ކާޑުގެ ބާވަތްތައް ފިހާރަތަކަށް ޑެލިވަރީކުރުމުގެ މައްސަލަ ހައްލުކުރުމުގެ މަސައްކަތް އެބަކުރެވޭ: މަބްރޫކް
20 އެޕްރީލު 2020 | ހޯމަ 13:11ކާޑުގެ ބާވަތްތައް ފިހާރަތަކަށް ޑެލިވަރީ ކުރުމަށް ހާއްސަ މަސައްކަތްތަކެއް އެބަކުރެވޭ
އެސްޓީއޯގެ ކާޑުގެ މާވަތްތަކެއް ޑެލިވަރީ ކުރަނީ (ފައިލް ފޮޓޯ)
ފިހާރަތަކަށް ކާޑުގެ ބާވަތްތައް ލިބުމުގައި ދަތިތަކެއް އުޅޭތީ، އެމައްސަލަ ހައްލުކުރުމުގެ މަސައްކަތް ކުރަމުންދާ ކަމަށް ނޭޝަނަލް އެމަންޖެންސީ އޮޕަރޭޝަން ސެންޓަރުގެ ތަރުޖަމާނު މަބްރޫކް އަޒީޒު ވިދާޅުވެއްޖެ އެވެ.
ދަރުބާރު ގޭގައި ބާއްވަމުން އަންނަ ނޫސްވެރިންގެ ބައްދަލުވުންތަކުގެ ތެރެއިން ހޯމަ ދުވަހުގެ ނޫސްވެރިންގެ ބައްދަލުވުމގައި މަބްރޫކް ވިދާޅުވީ، ކާޑުގެ ބާވަތްތައް އެސްޓީއޯއިން ޑެލިވަރީ ކުރަމުންދިޔައީ މަޖޫރީން ނުވަތަ ވަކި ބަޔަކު މެދުވެރިކޮށްކަމަށެވެ. އަދި މި ލޮކްޑައުންގެ ހާލަތުގައި ފިހާރަތަކަށް ކާޑުގެ ބާވަތްތައް ފަސޭހައިން ޑެލިވަރީ ކުރުމަށްޓަކައި ހާއްސަ ކޮމެޓީއެއް ހަދައި މަސައްކަތް ކުރަމުންދާ ކަމަށްވެސް މަބްރޫކް ވިދާޅުވި އެވެ.
މީގެކުރިން ބޭއްވި ނޫސްވެރިކަން ބައްދަލުވުންތަކުގައި މަބްރޫކް އާއި ކަމާބެހޭ އިދާރާތަކުގެ ފަރާތްތަކުން ބުނަމުން ދިޔައީ ކާބޯތަކެތި ހުސްނުވެ ލިބެމުންދާނެ ކަމަށެވެ. ނަމަވެސް ތަކެތި ޑެލިވަރީ ކުރުމުގައި އުނދަގޫތަކެއް ދިމާވެފައިވާތީ، އެކަން ހައްލު ކުރުމަށް މަސައްކަތް ކުރަމުން ދާކަމަށް މަބްރޫކް ވިދާޅުވެފައި ވެއެވެ.
އެސްޓީއޯއިން ކާޑުގެ ބާވަތްތައް ޑެލިވަރީ ކުރުމުގައި އުނދަގޫތަކެއް އުޅޭތީ މާލޭ ބައެއް ފިހާރަތަކުން ކާޑުގެ ބާވަތްތައް ވަނީ ހުސްވެފަ އެވެ.
