ގޭމް އޮފް ތްރޯންސްގެ ތަރި ކްރިސްޓޮފަރ ކޮވިޑް-19 އިން ރަނގަޅުވެއްޖެ

ގޭމް އޮފް ތްރޯންސްގެ ތަރި ކްރިސްޓޮފަރ ހިވްޔު ކޮވިޑް-19 އިން ރަނގަޅުވެއްޖެއެވެ.

ނޯވޭޖިއަންއަށް އުފަން 41 އަހަރުގެ ކްރިސްޓޮފަރ އަށް ކޮވިޑް-19 ޖެހިފައިވަނީ މިދިޔަ މާޗް މަހުގެ 16 ވަނަ ދުވަހުއެވެ. އާންމުންގެ ތެރެއަށް ކްރިސްޓޮފަރ މަޝްހޫރުވެފައިވަނީ ގޭމް އޮފް ތްރޯންސްގެ ކެރެކްޓަރ ކަމުގައިވަ ތޮރްމުންދް ޖައެންޓްސްބޭންގެ ނަމުންނެވެ.

އޭނާ ވަނީ ކޮވިޑް-19 އިން ރަނގަޅުވިކަމުގެ ހަބަރު ދީފައެވެ. އިންސްޓަގްރާމް މެދުވެރިކޮށް އޭނާގެ ފޭނުންނަށް ހަބަރު ދެމުން ކްރިސްޓޮފަރ ބުނެފައިވަނީ އޭނާ ބަލިން ރަނގަޅުވެފައިވާ ކަމަށާއި، ހާލު މިހާރު ރަނގަޅު ކަމަށެވެ. އަދި އޭނާގެ އަންހެނުން ގްރޫ މޮލްވަރ ހިވްޔު ވެސް ބަލިން ރަނގަޅުވެފައިވާ ކަމަށެވެ.

ކްރިސްޓޮފަރ ބުނެފައިވަނީ އޭނަގެ ގައިން ފެނުނީ ކޮވިޑް-19 ގެ ކުޑަ އަލާމާތްތަކެއް ކަމަށެވެ. އަދި މި ބައްޔާ ހަނގުރާމަ ކުރަމުން އަންނަ ހުރިހާ ފަރާތަކަށް އޭނާ ވަނީ ހެޔޮއެދުންތައް ފޮނުވާފައެވެ. އަދި މަރުވެފައިވާ ފަރަތްތަކުގެ އާއިލާތަކަށް އޭނާ ވަނީ ހަމްދަރުދީ ފޮނުވާފައެވެ.

އޭނާ ވަނީ ހުރިހާ ފަރާތްތަކުން ވެސް މި ބަލިން ރައްކާތެރިވެ ތިބުމަށް އެދިފައެވެ. އަދި ގިނަގިނައިން އަތްދޮވެ، ސޯޝަލް ޑިސްޓޭންސް ބެހެއްޓުމަށް ވަނީ ނަސޭހަތްތެރިވެފައެވެ.