ކޮވިޑް-19 ގެ ކަންތަކައް އެހީވުމަށް 500 މިލިއަން ޑޮލަރު ދޭން ސައުދީން ވައުދުވެއްޖެ
150 މިލިއަން ޑޮލަރު ދޭން ހަމަޖެހިފައިވަނީ ކޯލިޝަން ފޮރ އެޕިޑެމިކް ޕްރިޕެއަރޑްނެސް އެންޑް އިނޮވޭޝަންއަށް
މިދިޔަ މަހު ބޭއްވި ޖީ-20 ގެ އެކްސްޓަރ އޯޑިނަރީ މީޓިންގް ގެތެރެއިން
ކޮވިޑް-19 އިން ސަލާމަތްވުމަށް ބައިނަލްއަޤުވާމީ ޖަމްޢިއްޔާ ޖަމާއަތްތަކުން ކުރަމުންދާ މަސައްކަތުގައި އެހީތެރިވުމަށް، ސައުދީއަރަބިއްޔާއިން 500 މިލިއަން ޑޮލަރު ދިނުމަށް ވައުދުވެއްޖެއެވެ.
އިޤުތިޞާދީ ގޮތުން ކުރިއަރާފައިވާ ޤައުމުތަކުގެ ނުވަތަ ޖީ-20 ގެ ރިޔާސަތު މިހާރު ބަލަހައްޓަމުންދާ ސައުދީން މިފަދަ މާލީ އެހީއެއް ދޭން ނިންމީ، ކޮވިޑް-19 އިން އަރައިގަތުމަށް ކުރަމުންދާ މަސައްކަތުގައި ބޮޑު ގޮންޖެހުންތަކާއި ކުރިމަތިވެފައިވާތީ އެކަމަށް ޙައްލެއް ގެނައުމަށް އެހީތެރިވެދިނުމުގެ ގޮތުންނެވެ. ސައުދީން ދޭ މިއެހީ ބޭނުން ކުރާނީ، ކުއްލި ހާލާތްތަކުގައި އެހީތެރިވުމަށާއި، ބައިނަލްއަޤުވާމި ފެންވަރެއްގައި ސަވައިލެންސް ޕްރޮގުރާމުތައް ހިންގުމަށާއި، ޞިއްޙީ ޚިދުމަތްތެރިންނަށް ބޭނުންވާ ސަލާމަތީ އާލާތްތައް ގަތުމަށް ކަމަށް ޚަބަރުލިބެއެވެ.
ސައުދީ އަރަބިއްޔާގެ ދައުލަތުގެ މީޑިއާއިން ރިޕޯޓުކުރާގޮތުގައި، ސައުދީން ވައުދުވީ 500 މިލިއަން ޑޮލަރުގެތެރެއިން، 150 މިލިއަން ޑޮލަރު ދޭން ހަމަޖެހިފައިވަނީ ކޯލިޝަން ފޮރ އެޕިޑެމިކް ޕްރިޕެއަރޑްނެސް އެންޑް އިނޮވޭޝަންއަށް، 150 މިލިއަން ޑޮލަރު ދަ ގްލޯބަލް އެލަޔަންސް ފޮރ ވެކްސިންސް އެންޑް އިމުނައިޒޭޝަންސްއަށެވެ. އަނެއް 200 މިލިއަން ޑޮލަރު ދޭން ނިންމާފައިވަނީ ކޮވިޑް-19 އާއި ދެކޮޅަށް ހަނގުރާމަ ކުރަމުންދާ އެހެނިގެން ބައިނަލް އަޤުވާމީ އަދި ޞަރަޙައްދީ ޖަމްޢިއްޔާ ޖަމާއަތްތަކަށެވެ.
ދުނިޔޭގެ ފެންވަރެއްގައި ކޮވިޑް-19 އާއި ދެކޮޅަށް ކުރަމުންދާ މަސައްކަތައް 8 ބިލިއަން އެމެރިކާ ޑޮލަރު ބޭނުންވާނެކަމަށް ބައިނަލްއަޤުވާމީ ޖަމާއަތްތަކުން ވަނީ އަންދާޒާކޮށްފައެވެ.
