ރޮނާލްޑޯއަށް ބިޑްކުރަން ރެއާލުން ތައްޔާރުވަނީ

ޕޯޗުގަލް އަދި ޔުވެންޓަސްގެ ތަރި ރޮނާލްޑޯ އަށް ބިިޑް ކުރުމަށް ރެއާލުން ތައްޔާރުވަމުން އަންނަ ކަމަށް މީޑިއާ ރިޕޯޓތައް ބުނެފިއެވެ.

މީޑިއާ ރިޕޯޓުތައް ބުނާ ގޮތުން ރޮނާލްޑޯއަށް ބިޑް ކުރުމަށް ރެއާލުން ތައްޔާރުވަމުން އަންނައިރު، ރެއާލަށް އަލުން އަނބުރާ ރޮނާލްޑޯ ގެންދިޔުމަށް އެޓީމުން ކުރާނީ 60 މިލިއަން ޔޫރޯގެ ބިޑެކެވެ.

ކޮރޯނާވައިރަސް (ކޮވިޑް-19) ގެ ސަބަބުން ޔުވެންޓަސްގެ މާލީ ހާލަތު ދަށްވާނެ ކަމަށް ބެލެވޭއިރު، އެޓީމުން އަންނަ ސީޒަނުގައި މުހިންމު ބައެއް ކުޅުންތެރިން ދޫކޮށްލާނެ ކަމަށް ބެލެވެއެވެ. އޭގެ ތެރޭގައި ރޮނާލްޑޯ ވެސް ހިމެނޭ ކަމަށް ރިޕޯޓުތައް ބުނެ އެވެ.

ރިޕޯޓުތައް ބުނާ ގޮތުން ރޮނާލްޑޯ އަލުން އެނބުރި ރެއާލްއަށް ބަދަލުވާން ބޭނުންވާ ކަމަށް އޭނާގެ އޭޖެންޓް ކައިރީގައި ވަނީ ބުނެފައެވެ. މީގެ އިތުރުން ސީޒަންގެ ކުރީ ކޮޅު ރޮނާލްޑޯ އާއި ޔުވެންޓަސްގެ ކޯޗު ސާރީއާ ދެމެދު ހިތްހަމަ ނުޖެހުންތަކެއް އުޅުނުކަމަށް ރިޕޯޓުތައް ވަނީ ބުނެފައެވެ. އެކަމަކު ސާރީ ވަނީ ފަހުން ރޮނާލްޑޯއާ އޭނާއާ ދެމެދު އެއްވެސް މައްސަލައެއް ނެތް ކަމަށް ބުނެފައެވެ.

ރޮނާލްޑޯ ރެއާލަށް ބަދަލުވާން އުޅޭކަމުގެ އަޑުތައް ގަދަވެފައިވަނިކޮށް، ރޮނާލްޑޯ ވަނީ ރެއާލްގެ ދަނޑުގައި ބާސެލޯނާއާ ދެކޮޅަށް ރެއާލް ކުޅުނު މެޗު ބަލަން ސްޕެއިނަށް ގޮސްފައެވެ. އަދި އެ މެޗުގެ ހާފް ޓައިމްގައި ރޮނާލްޑޯ ވަނީ ރެއާލްގެ ކުޅުންތެރިންނާއި ބައްދަލުކޮށްފައެވެ.

2009 ވަނަ އަހަރު މެންޗެސްޓާ ޔުނައިޓެޑުން ރޮނާލްޑޯ ރެއާލް މެޑްރިޑަށް ބަދަލުވީ އޭރުގެ އެންމެ އަގުބޮޑު ކުޅުންތެރިޔާގެ ގޮތުގައެވެ. ރެއާލް އާއެކު ހޭދަކުރި 9 ސީޒަނުގައި ރޮނާލްޑޯ ވަނީ އެޓީމަށް ކުޅެދިން 292 މެޗުން 311 ލަނޑު އެޓީމަށް ކާމިޔާބުކޮށްދީފައެވެ. އަދި ޔުވެންޓަސްއަށް ބަދަލުވެ މިހާތަނަށް ޔުވެންޓަސް އަށް އޭނާ ކުޅެދިން 53 މެޗުން ވަނީ 42 ލަނޑު އެޓީމަށް ކާމިޔާބުކޮށްދީފައެވެ. ރޮނާލްޑޯ އަކީ ރެއާލަށް މިހާތަނަށް އެންމެ ގިނަ ލަނޑު ކާމިޔާބުކޮށްދިން ކުޅުންތެރިޔާއެވެ.