ޕޯޗުގަލް ގައުމީ ޓީމުގެ ބޯނަސް ކުދި ކްލަބުތަކަށް ހަދިޔާކުރަން ނިންމައިފި

ޔޫރޯ ފުޓްބޯޅަ މުބާރާތަށް ކޮލިފައިވުމުން ޕޯޗުގަލް ގައުމީ ޓީމަށް ދޭން ހަމަޖެއްސި ބޯނަސް، އެ ގައުމުގެ ދަށް ޑިވިޝަންތަކުގެ ފުޓްބޯޅަ ކްލަބްތަކަށް ހަދިޔާކުރަން ނިންމައިފި އެވެ.

ކޮރޯނާވައިރަސް (ކޮވިޑް-19) އާ ގުޅިގެން ޔޫރޯ ފުޓްބޯޅަ މުބާރާތް ވަނީ އަންނަ އަހަރުގެ ހޫނު މޫސުމުގެ ނިޔަލަށް ފަސްކޮށްފައެވެ.

ކޮވިޑް-19 އާ ގުޅިގެން ޕޯޗުގަލްގެ ކުދި ކްލަބްތަކުގެ މެދުގައި ބާއްވާ މުބާރާތްތައް މިދިޔަ ހަފްތާގައި އެއްކޮށް ކެންސަލްކޮށްފައި ވާއިރު، އެ ކްލަބުތަކަށް ވަނީ މާލީ ގޮތުން ގޮންޖެހުންތަކާ ކުރިމަތިލާން ޖެހިފައެވެ.

އެހެންކަމުން އެންމެ ފަހުގެ ޔޫރޯ ފުޓްބޯޅަ މުބާރާތުގެ ޗެމްޕިއަންކަން ހޯދާފައިވާ ޕޯޗުގަލް ގައުމީ ޓީމުގެ އިސްނެގުމާއެކު ޕޯޗުގީސް ފުޓްބޯލް ފެޑެރޭޝަނުން ވަނީ ގައުމީ ޓީމުގެ ބޯނަސް ހިމަނައިގެން ކުދި ކްލަބުތަކަށް އެހީވާން ހާއްސަ ފަންޑެއް އުފައްދާފައެވެ. ރިޕޯޓުތައް ބުނާ ގޮތުން ޔޫރޯއަށް ކޮލިފައިވުމުން ޕޯޗުގަލް ޓީމަށް ދޭން ޖެހޭ ބޯނަހުގެ ޖުމްލަ 5.1 މިލިއަން ޑޮލަރަށް އަރަ އެވެ.

ކޮވިޑް-19 އާ ގުޅިގެން ދުނިޔޭގެ ފުޓްބޯޅަ ހުއްޓުމަކަށް އައިސްފައިވާއިރު، ޔޫރަޕްގެ ގިނަ ލީގުތަކެއްގެ ކުޅުން ވަނީ މެދ ކަނޑާލާފައެވެ. މިވަގުތު ޔޫރަޕްގައި ކުރިއަށްދާ ހަމައެކަނި ފުޓްބޯޅަ ލީގަކީ ބެލަރޫސިއަން ޕްރިމިއާ ލީގެވެ.

ޕޯޗުގަލްގެ ފުޓްބޯޅަ ސީޒަން ވެސް މުއްދަތެއް ނެތް ގޮތަށް ފަސްކޮށްފައިވާއިރު، ޕޯޗުގީސް ފުޓްބޯލް ފެޑެރޭޝަނުން އަންނަނީ އަންނަ މެއި މަހު ފަހުކޮޅުގައި މެޗުތައް އަލުން ފަށަން މަސައްކަތް ކުރަމުންނެވެ.

ކޮވިޑް-19 އަށް ޕޯޗުގަލް އިން 16،900 އަށް ވުރެން ގިނަ މީހުން މިހާރު ޕޮޒިޓިވްވެފައިވާއިރު، މި ވައިރަސް ޖެހިގެން އެ ގައުމުން 500 އަށްވުރެ ގިނަ މީހުން ވަނީ މަރުވެފައެވެ.