ގިނަ އަދަދެއްގެ މެޑިކަލް ސްޓޫޑެންޓުން އަމަލީ މައިދާނަށް ނުކުމެއްޖެ

ރާއްޖެއިން ބޭރުގައި ކިޔަވަމުންދިޔަ ދިވެހި މެޑިކަލް ދަރިވަރުންގެ ތެރެއިން ގިނަ އަދަދެއްގެ ދަރިވަރުން އަމަލީ މައިދާނުގައި މަސައްކަތް ކުރަން ފަށައިފި އެވެ.

އަންގާރަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި އެންއީއޯސީގެ ތަރުޖަމާނު މަބްރޫކް އަޒީޒު ވިދާޅުވީ ރާއްޖެއިން ބޭރުން އައި މެޑިކަލް ދަރިވަރުންގެ ތެރެއިން ގިނަ އަދަދެއްގެ ދަރިވަރުން އަމަލީ މައިދާނުގައި މަސައްކަތް ކުރަން ފަށާފައިވާ ކަމަށެވެ. އެގޮތުން ކަރަންޓީން ފެސިލިޓީތަކުން ކަރަންޓީން ނިންމުމަށްފަހު 78 މެޑިކަލް ސްޓޫޑެންޓުން ދޫކޮށްލާފައިވާ ކަމަށެވެ.

މީގެ ތެރެއިން ގިނަ އަދަދެއްގެ ދަރިވަރުން އައިޖީއެމްއެޗްގައި އަދި މެޑިކަލް ކްލަސްޓާގެ އެންއީއޯސީގައި މަސައްކަތް ކުރަމުންދާ ކަމަށެވެ. އަދި އެ ދަރިވަރުންނަށް ބޭނުންވާ ތަމްރީނުތައް ދެމުންދާ ކަމަށް ވެސް މަބްރޫކް ވިދާޅުވި އެވެ.

މީގެ އިތުރުން ނޭޕާލް އަދި ބަންގުލަދޭޝްގައި ތިބި މެޑިކަލް ދަރިވަރުންގެ ތެރެއިން ގިނަ ދަރިވަރުން ވަނީ މި ހަފުތާގެ ތެރޭގައި ރާއްޖެ އަނބުރާ އައިސްފަ އެވެ. އަދި މީގެ ތެރެއިން 46 ދަރިވަރަކު މިވަގުތު ކަރަންޓީން ފެސިލިޓީތަކުގައި އެބަތިބި ކަމަށާއި، އެ ދަރިވަރުންގެ ވެސް ކަރަންޓީންގެ މުއްދަތު ނިންމުމަށްފަހު މަސައްކަތަށް ނުކުންނަވާނެ ކަމަށެވެ.

ރާއްޖޭގެ މިހާރުގެ ހާލަތަށް ރިއާޔަތްކޮށް އެންއީއޯސީން ބުނެފައިވަނީ ރާއްޖޭގައި މިވަގުތު ތިބީ ކޮންމެ 1000 މީހަކަށް 2 ޑޮކްޓަރުންނާއި 7 ނަރުހުން ކަމަށެވެ. މީގެ އިތުރުން ބަންގުލަދޭޝުން ވަނީ އެ ގައުމުގެ 10 މީހުން ހިމެނޭ މެޑިކަލް ޓީމެއް ރާއްޖެ ފޮނުވާފަ އެވެ.