ކޮވިޑް-19 ގެ ސަބަބުން ޤާނޫނު ތަންފީޒުކުރާ އިދާރާތަކާ ގުޅޭ މައްސަލައެއް ނުވަތަ އެއިން އިދާރާއެއްގެ މުވައްޒަފެއްގެ މައްސަލައެއް، ނެޝަނަލް އިންޓަގްރިޓީ ކޮމިޝަން (އެންއައިސީ) އަށް ހުށަހަޅަން ބޭނުންވާނަމަ ފޯނުންނާއި އީމެއިލް މެދުވެރިކޮށް އެކޮމިޝަނަށް މައްސަލަ ހުށެހެޅޭނެ އިންތިޒާމް ހަމަޖައްސައިފިއެވެ.

އަންގާރަ ދުވަހު އެންއައިސީއިން ނެރުނު ބަޔާނުގައި ވަނީ އެ ކޮމިޝަނަށް ފޯނުން މައްސަލައެއް ހުށަހަޅަން ބޭނުންވާ ފަރާތްތަކުން 7967329 އަށް ނުވަތަ 3302582 ނަންބަރަށް ގުޅުމަށެވެ. އަދި އީމެއިލް [email protected] މެދުވެރިކޮށް މައްސަލަ ހުށެހޭނެ ކަމަށް އެންއައިސީން ބުންޏެވެ.

މީގެ އިތުރުން އެންއައިސީން ބުނީ ކޮވިޑް-19 ވައިރަސް އާއި ގުޅިގެން އިޢުލާންކޮށްފައިވާ ޞިއްޙީ ކުއްލި ނުރައްކަލުގެ ޙާލަތުގައި އެކޮމިޝަނުން ރައްޔިތުންނަށް ޚިދުމަތް ދިނުން މެދުނުކެނޑި ކުރިއަށްދާ ކަމަށެވެ. އެގޮތުން މުވައްޒަފުން ގޭގައި މަސައްކަތް ކުރުމުގެ އިންތިޒާމް ހަމަޖައްސައި، އޮފީސް ހުޅުވައިގެން ކޮންމެހެން ކުރަންޖޭ މަސައްކަތްތަކަށް، އެވަގުތަކު ނެރެންޖެހޭ އެންމެ މަދު މުވައްޒަފުން ނެރެގެން މަސައްކަތް ކުރަމުންދާކަމަށެވެ.

އެންއައިސީން ބުނީ ޤާނޫނު ތަންފީޒުކުރާ އިދާރާތަކުން ރައްޔިތުންނަށް ދެމުންގެންދާ ޚިދުމަތްތައް އެޗްޕީއޭގެ ލަފާއާއި އެއްގޮތަށް، މުވައްޒަފުންގެ ރައްކާތެރިކަން ކަށަވަރުވާނޭހެން، މެދުނުކެނޑި ކުރިއަށް ގެންދިއުމާއެކު، އެއިދާރާތަކުން ބަލަހައްޓަވަމުންދާ ޖަލުތަކާއި ކަސްޓޯޑިއަލް ސެންޓަރުތަކުގައި ރައްކާތެރިކަމުގެ ފިޔަވަޅުތައް އަޅައި ބަލިފެތުރޭ ޙާލަތުގައި ޢަމަލުކުރާނެ އުސޫލުތައް ހެދިފައިވާކަން އެ ކޮމިޝަނުން ކަށަވަރު ކުރަމުންދާ ކަމަށް އެންއައިސީން ބުންޏެވެ.