވަހު ބޭއްވި ރައްޔިތުންގެ މަޖިލީހުގެ ޖަލްސާގައި ސަރުކާރުގެ ކޭޝްފްލޯ އިތުރު ކުރުމަށް ހުށަހަޅާފައިވާ މައްސަލަ މަޖިލީހުގެ ތަޅުމަށް ހުށަހެޅުއްވަމުން މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވީ، އަންނަ ބުރާސްފަތި ދުވަހުގެ ނިޔަލަށް އެމައްސަލަ ނިންމާލުމަށް ގަސްތުކުރައްވާ ކަމަށެވެ. ނަމަވެސް ފަހުން ރައީސް ނަޝީދު ވިދާޅުވީ، އަންނަ ބުރާސްފަތި ދުވަހަކީ މިމަހުގެ ފަހު ދުވަހަށް ވާތީ، މިމަހުގެ 28 ވަނަ ދުވަހުގެ ކުރިން މިމައްސަލަ ނިންމަންޖެހޭ ކަމަށް ގަބޫލްކުރައްވާ ކަމަށެވެ.

ރައީސް ނަޝީދު ވިދާޅުވީ ކޭޝްފްލޯގެ މައްސަލަ ކުރިއަށް ގެންދިއުމަށް އަންނަ ހޮނިހިރު ދުވަހާއި އާދިއްތަ ދުވަހު މަޖިލީހުގެ ޖަލްސާއެއް ބޭއްވޭނެ ކަމަށެވެ. މިކަން އިއުލާން ކުރައްވަމުން ރައީސް ނަޝީދު ވިދާޅުވީ، މިމަހުގެ 29 ނުވަތަ 28 ގެ ނިޔަލަށް ސަރުކާރަށް 800 މިލިއަން ރުފިޔާ ބޭނުންވާނެ ކަމަށް އެމަނިކުފާނަށް ގަބޫލުފުޅު ކުރެއްވޭ ކަމަށެވެ.

އަންނަ ހޮނިހިރު ދުވަހަކީ މިއަހަރުގެ ރަމަޟާން މަހުގެ ދެ ވަނަ ދުވަހުވެ. އަދި އާދިއްތަ ދުވަހަކީ އާއްމު އުސޫލުން މަޖިލީހުގެ ޖަލްސާތައް ބޭއްވާ ދުވަހެއްވެސް ނޫނެވެ.

މަޖިލީހުން އާންމު އުސޫލުން ޖަލްސާތައް ބާއްވަނީ، ކޮންމެ ހޯމަ، އަންގާރަ އަދި ބުދަ ދުވަހެއްގަ އެވެ.

ފިނޭންސް މިނިސްޓަރ އަމީރު ސަރުކާރުގެ ކޭޝްފްލޯއަށް 4.2 ބިލިއަން ރުފިޔާ އިތުރުކުރުމަށް ހުށަހަޅާފައިވަނީ ކޮވިޑް-19 އާ ގުޅިގެން އަންނަ އިގްތިޞާދީ އަދި މާލީ ލޮޅުމާއެކު ދައުލަތުގެ ޚަރަދުތަކަށް ބޭނުންވާ ފައިސާ ހޯދުމުގެ ގޮތުން ނެވެ. އެގޮތުން 4.2 ބިލިއަން ރުފިޔާ 1 އަހަރު ދުވަހުގެ މުއްދަތަށް ފައިނޭންސް ކޮސްޓެއް ނުހިމެނޭ ގޮތަށް އޯވަރޑްރޯ ކުރެވޭ ގޮތަށް ހަމަޖެހިގެން ދިއުމަކީ ދައުލަތުގެ ޚަރަދުތައް ހަމަޖައްސައި ޚިދުމަތުގެ ކަށަވަރުކަން ދެވޭނެކަމެއްކަމަށް ފިނޭންސް މިނިސްޓަރ އަމީރު ވިދާޅުވެފައިވެއެވެ.

ދައުލަތުގެ ޚަރަދަށް ޒިންމާވުމުގެ ގާނޫނުގެ 32 ވަނަ މާޢްދާގައި ބުނަނީ، ސަރުކާރުގެ އޯވަރޑްރާފްޓް ލިމިޓްގެ ގޮތުގައި ކަނޑައަޅާފައިވާ މިންވަރަކީ ވޭތުވެދިޔަ 3 އަހަރު ސަރުކާރަށް ލިބުނު ޖުމްލަ އާމްދަނީގެ މައްޗަށް ބިނާކޮށް، އަހަރަކަށްޖެހޭ އެވްރެޖް އާމްދަނީން 1 ޕަސެންޓަށްވުރެ އިތުރު ނުވާނޭގޮތުގެ މަތިން ސަރުކާރަށް އޯވަރޑްރާފްޓް (މަރުކަޒީ ބޭންކުން ދަރަންޏަށް ފައިސާ ނެގުން) ދެވިދާނެ ކަމަށެވެ. އެގޮތުން ބަލާއިރު، ސަރުކާރަށް މަރުކަޒީ ބޭންކުން ލިބެން އޮތް އޯވަރޑްރާފްޓްގެ އަދަދަކީ 219 މިލިއަން ރުފިޔާ އެވެ. އެއީ ވޭތުވެދިޔަ 3 އަހަރުގެ ޖުމްލަ އާމްދަނީގެ އަހަރަކަށް ޖެހޭ އެވްރެޖް އާމްދަނީ 1 ޕަސެންޓް މިންވަރަކީ 219 މިލިއަން ރުފިޔާ ކަމަށްވާތީ އެވެ.