މެދުކަނޑާލާފައި އޮތް ބެލްޖިއަމް ޕްރޯ ލީގު މި ހިސާބުން ކެންސަލްކުރުމަށް ފަހު، ލީގުގެ އެއްވަނައިގައި އޮތް ކްލަބު ބްރޫޖަށް ތަށި ދޭން އެ ގައުމުގެ ފުޓްބޯޅަ ލީގުގެ ބޯޑުން ނިންމާފައިވާ ކަމަށް ރިޕޯޓުތައް ބުނެފި އެވެ.

މިހާރު މުޅި ދުނިޔޭގައި ހަލުވިކަމާއެކު ފެތުރެމުން އަންނަ ކޮރޯނާވައިރަސް (ކޮވިޑް-19) ގެ ސަބަބުން ބެލްޖިއަމް ޕްރޯ ލީގު މެދުކަނޑާލާފައިވާއިރު، ލީގުގެ އެއްވަނައިގައި ބްރޫޖް އޮތީ 15 ޕޮއިންޓުގެ ލީޑަކާއެކުއެވެ. ލީގު ހުއްޓާލިއިރު، ފުރަތަމަ ބުރުގެ ބާކީ އޮތީ އެންމެ މެޗެކެވެ. ލީގު ރޭވިފައިވާ ގޮތުން ފުރަތަމަ ބުރުގައި 16 ޓީމު ކުޅޭއިރު، ދެވަނަ ބުރަށް ދަތުރުކުރާނީ ގަދަ 6 ޓީމެވެ.

ރިޕޯޓުތައް ބުނާ ގޮތުން ބެލްޖިއަމް ފުޓްބޯޅަ ލީގުގެ ބޯޑުން ވަނީ ލީގު މި ހިސާބުން ކެންސަލްކުރުމަށް ފަހު، ލީގުގެ އެއްވަނައިގައި އޮތް ކްލަބު ބްރޫޖަށް ތަށި ދޭން ނިންމާ، އެ ހުށަހެޅުން ޖެނެރަލް އެސެމްބްލީ އަށް ހުށަހަޅާފަ އެވެ. އަދި އެކަން ރަސްމީ ސިފައެއްގައި މި ނިންމުން އިއުލާންކުރާނީ މި މަހުގެ 15 ވަނަ ދުވަހު ކަމަށްވެސް ރިޕޯޓުތައް ބުނެއެވެ. އެގޮތުން ރަސްމީ ނިންމުން ނިންމާއިރު، ޔޫރަޕްގެ މަގާމުތަކަށް ހޮވޭ ޓީމުތަކާއި ރެލިގޭޓްވާ ޓީމުތައް ކަނޑައެޅާނެ ކަމަށްވެސް ރިޕޯޓުތައް ބުނެއެވެ.

ބެލްޖިއަމް ޕްރޯ ލީގު ކެންސަލް ކުރަން ނިންމި ކަމަށް ރިޕޯޓުތައް ބުނިއިރު، ދާދި ފަހުން ޔޫރަޕްގެ މައި ފުޓްބޯޅަ އިދާރާ ޔުއެފާ އިން ވަނީ އެއްވެސް ގައުމެއްގެ ފުޓްބޯޅަ ސީޒަން ކެންސަލް ނުކުރަން އެދިފައެވެ. އެހެންކަމުން ޔުއެފާގެ ލަފައެއް ނެތި ބެލްޖިއަމް ލީގު ކެންސަލްކޮށްފި ނަމަ، އަންނަ ސީޒަނުގެ ޔޫރަޕްގެ މުބާރާތްތަކުން އެ ލީގުގެ ޓީމުތަކަށް ފުރުސަތު ނުދިނުމުގެ ބިރު އެބައޮތެވެ.

މިހާރު މުޅި ދުނިޔޭގައި ހަލުވިކަމާއެކު ފެތުރެމުން އަންނަ ކޮވިޑް-19 ގެ ސަބަބުން ޔޫރަޕްގެ ގަދަ ފަސް ލީގުގެ ކުޅުން ވަނީ މެދުކަނޑާލާފައެވެ. އެއީ އިނގިރޭސި ޕްރިމިއާ ލީގާއި، ސްޕެނިޝް ލީގާއި، އިޓާލިއަން ލީގާއި، ޖަރުމަން ލީގުގެ އިތުރުން ފްރެންޗް ލީގެވެ. އަދި ޔުއެފާ އިން ވަނީ ޔުއެފާ ޗެމްޕިއަންސް ލީގާއި ޔުއެފާ ޔޫރޮޕާ ލީގުވެސް ފަސްކޮށްފައެވެ. އަދި ކުރިއަށް އޮތް ހޫނު މޫސުމަށް ތާވަލުކޮށްފައި އޮތް ޔޫރޯ ފުޓްބޯޅަ މުބާރާތާއި ކޮޕަ އެމެރިކާ ފުޓްބޯޅަ މުބާރާތް ވަނީ އަންނަ އަހަރަށް ފަސްކޮށްފައެވެ.