ބޭރުގެ އުޅަނދުފަހަރުގެ އޮފިސަރުންގެ ސެޓުފިކެޓު އަދި ސޭފްޓީ ސެޓްފިކެޓް ތަކުގެ މުއްދަތު އިތުރުކޮށްދީފި

ކަނޑުގައި ދުއްވާ ފޮރިންގ ގޮއިން އުޅަނދުފަހަރުގެ އޮފިސަރުންނަށް ދޫކުރާ ސެޓްފިކެޓް އަދި ފޮރިންގ ގޮއިންގ އުޅަނދުފަހަރު ސަރވޭ ކުރުމަށްފަހު ދޫކުރާ ސޭފްޓީ ސެޓްފިކެޓްތަކުގެ މުއްދަތު އިތުރުކޮށް ދިނުމަށް ނިންމައިފިއެވެ.

ޓްރާންސްޕޯޓް އޮތޯރިޓީން ބުނީ ކޮވިޑް-19 ފެތުރުން ކޮންޓުރޯލްކޮށް ޢާއްމު ރައްޔިތުންގެ ސަލާމަތާއި ރައްކާތެރިކަމަށްޓަކައި، އާއްމު ސިއްޙަތު ރައްކާތެރި ކުރުމުގެ ޤާނޫނު ގެ ދަށުން އާއްމު ސިއްޙަތުގެ ކުއްލި ނުރައްކަލުގެ ޙާލަތު އިޢުލާނު ކޮށްފައިވާތީ އާއި އަދި އިންޓަރނޭޝަނަލް މެރިޓައިމް އޯގަނައިޒޭޝަންގެ ސަރކިއުލަރއާއި ޙަވާލާދީ ކަމަށެވެ.

އެގޮތުން 1 މާރޗް 2020 ވަނަ ދުވަހުން ފެށިގެން މުއްދަތު ހަމަވާ ދިވެހިރާއްޖެއިން ދޫކޮށްފައިވާ ސެޓްފިކެޓް އޮފް ކޮމްޕިޓެންސީ (ސީއޯސީ) މުއްދަތު ހަމަވާ ތާރީޚުން ފެށިގެން 6 މަސް ދުވަހުގެ މުއްދަތަށް ރިވެލިޓޭޑް ކޮށްދޭގޮތަށް ހަމަޖައްސާފައިވާ ކަމަށެވެ. އަދި މިގޮތުން ރާއްޖެއިން ބޭރުގައި ތިބެގެން ސީއޯސީ ސެޓްފިކެޓް މުއްދަތު ހަމަވާ ފަރާތްތަކުގެ ސެޓްފިކެޓްތައް ރިވެލިޑޭޓް ކުރުމަށް ޑޮކިއުމަންޓް maritime@transport.gov.mv އަށް މެއިލް ކޮށްދިނުމަށް އެދިފައިވެއެވެ.

އަދި 1 މާރޗް އިން ފެށިގެން މުއްދަތު ހަމަވެގެން ރިވެލިޓޭޑް ކުރުމަށް ހުށަހަޅާ ސީއޯސީއަށް ރިވެލިޑޭޓް ކުރުމަށްޓަކައި ހުށަހަޅަންޖެހޭ ދިވެހިރާއްޖޭގެ އިންސްޓިޓިއުޓަކުން ދޫކޮށްފައިވާ ރިފްރެޝަރ ކޯސް ތަކުގެ ސެޓްފިކެޓް ތަކުގެ މުއްދަތު ވެސް 6 މަސް ދުވަހުގެ މުއްދަތަށް އިތުރުކޮށް ދިނުމަށްވަނީ ހަމަޖެހިފާ ކަމަށް ޓްރާންސްޕޯޓް އޮތޯރިޓީން ބުނެއެވެ.

އެހެންކަމުން މިކަމަށް އެދޭ ފަރާތްތަކުންވެސް ލިޔުންތައް maritime@transport.gov.mv އަށް މެއިލް ކޮށްދިނުމަށް އެދިފައިވެއެވެ. ދިވެހި ސީމަނުންނަށް ދޫކޮށްފައިވާ މެޑިކަލް ފިޓްނަސް ސެޓްފިކެޓް މުއްދަތު 1 މާރިޗު 2020 އިން ފެށިގެން މުއްދަތު ހަމަވާ ފަރާތްތަކުގެ މެޑިކަލް ފިޓްނަސް ސެޓްފިކެޓްގެ މުއްދަތު 30 ޖޫން 2020 ގެ ނިޔަލަށް ވެސް ވަނީ އިތުރުކޮށްދީފައެވެ.

އަދި ދިވެހިރާއްޖޭގައި ރަޖިސްޓަރީކޮށްގެން އޮޕަރޭޓްކުރާ ފޮރިންގ ގޮއިން އުޅަނދު ފަހަރަށް ދޫކޮށްފައިވާ ސޭފްޓީ ސެޓްފިކެޓް 1 މާރޗް އިން ފެށިގެން މުއްދަތު ހަމަވާ ސެޓްފިކެޓްތައް 30 ޖޫން 2020 ގެ ނިޔަލަށް މުއްދަތު އިތުރު ކޮށްދީފައިވެއެވެ.

މީގެ އިތުރުން ޕޯޓް ފެސިލިޓީ ތަކަށް ދޫކޮށްފައިވާ ހުއްދަ 1 މާރޗް އިން ފެށިގެން ހަމަވެފައިވާ ފެސިލިޓީތަކަށް ކުރިން ދޫކޮށްފައިވާ ހުއްދަ 30 ޖޫން 2020 ގެ ނިޔަލަށް މުއްދަތު އިތުރުކޮށްދީފައިވާނެ ކަމަށް ވެސް ޓްރާންސްޕޯޓް އޮތޯރިޓީން ބުނެއެވެ.