ސިއްހީ ހިދުމަތްތަތެރިންގެ މަސައްކަތަށް އަދާކުރަންޖެހޭ ދަރަނި ބޮޑު: ރައީސް
18 އެޕްރީލު 2020 | ހޮނިހިރު 14:10ރައީސް ވަނީ ސިއްހީ ހިދުމަތްތެރިންނަށް ޝުކުރު އަދާކުރައްވާފައި
ކޮވިޑް-19 އާއި ގުޅިގެން ފްރަންޓް ލައިންގައި މަސައްކަތް ކުރާ ފަރާތްތަކުން ހަރަކާތްތެރިވަނީ
ސިއްހީ ހިދުމަތްތެރިންގެ މަސައްކަތަށް އަދާކުރައްވަންޖެހޭ ދަރަނި ބޮޑުކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ދިވެހި ޑޮކްޓަރުންގެ ދުވަހު މުނާސަބަތުގައި އެ ފަރާތްތައް ކުރައްވަމުން ގެންދަވާ މަސައްކަތް ފާހަގަކުރައްވާ ދުވަހު ތަހުނިޔާ ދައްނަވަމުން ރައީސް ވިދާޅުވީ މި ދުވަސް ބައްދަލުކުރެއްވީ ދިވެހި ޑޮކްޓަރުން މިހާރު އޮތް ނާޒުކު ހާލަތުގައި ކުރައްވަމުން ގެންދަވާ މަސައްކަތާއި ވަމުންދާ ގުރުބާނީތައް އެތައް ގުނައަކުން ބޮޑުވެފައިނިކޮށް ކަމަށެވެ. އަދި ސިއްހީ ދާއިރާގައި މަސައްކަތް ކުރައްވާ ފަރާތްތަކަށް ދިވެހިން އަދާކުރައްވަން ޖެހޭ ދަރަނި ބޮޑުކަމަށް ރައީސް ވިދާޅުވިއެވެ.
ރައީސް ވިދާޅުވީ ކޮވިޑް-19 އާއި ގުޅިގެން ދިވެހި ރައްޔިތުން ސަލާމަތާއި ރައްކާތެރިކަމަށް އެ ފަރާތްތަކުން ކުރައްވާ މަސައްކަތްތަކާއި ކުރައްވަމުން ގެންދަވާ ނުރައްކާތެރި ކަންކަމަށް ހިތުގެ އެންމެ ފުންމިނުން ޝުކުރު އަދާކުރައްވާ ކަމަށެވެ.
ދިވެހި ޑޮކްޓަރުންގެ ދުވަސް މިއަދު ފާހަގަކުރާއިރު ރާއްޖޭގައި މަސައްކަތް ކުރާ ހުރިހާ ޑޮކްޓަރުންނާއި ސިއްހީ ހިދުމަތްތެރިން ގެންދަވަނީ ކޮވިޑް-19 ގެ ބަލި މަޑުކަމުން އަރައިގަނެ ސަލާމަތުގެ އައްސޭރިއަށް ވާސިވުމަށް ބުރަ މަސައްކަތް ކުރައްވަމުންނެވެ.
ދުވަހުގެ ތަހުނިޔާ އަދާކުރައްވަމުން ހެލްތް މިނިސްޓަރު އަބްދުﷲ އަމީން ވިދާޅުވީ ސިއްހީ ހިދުމަތްތެރިންގެ ފަނޑުވުމެއް ނެތް ހިތްވަރު ފެނިވަޑައިގަންނަވާ ކަމަށާއި، ސިއްހީ ހިދުމަތްތެރިންނަކީ ވަރުބަލިކަމެއް ނެތި، ކޮވިޑް19 އާ ދެކޮޅަށް ހަނގުރާމަކުރާ ހިތްވަރުގަދަ ފަހުލަވާނުންގެ ގޮތުގައި މިނިސްޓަރު ވަނީ ސިފަކުރައްވާފައެވެ.
ސިއްހީ ހިދުމަތްތެރިން ކުރައްވާ މަސައްކަތް ފާހަގަ ކުރައްވާ މިނިސްޓަރު އަމީން ވަނީ ހުރިހާ ރައްޔިތުން އެއްބައިވެ، ފަރުދީ ޒިންމާ އަދާކޮށް ކޮވިޑް19 އާ ދެކޮޅަށް ތެދުވުމަށް ގޮވާލައްވާފައެވެ.
