އުތުރު ކޮރެއާއިން ޖަޕާނުގެ ކަނޑުގެ ޞަރަޙައްދަށް ނުވަތަ "އީސްޓް ސީ" އަށް ކްރޫސް މިސައިލްތަކެއް ފޮނުވާލާފައިވާކަމަށް ދެކުނު ކޮރެއާގެ އަސްކަރިއްޔާއިން ބުނެފިއެވެ.

މިކަމާއި ގުޅޭގޮތުން ދެކުނު ކޮރެއާގެ އަސްކަރިއްޔާއިން ޢާންމުކޮށްފައިވާ ބަޔާނެއްގައި، ޖޮއިންޓް ޗީފް އޮފް ސްޓާފް ވިދާޅުވެފައިވަނީ އުތުރު ކޮރެއާއިން ކުރު ރާސްތާ ކްރޫސް މިސައިލްތަކެއް ފޮނުވާލާފައިވަނީ އެޤައުމުގެ އިރުމަތީ "މުންޝޯން ބޭސް" އިން ކަމަށެވެ. ދެނުކު ކޮރެއާ އަސްކަރިއްޔާއިން ބުނެފައިވަނީ އެމެރިކާއާއި ގުޅިގެން، އުތުރު ކޮރެއާގެ އަސްކަރީ ޙަރަކާތްތައް ގާތުން ބަލަމުންދާ ކަމަށާއި އިރުމަތީ އޭޝިޔާގެ ޤައުމުތަކަށް ނުރައްކާ ކުރުމުގެ ފުރުޞަތު އުތުރުކޮރެއާއަށް ނުދޭނެކަމަށެވެ. ދެކުނު ކޮރެއާގެ އިތުރުން އިރުމަތީ އޭޝިޔާގެ އެހެން ޤައުމުތަކުންވެސް ދަނީ އަބަދުވެސް އުތުރު ކޮރެއާއަށް ފާރަލަމުންނެވެ.

ދެކުނު ކޮރެއާއިން، އުތުރު ކޮރެއާއިން ކުރު ރާސްތާ ކްރޫސް މިސައިލްތަކެއް އުދުއްސާލިކަމަށް ބުނި ނަމަވެސް، މިކަމާއި ގުޅޭގޮތުން އަދި އުތުރު ކޮރެއާއިން އެއްޗެއް ބުނެފައެއް ނުވެއެވެ. އެޤައުމުން މަޑުމަޑުން މަސައްކަތް ކުރަމުންދަނީ އަސްކަރީ ގޮތުން ބާރުވެރިވެ، ޖައްވުން ބޭރަށް އެޤައުމުގެ އުޅަނދެއް ފޮނުވުމުގެ މަސައްކަތެވެ. އުތުރު ކޮރެއާއިން ދޭތެރެ ދޭތެރެއިން ބެލިސްޓިކް މިސައިލްތައް ޓެސްޓްކުރެއެވެ. އެހެންނަމަވެސް އަދިވެސް އެޤައުމުން ބޭނުންވާ އަމާޒަކަށް ވާޞިލެއް ނުވެވެއެވެ. އެހެން ޤައުމުތަކުގެ އުދަނގުލާހުރެ އެޤައުމުން ބޭނުންވާ މި ބާވަތުގެ ކަންކަން ކުރިޔަށް ގެންދަންވަނީ ދަތިވެފައެވެ. ބައެއް ފަހަރު އެހެން ޤައުމުތަކުގެ ގޮވާލުންތަކަށް ބީރު ކަންފަތެއްދީ އެޤައުމުން ބޭނުންވާ ކަމެއް ދަނީ ކުރަމުންނެވެ.

އުތުރު ކޮރެއާއިން ދުނިޔެއަށް، އަދި ޞަރަޙައްދުގެ ޤައުމުތަކަށް ނުރައްކާވާ ފަދަ ނިއުކްލިއަރ ޕްރޮގުރާމުތައް ކުރިޔަށް ގެންދާތީ އދގެ ސަލާމަތީ މަޖިލީހުން ތަކުރާރުކޮށް އެޤައުމާއި ދެކޮޅަށް ދަތިކުރުމުގެ ފިޔަވަޅު އަޅާފައިވެއެވެ. މީގެއިތުރުން މަނާ ހަތިޔާރު އީޖާދުކުރުމާއި ގުޅޭގޮތުންވެސް ދަތިކުރުމުގެ ފިޔަވަޅު އަޅާފައިވެއެވެ