ފާއިތުވި 14 ދުވަހުގެތެރޭގައި މ. ޖަރީމާގެއަށް ޒިޔާރަތްކޮށްފައިވާ ފަރާތްތައް އެޗްޕީއޭއަށް ރިޕޯޓުކުރުމަށް އެދިއްޖެ

މިއަދު މާލެއިން ކޮވިޑް-19 އަށް ޕޮޒިޓިވްވީ މީހާ ދިރިއުޅެމުންދާ ގެ ކަމަށްވާ މ. ޖަރީމާގެއަށް ފާއިތުވެދިޔަ 14 ދުވަހުގެ ތެރޭގައި ޒިޔާރަތްކޮށްފައިވާ ފަރާތެއް ކަމުގައިވާނަމަ ހެލްތު ޕްރޮޓެކްޝަން އޭޖެންސީ (އެޗްޕީއޭ) އަށް ރިޕޯޓުކުރުމަށް އެދިއްޖެއެވެ.

ރާއްޖެއެމްވީއަށް މަޢުލޫމާތު ހިއްސާކުރަމުން އެޞަރަޙައްދުގެ ގޭބިސީއެއްގައި އުޅޭ މީހަކު ބުނީ، އެޞަރަހައްދު ލޮކްޑައުންކޮށް، ކޮންޓެކްޓް ޓްރޭސިންގް ހަދަމުންދާކަަމަށެވެ. އެމީހާ ބުނެފައިވަނީ، މ. ޖަރީމާގެއަށް ފާއިތުވެ ދިޔަ 14 ދުވަހު ޒިޔާރަތްކޮށްފައިވާ މީހުން އަމިއްލަގޮތުން އެޗްޕީއޭއަށް ރިޕޯޓުކުރުމަށް އެދިފައިވާކަމަށެވެ.

މ. ޖަރީމާގެ ހިމެނޭ ޞަރަޙައްދު (ބޮންޑިބަތް ޕާކު ޞަރަޙައްދު) ގެ ބައެއް ގޭބިސީތަކުގެ ކޮންޓެކްޓް ޓްރޭސިންގ ވަނީ ހަދާފަ އެވެ. އަދިވެސް އެ ސަރަހައްދު ލޮކްޑައުންކޮށް ފުލުހުންދަނީ އެސަރަހައްދުގައި ޙަރަކާތްތެރިވަމުންނެވެ.

ޕޮޒިޓިްވވީ މީހާ ކޮވިޑް-19 އަށް ޓެސްޓްކޮށްފައިވަނީ ފްލޫ ކްލިނިކަށް ޑޮކްޓަރަށް ދެއްކުމުން ބަލީގެ އަލާމަތްތައް ފެނިގެންނެވެ. އޭނާ މިހާރު ވަނީ އައިސޮލޭޝަން ފެސިލިޓީއަށް ގެންގޮސްފައި ކަމަށް މައުލޫމާތު ވަނީ ލިބިފަ އެވެ.