ޕްރިމިއާ ލީގުގެ މެޗުތައް ސަޕޯޓަރުން ނުވައްދައި ކުޅެނީ

ކޮރޯނާވައިރަސް (ކޮވިޑް-19) އާ ގުޅިގެން މެދުކަނޑާލާފައިވާ އިނގިރޭސި ޕްރިމިއާ ލީގުގެ މި ސީޒަނުގައި ބާކީ ނުކުޅެ ހުރި ހުރިހާ މެޗެއް ސަޕޯޓަރުން ނުވައްދައި ކުޅެން މަޝްވަރާ ކުރަމުން އަންނަ ކަމަށް ރިޕޯޓުތައް ބުނެފި އެވެ.

ޕްރިމިއާ ލީގާއި އިނގިރޭސި އެހެން ފުޓްބޯޅަ މުބާރާތްތައް އޮތީ މުއްދަތެއް ނެތްގޮތަށް ފަސްކޮށްފަ އެވެ. ލީގުތައް ކެންސަލް ނުކުރަން ޔުއެފާއިން އަންގާފައިވާއިރު، ޕްރިމިއާ ލީގުން މިހާރު އަންނަނީ ސަޕޯޓަރުން ނުވައްދައި ބާކީ ހުރި މެޗުތައް ފުރިހަމަ ކުރުމަށް މަޝްވަރާ ކުރަމުންނެވެ. އަދި މި ހާލަތުގައި ލީގުގެ ހުރިހާ މެޗެއް އިނގިރޭސި ރަސްމީ ސްޓޭޑިއަމް ވެމްބްލީގައި ކުޅެން އިނގިރޭސި އެފްއޭ އިން މަޝްވަރާ ކުރަމުން އަންނަ ކަމަށްވެސް ރިޕޯޓުތައް ބުނެއެވެ.

ރިޕޯޓުތައް ބުނާ ގޮތުން އިނގިރޭސި އެފްއޭ އިން ކްލަބްތަކާއެކު މަޝްވަރާ ކުރަމުން އަންނަނީ ޖޫން މަހުގެ ހަވަނަ ދުވަހު އަލުން ފުޓްބޯޅަ ސީޒަން ފަށައި، ފަސް ހަފްތާ ތެރޭގައި ލީގު ކުޅެ ނިންމާލުމަށެވެ. އެގޮތުން ކޮންމެ ތިން ދުވަހަކުން މެޗުތައް ކުޅޭ ގޮތް ހަދާއިރު، ބައެއް ދުވަސްތަކުގައި ހަތަރު މެޗު ނޫނީ ފަސް މެޗު ކުޅެން ވެސް މަޝްވަރާ ކުރަމުން އަންނަ ކަމަށް ރިޕޯޓުތައް ބުނެއެވެ.

ކޮވިޑް-19 އާ ގުޅިގެން މުއްދަތެއް ނެތް ގޮތަށް ޕްރިމިއާ ލީގުގެ ކުޅުން މެދުކަނޑާލާފައިވާއިރު، ސީޒަން ނުފެށި ދިގުލައިގެންދާނަމަ ޕްރިމިއާ ލީގު ކްލަބުތަކަށް ބޮޑު ގެއްލުމެއްވާން ކަމަށް ރިޕޯޓުތައް އަންނަނީ ބުނަމުންނެވެ. އެގޮތުން ޕްރިމިއާ ލީގުގެ މި ސީޒަން ނުނިންމެއްޖެނަމަ، ކްލަބުތަކަށް މާލީ ގޮތުން އެއް ބިލިއަން ޔޫރޯއަށް ވުރެ ބޮޑު ގެއްލުމެއްވާނެ ކަމަށް ވަނީ ރިޕޯޓުކޮށްފައެވެ.

ކޮވިޑް-19 ގެ ސަބަބުން ކްލަބުތަކަށް ދިމާވާނެ މާލީ ގޮންޖެހުންތަކުން އަރައިގަތުމަށް ކުޅުންތެރިންގެ މުސާރަ ކުޑަކުރަން މަޝްވަރާ ކުރަމުން އަންނައިރު، ފްރޮފެޝަނަލް ފުޓްބޯލާސް އެސޯސިއޭޝަން (ޕީއެފްއޭ) އިން ވަނީ ކުޅުންތެރިންގެ މުސާރަ ކުޑަކުރުމަށް ދެކޮޅު ހަދާފައެވެ. އެ ޔޫނިއަނުން ބުނީ ކުޅުންތެރިންގެ މުސާރައިން 30 އިންސައްތަ އުނިކުރުމުން، ކްލަބުތަކަށް ޖުމްލަ 500 މިލިއަން ޔޫރޯ އެއްކުރެވޭ ކަމަށެވެ. އެކަމުގެ ސަބަބުން ބައެއް ކްލަބުތަކުން ނާޖައިޒު ފައިދާ ނަގަން މަސައްކަތް ކުރާނެ ކަމަށްވެސް ވަނީ ބުނެފައެވެ.

މިހާތަނަށް ޕްރިމިއާ ލީގުން ކުޅުންތެރިންގެ މުސާރަ ކުޑަކޮށްފައިވަނީ ސައުތެމްޓަނާއި ވެސްޓް ހޭމް ޔުނައިޓެޑުން އެކަންޏެވެ.